4. චූළවෙදල්‌ලසුත්‌තං
460. එවං මෙ සුතං – එකං සමයං භගවා රාජගහෙ විහරති වෙළුවනෙ කලන්‌දකනිවාපෙ. අථ ඛො විසාඛො උපාසකො යෙන ධම්‌මදින්‌නා භික්‌ඛුනී තෙනුපසඞ්‌කමි; උපසඞ්‌කමිත්‌වා ධම්‌මදින්‌නං භික්‌ඛුනිං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො විසාඛො උපාසකො ධම්‌මදින්‌නං භික්‌ඛුනිං එතදවොච – ‘‘‘සක්‌කායො සක්‌කායො’ති, අය්‍යෙ, වුච්‌චති. කතමො නු ඛො, අය්‍යෙ, සක්‌කායො වුත්‌තො භගවතා’’ති? ‘‘පඤ්‌ච ඛො ඉමෙ, ආවුසො විසාඛ, උපාදානක්‌ඛන්‌ධා සක්‌කායො වුත්‌තො භගවතා, සෙය්‍යථිදං – රූපුපාදානක්‌ඛන්‌ධො, වෙදනුපාදානක්‌ඛන්‌ධො, සඤ්‌ඤුපාදානක්‌ඛන්‌ධො, සඞ්‌ඛාරුපාදානක්‌ඛන්‌ධො, විඤ්‌ඤාණුපාදානක්‌ඛන්‌ධො. ඉමෙ ඛො, ආවුසො විසාඛ, පඤ්‌චුපාදානක්‌ඛන්‌ධා සක්‌කායො වුත්‌තො භගවතා’’ති.
‘‘සාධය්‍යෙ’’ති ඛො විසාඛො උපාසකො ධම්‌මදින්‌නාය භික්‌ඛුනියා භාසිතං අභිනන්‌දිත්‌වා අනුමොදිත්‌වා ධම්‌මදින්‌නං භික්‌ඛුනිං උත්‌තරිං පඤ්‌හං අපුච්‌ඡි – ‘‘‘සක්‌කායසමුදයො සක්‌කායසමුදයො’ති, අය්‍යෙ, වුච්‌චති. කතමො නු ඛො, අය්‍යෙ, සක්‌කායසමුදයො වුත්‌තො භගවතා’’ති? ‘‘යායං, ආවුසො විසාඛ, තණ්‌හා පොනොබ්‌භවිකා නන්‌දීරාගසහගතා තත්‍රතත්‍රාභිනන්‌දිනී, සෙය්‍යථිදං – කාමතණ්‌හා භවතණ්‌හා විභවතණ්‌හා; අයං ඛො, ආවුසො විසාඛ, සක්‌කායසමුදයො වුත්‌තො භගවතා’’ති.
‘‘‘සක්‌කායනිරොධො සක්‌කායනිරොධො’ති, අය්‍යෙ, වුච්‌චති. කතමො නු ඛො, අය්‍යෙ, සක්‌කායනිරොධො වුත්‌තො භගවතා’’ති?
‘‘යො ඛො, ආවුසො විසාඛ, තස්‌සායෙව තණ්‌හාය අසෙසවිරාගනිරොධො චාගො පටිනිස්‌සග්‌ගො මුත්‌ති අනාලයො; අයං ඛො, ආවුසො විසාඛ, සක්‌කායනිරොධො වුත්‌තො භගවතා’’ති.
‘‘‘සක්‌කායනිරොධගාමිනී පටිපදා සක්‌කායනිරොධගාමිනී පටිපදා’ති, අය්‍යෙ, වුච්‌චති. කතමා නු ඛො, අය්‍යෙ, සක්‌කායනිරොධගාමිනී පටිපදා වුත්‌තා භගවතා’’ති?
‘‘අයමෙව ඛො, ආවුසො විසාඛ, අරියො අට්‌ඨඞ්‌ගිකො මග්‌ගො සක්‌කායනිරොධගාමිනී පටිපදා වුත්‌තා භගවතා, සෙය්‍යථිදං – සම්‌මාදිට්‌ඨි සම්‌මාසඞ්‌කප්‌පො සම්‌මාවාචා සම්‌මාකම්‌මන්‌තො සම්‌මාආජීවො සම්‌මාවායාමො සම්‌මාසති සම්‌මාසමාධී’’ති.
‘‘තඤ්‌ඤෙව නු ඛො, අය්‍යෙ, උපාදානං තෙ [තෙව (සී.)] පඤ්‌චුපාදානක්‌ඛන්‌ධා උදාහු අඤ්‌ඤත්‍ර පඤ්‌චහුපාදානක්‌ඛන්‌ධෙහි උපාදාන’’න්‌ති? ‘‘න ඛො, ආවුසො විසාඛ, තඤ්‌ඤෙව උපාදානං තෙ පඤ්‌චුපාදානක්‌ඛන්‌ධා, නාපි අඤ්‌ඤත්‍ර පඤ්‌චහුපාදානක්‌ඛන්‌ධෙහි උපාදානං. යො ඛො, ආවුසො විසාඛ, පඤ්‌චසු උපාදානක්‌ඛන්‌ධෙසු ඡන්‌දරාගො තං තත්‌ථ උපාදාන’’න්‌ති.
461. ‘‘කථං පනාය්‍යෙ, සක්‌කායදිට්‌ඨි හොතී’’ති? ‘‘ඉධාවුසො විසාඛ, අස්‌සුතවා පුථුජ්‌ජනො, අරියානං අදස්‌සාවී අරියධම්‌මස්‌ස අකොවිදො අරියධම්‌මෙ අවිනීතො, සප්‌පුරිසානං අදස්‌සාවී සප්‌පුරිසධම්‌මස්‌ස අකොවිදො සප්‌පුරිසධම්‌මෙ අවිනීතො, රූපං අත්‌තතො සමනුපස්‌සති, රූපවන්‌තං වා අත්‌තානං, අත්‌තනි වා රූපං, රූපස්‌මිං වා අත්‌තානං. වෙදනං…පෙ.… සඤ්‌ඤං… සඞ්‌ඛාරෙ… විඤ්‌ඤාණං අත්‌තතො සමනුපස්‌සති, විඤ්‌ඤාණවන්‌තං වා අත්‌තානං, අත්‌තනි වා විඤ්‌ඤාණං, විඤ්‌ඤාණස්‌මිං වා අත්‌තානං. එවං ඛො , ආවුසො විසාඛ, සක්‌කායදිට්‌ඨි හොතී’’ති.
‘‘කථං පනාය්‍යෙ, සක්‌කායදිට්‌ඨි න හොතී’’ති?
‘‘ඉධාවුසො විසාඛ, සුතවා අරියසාවකො, අරියානං දස්‌සාවී අරියධම්‌මස්‌ස කොවිදො අරියධම්‌මෙ සුවිනීතො, සප්‌පුරිසානං දස්‌සාවී සප්‌පුරිසධම්‌මස්‌ස කොවිදො සප්‌පුරිසධම්‌මෙ සුවිනීතො, න රූපං අත්‌තතො සමනුපස්‌සති, න රූපවන්‌තං වා අත්‌තානං, න අත්‌තනි වා රූපං, න රූපස්‌මිං වා අත්‌තානං. න වෙදනං…පෙ.… න සඤ්‌ඤං… න සඞ්‌ඛාරෙ…පෙ.… න විඤ්‌ඤාණං අත්‌තතො සමනුපස්‌සති, න විඤ්‌ඤාණවන්‌තං වා අත්‌තානං , න අත්‌තනි වා විඤ්‌ඤාණං, න විඤ්‌ඤාණස්‌මිං වා අත්‌තානං. එවං ඛො, ආවුසො විසාඛ, සක්‌කායදිට්‌ඨි න හොතී’’ති.
462. ‘‘කතමො පනාය්‍යෙ, අරියො අට්‌ඨඞ්‌ගිකො මග්‌ගො’’ති?
‘‘අයමෙව ඛො, ආවුසො විසාඛ, අරියො අට්‌ඨඞ්‌ගිකො මග්‌ගො, සෙය්‍යථිදං – සම්‌මාදිට්‌ඨි සම්‌මාසඞ්‌කප්‌පො සම්‌මාවාචා සම්‌මාකම්‌මන්‌තො සම්‌මාආජීවො සම්‌මාවායාමො සම්‌මාසති සම්‌මාසමාධී’’ති. ‘‘අරියො පනාය්‍යෙ, අට්‌ඨඞ්‌ගිකො මග්‌ගො සඞ්‌ඛතො උදාහු අසඞ්‌ඛතො’’ති?
‘‘අරියො ඛො, ආවුසො විසාඛ, අට්‌ඨඞ්‌ගිකො මග්‌ගො සඞ්‌ඛතො’’ති .
‘‘අරියෙන නු ඛො, අය්‍යෙ, අට්‌ඨඞ්‌ගිකෙන මග්‌ගෙන තයො ඛන්‌ධා සඞ්‌ගහිතා උදාහු තීහි ඛන්‌ධෙහි අරියො අට්‌ඨඞ්‌ගිකො මග්‌ගො සඞ්‌ගහිතො’’ති?
‘‘න ඛො, ආවුසො විසාඛ, අරියෙන අට්‌ඨඞ්‌ගිකෙන මග්‌ගෙන තයො ඛන්‌ධා සඞ්‌ගහිතා; තීහි ච ඛො, ආවුසො විසාඛ, ඛන්‌ධෙහි අරියො අට්‌ඨඞ්‌ගිකො මග්‌ගො සඞ්‌ගහිතො. යා චාවුසො විසාඛ, සම්‌මාවාචා යො ච සම්‌මාකම්‌මන්‌තො යො ච සම්‌මාආජීවො ඉමෙ ධම්‌මා සීලක්‌ඛන්‌ධෙ සඞ්‌ගහිතා. යො ච සම්‌මාවායාමො යා ච සම්‌මාසති යො ච සම්‌මාසමාධි ඉමෙ ධම්‌මා සමාධික්‌ඛන්‌ධෙ සඞ්‌ගහිතා. යා ච සම්‌මාදිට්‌ඨි යො ච සම්‌මාසඞ්‌කප්‌පො, ඉමෙ ධම්‌මා පඤ්‌ඤාක්‌ඛන්‌ධෙ සඞ්‌ගහිතා’’ති.
‘‘කතමො පනාය්‍යෙ, සමාධි, කතමෙ ධම්‌මා සමාධිනිමිත්‌තා, කතමෙ ධම්‌මා සමාධිපරික්‌ඛාරා, කතමා සමාධිභාවනා’’ති?
‘‘යා ඛො, ආවුසො විසාඛ, චිත්‌තස්‌ස එකග්‌ගතා අයං සමාධි; චත්‌තාරො සතිපට්‌ඨානා සමාධිනිමිත්‌තා; චත්‌තාරො සම්‌මප්‌පධානා සමාධිපරික්‌ඛාරා. යා තෙසංයෙව ධම්‌මානං ආසෙවනා භාවනා බහුලීකම්‌මං, අයං එත්‌ථ සමාධිභාවනා’’ති.
463. ‘‘කති පනාය්‍යෙ, සඞ්‌ඛාරා’’ති?
‘‘තයොමෙ, ආවුසො විසාඛ, සඞ්‌ඛාරා – කායසඞ්‌ඛාරො, වචීසඞ්‌ඛාරො, චිත්‌තසඞ්‌ඛාරො’’ති.
‘‘කතමො පනාය්‍යෙ, කායසඞ්‌ඛාරො, කතමො වචීසඞ්‌ඛාරො, කතමො චිත්‌තසඞ්‌ඛාරො’’ති?
‘‘අස්‌සාසපස්‌සාසා ඛො, ආවුසො විසාඛ, කායසඞ්‌ඛාරො, විතක්‌කවිචාරා වචීසඞ්‌ඛාරො, සඤ්‌ඤා ච වෙදනා ච චිත්‌තසඞ්‌ඛාරො’’ති.
‘‘කස්‌මා පනාය්‍යෙ, අස්‌සාසපස්‌සාසා කායසඞ්‌ඛාරො, කස්‌මා විතක්‌කවිචාරා වචීසඞ්‌ඛාරො, කස්‌මා සඤ්‌ඤා ච වෙදනා ච චිත්‌තසඞ්‌ඛාරො’’ති?
‘‘අස්‌සාසපස්‌සාසා ඛො, ආවුසො විසාඛ, කායිකා එතෙ ධම්‌මා කායප්‌පටිබද්‌ධා, තස්‌මා අස්‌සාසපස්‌සාසා කායසඞ්‌ඛාරො. පුබ්‌බෙ ඛො, ආවුසො විසාඛ, විතක්‌කෙත්‌වා විචාරෙත්‌වා පච්‌ඡා වාචං භින්‌දති, තස්‌මා විතක්‌කවිචාරා වචීසඞ්‌ඛාරො. සඤ්‌ඤා ච වෙදනා ච චෙතසිකා එතෙ ධම්‌මා චිත්‌තප්‌පටිබද්‌ධා, තස්‌මා සඤ්‌ඤා ච වෙදනා ච චිත්‌තසඞ්‌ඛාරො’’ති.
464. ‘‘කථං පනාය්‍යෙ, සඤ්‌ඤාවෙදයිතනිරොධසමාපත්‌ති හොතී’’ති?
‘‘න ඛො, ආවුසො විසාඛ, සඤ්‌ඤාවෙදයිතනිරොධං සමාපජ්‌ජන්‌තස්‌ස භික්‌ඛුනො එවං හොති – ‘අහං සඤ්‌ඤාවෙදයිතනිරොධං සමාපජ්‌ජිස්‌ස’න්‌ති වා, ‘අහං සඤ්‌ඤාවෙදයිතනිරොධං සමාපජ්‌ජාමී’ති වා, ‘අහං සඤ්‌ඤාවෙදයිතනිරොධං සමාපන්‌නො’ති වා. අථ ඛ්‌වාස්‌ස පුබ්‌බෙව තථා චිත්‌තං භාවිතං හොති යං තං තථත්‌තාය උපනෙතී’’ති.
‘‘සඤ්‌ඤාවෙදයිතනිරොධං සමාපජ්‌ජන්‌තස්‌ස පනාය්‍යෙ, භික්‌ඛුනො කතමෙ ධම්‌මා පඨමං නිරුජ්‌ඣන්‌ති – යදි වා කායසඞ්‌ඛාරො, යදි වා වචීසඞ්‌ඛාරො, යදි වා චිත්‌තසඞ්‌ඛාරො’’ති? ‘‘සඤ්‌ඤාවෙදයිතනිරොධං සමාපජ්‌ජන්‌තස්‌ස ඛො, ආවුසො විසාඛ, භික්‌ඛුනො පඨමං නිරුජ්‌ඣති වචීසඞ්‌ඛාරො, තතො කායසඞ්‌ඛාරො, තතො චිත්‌තසඞ්‌ඛාරො’’ති.
‘‘කථං පනාය්‍යෙ, සඤ්‌ඤාවෙදයිතනිරොධසමාපත්‌තියා වුට්‌ඨානං හොතී’’ති?
‘‘න ඛො, ආවුසො විසාඛ, සඤ්‌ඤාවෙදයිතනිරොධසමාපත්‌තියා වුට්‌ඨහන්‌තස්‌ස භික්‌ඛුනො එවං හොති – ‘අහං සඤ්‌ඤාවෙදයිතනිරොධසමාපත්‌තියා වුට්‌ඨහිස්‌ස’න්‌ති වා, ‘අහං සඤ්‌ඤාවෙදයිතනිරොධසමාපත්‌තියා වුට්‌ඨහාමී’ති වා, ‘අහං සඤ්‌ඤාවෙදයිතනිරොධසමාපත්‌තියා වුට්‌ඨිතො’ති වා. අථ ඛ්‌වාස්‌ස පුබ්‌බෙව තථා චිත්‌තං භාවිතං හොති යං තං තථත්‌තාය උපනෙතී’’ති.
‘‘සඤ්‌ඤාවෙදයිතනිරොධසමාපත්‌තියා වුට්‌ඨහන්‌තස්‌ස පනාය්‍යෙ, භික්‌ඛුනො කතමෙ ධම්‌මා පඨමං උප්‌පජ්‌ජන්‌ති – යදි වා කායසඞ්‌ඛාරො, යදි වා වචීසඞ්‌ඛාරො, යදි වා චිත්‌තසඞ්‌ඛාරො’’ති? ‘‘සඤ්‌ඤාවෙදයිතනිරොධසමාපත්‌තියා වුට්‌ඨහන්‌තස්‌ස ඛො, ආවුසො විසාඛ, භික්‌ඛුනො පඨමං උප්‌පජ්‌ජති චිත්‌තසඞ්‌ඛාරො, තතො කායසඞ්‌ඛාරො, තතො වචීසඞ්‌ඛාරො’’ති.
‘‘සඤ්‌ඤාවෙදයිතනිරොධසමාපත්‌තියා වුට්‌ඨිතං පනාය්‍යෙ, භික්‌ඛුං කති ඵස්‌සා ඵුසන්‌තී’’ති? ‘‘සඤ්‌ඤාවෙදයිතනිරොධසමාපත්‌තියා වුට්‌ඨිතං ඛො, ආවුසො විසාඛ, භික්‌ඛුං තයො ඵස්‌සා ඵුසන්‌ති – සුඤ්‌ඤතො ඵස්‌සො, අනිමිත්‌තො ඵස්‌සො, අප්‌පණිහිතො ඵස්‌සො’’ති.
‘‘සඤ්‌ඤාවෙදයිතනිරොධසමාපත්‌තියා වුට්‌ඨිතස්‌ස පනාය්‍යෙ, භික්‌ඛුනො කිංනින්‌නං චිත්‌තං හොති කිංපොණං කිංපබ්‌භාර’’න්‌ති? ‘‘සඤ්‌ඤාවෙදයිතනිරොධසමාපත්‌තියා වුට්‌ඨිතස්‌ස ඛො, ආවුසො විසාඛ, භික්‌ඛුනො විවෙකනින්‌නං චිත්‌තං හොති, විවෙකපොණං විවෙකපබ්‌භාර’’න්‌ති.
465. ‘‘කති පනාය්‍යෙ, වෙදනා’’ති?
‘‘තිස්‌සො ඛො ඉමා, ආවුසො විසාඛ, වෙදනා – සුඛා වෙදනා, දුක්‌ඛා වෙදනා, අදුක්‌ඛමසුඛා වෙදනා’’ති.
‘‘කතමා පනාය්‍යෙ, සුඛා වෙදනා, කතමා දුක්‌ඛා වෙදනා, කතමා අදුක්‌ඛමසුඛා වෙදනා’’ති?
‘‘යං ඛො, ආවුසො විසාඛ, කායිකං වා චෙතසිකං වා සුඛං සාතං වෙදයිතං – අයං සුඛා වෙදනා. යං ඛො, ආවුසො විසාඛ, කායිකං වා චෙතසිකං වා දුක්‌ඛං අසාතං වෙදයිතං – අයං දුක්‌ඛා වෙදනා. යං ඛො, ආවුසො විසාඛ, කායිකං වා චෙතසිකං වා නෙව සාතං නාසාතං වෙදයිතං – අයං අදුක්‌ඛමසුඛා වෙදනා’’ති.
‘‘සුඛා පනාය්‍යෙ, වෙදනා කිංසුඛා කිංදුක්‌ඛා, දුක්‌ඛා වෙදනා කිංසුඛා කිංදුක්‌ඛා, අදුක්‌ඛමසුඛා වෙදනා කිංසුඛා කිංදුක්‌ඛා’’ති?
‘‘සුඛා ඛො, ආවුසො විසාඛ, වෙදනා ඨිතිසුඛා විපරිණාමදුක්‌ඛා; දුක්‌ඛා වෙදනා ඨිතිදුක්‌ඛා විපරිණාමසුඛා ; අදුක්‌ඛමසුඛා වෙදනා ඤාණසුඛා අඤ්‌ඤාණදුක්‌ඛා’’ති.
‘‘සුඛාය පනාය්‍යෙ, වෙදනාය කිං අනුසයො අනුසෙති, දුක්‌ඛාය වෙදනාය කිං අනුසයො අනුසෙති, අදුක්‌ඛමසුඛාය වෙදනාය කිං අනුසයො අනුසෙතී’’ති?
‘‘සුඛාය ඛො, ආවුසො විසාඛ, වෙදනාය රාගානුසයො අනුසෙති, දුක්‌ඛාය වෙදනාය පටිඝානුසයො අනුසෙති, අදුක්‌ඛමසුඛාය වෙදනාය අවිජ්‌ජානුසයො අනුසෙතී’’ති.
‘‘සබ්‌බාය නු ඛො, අය්‍යෙ, සුඛාය වෙදනාය රාගානුසයො අනුසෙති, සබ්‌බාය දුක්‌ඛාය වෙදනාය පටිඝානුසයො අනුසෙති, සබ්‌බාය අදුක්‌ඛමසුඛාය වෙදනාය අවිජ්‌ජානුසයො අනුසෙතී’’ති?
‘‘න ඛො, ආවුසො විසාඛ, සබ්‌බාය සුඛාය වෙදනාය රාගානුසයො අනුසෙති, න සබ්‌බාය දුක්‌ඛාය වෙදනාය පටිඝානුසයො අනුසෙති, න සබ්‌බාය අදුක්‌ඛමසුඛාය වෙදනාය අවිජ්‌ජානුසයො අනුසෙතී’’ති.
‘‘සුඛාය පනාය්‍යෙ, වෙදනාය කිං පහාතබ්‌බං, දුක්‌ඛාය වෙදනාය කිං පහාතබ්‌බං, අදුක්‌ඛමසුඛාය වෙදනාය කිං පහාතබ්‌බ’’න්‌ති?
‘‘සුඛාය ඛො, ආවුසො විසාඛ, වෙදනාය රාගානුසයො පහාතබ්‌බො, දුක්‌ඛාය වෙදනාය පටිඝානුසයො පහාතබ්‌බො, අදුක්‌ඛමසුඛාය වෙදනාය අවිජ්‌ජානුසයො පහාතබ්‌බො’’ති.
‘‘සබ්‌බාය නු ඛො, අය්‍යෙ, සුඛාය වෙදනාය රාගානුසයො පහාතබ්‌බො, සබ්‌බාය දුක්‌ඛාය වෙදනාය පටිඝානුසයො පහාතබ්‌බො, සබ්‌බාය අදුක්‌ඛමසුඛාය වෙදනාය අවිජ්‌ජානුසයො පහාතබ්‌බො’’ති?
‘‘න ඛො, ආවුසො විසාඛ, සබ්‌බාය සුඛාය වෙදනාය රාගානුසයො පහාතබ්‌බො, න සබ්‌බාය දුක්‌ඛාය වෙදනාය පටිඝානුසයො පහාතබ්‌බො , න සබ්‌බාය අදුක්‌ඛමසුඛාය වෙදනාය අවිජ්‌ජානුසයො පහාතබ්‌බො. ඉධාවුසො විසාඛ, භික්‌ඛු විවිච්‌චෙව කාමෙහි විවිච්‌ච අකුසලෙහි ධම්‌මෙහි සවිතක්‌කං සවිචාරං විවෙකජං පීතිසුඛං පඨමං ඣානං උපසම්‌පජ්‌ජ විහරති. රාගං තෙන පජහති, න තත්‌ථ රාගානුසයො අනුසෙති. ඉධාවුසො විසාඛ, භික්‌ඛු ඉති පටිසඤ්‌චික්‌ඛති – ‘කුදාස්‌සු නාමාහං තදායතනං උපසම්‌පජ්‌ජ විහරිස්‌සාමි යදරියා එතරහි ආයතනං උපසම්‌පජ්‌ජ විහරන්‌තී’ති? ඉති අනුත්‌තරෙසු විමොක්‌ඛෙසු පිහං උපට්‌ඨාපයතො උප්‌පජ්‌ජති පිහාප්‌පච්‌චයා දොමනස්‌සං. පටිඝං තෙන පජහති, න තත්‌ථ පටිඝානුසයො අනුසෙති. ඉධාවුසො විසාඛ, භික්‌ඛු සුඛස්‌ස ච පහානා, දුක්‌ඛස්‌ස ච පහානා, පුබ්‌බෙව සොමනස්‌සදොමනස්‌සානං අත්‌ථඞ්‌ගමා, අදුක්‌ඛමසුඛං උපෙක්‌ඛාසතිපාරිසුද්‌ධිං චතුත්‌ථං ඣානං උපසම්‌පජ්‌ජ විහරති. අවිජ්‌ජං තෙන පජහති, න තත්‌ථ අවිජ්‌ජානුසයො අනුසෙතී’’ති.
466. ‘‘සුඛාය පනාය්‍යෙ, වෙදනාය කිං පටිභාගො’’ති?
‘‘සුඛාය ඛො, ආවුසො විසාඛ, වෙදනාය දුක්‌ඛා වෙදනා පටිභාගො’’ති.
‘‘දුක්‌ඛාය පන්‌නාය්‍යෙ, වෙදනාය කිං පටිභාගො’’ති?
‘‘දුක්‌ඛාය ඛො, ආවුසො විසාඛ, වෙදනාය සුඛා වෙදනා පටිභාගො’’ති.
‘‘අදුක්‌ඛමසුඛාය පනාය්‍යෙ, වෙදනාය කිං පටිභාගො’’ති?
‘‘අදුක්‌ඛමසුඛාය ඛො, ආවුසො විසාඛ, වෙදනාය අවිජ්‌ජා පටිභාගො’’ති.
‘‘අවිජ්‌ජාය පනාය්‍යෙ, කිං පටිභාගො’’ති?
‘‘අවිජ්‌ජාය ඛො, ආවුසො විසාඛ, විජ්‌ජා පටිභාගො’’ති.
‘‘විජ්‌ජාය පනාය්‍යෙ, කිං පටිභාගො’’ති?
‘‘විජ්‌ජාය ඛො, ආවුසො විසාඛ, විමුත්‌ති පටිභාගො’’ති.
‘‘විමුත්‌තියා පනාය්‍යෙ , කිං පටිභාගො’’ති?
‘‘විමුත්‌තියා ඛො, ආවුසො විසාඛ, නිබ්‌බානං පටිභාගො’’ති.
‘‘නිබ්‌බානස්‌ස පනාය්‍යෙ, කිං පටිභාගො’’ති? ‘‘අච්‌චයාසි, ආවුසො [අච්‌චසරාවුසො (සී. පී.), අච්‌චස්‌සරාවුසො (ස්‍යා. කං.)] විසාඛ, පඤ්‌හං, නාසක්‌ඛි පඤ්‌හානං පරියන්‌තං ගහෙතුං. නිබ්‌බානොගධඤ්‌හි, ආවුසො විසාඛ, බ්‍රහ්‌මචරියං, නිබ්‌බානපරායනං නිබ්‌බානපරියොසානං. ආකඞ්‌ඛමානො ච ත්‌වං, ආවුසො විසාඛ, භගවන්‌තං උපසඞ්‌කමිත්‌වා එතමත්‌ථං පුච්‌ඡෙය්‍යාසි, යථා ච තෙ භගවා බ්‍යාකරොති තථා නං ධාරෙය්‍යාසී’’ති.
467. අථ ඛො විසාඛො උපාසකො ධම්‌මදින්‌නාය භික්‌ඛුනියා භාසිතං අභිනන්‌දිත්‌වා අනුමොදිත්‌වා උට්‌ඨායාසනා ධම්‌මදින්‌නං භික්‌ඛුනිං අභිවාදෙත්‌වා පදක්‌ඛිණං කත්‌වා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො විසාඛො උපාසකො යාවතකො අහොසි ධම්‌මදින්‌නාය භික්‌ඛුනියා සද්‌ධිං කථාසල්‌ලාපො තං සබ්‌බං භගවතො ආරොචෙසි. එවං වුත්‌තෙ, භගවා විසාඛං උපාසකං එතදවොච – ‘‘පණ්‌ඩිතා, විසාඛ, ධම්‌මදින්‌නා භික්‌ඛුනී, මහාපඤ්‌ඤා, විසාඛ, ධම්‌මදින්‌නා භික්‌ඛුනී. මං චෙපි ත්‌වං, විසාඛ, එතමත්‌ථං පුච්‌ඡෙය්‍යාසි, අහම්‌පි තං එවමෙවං බ්‍යාකරෙය්‍යං, යථා තං ධම්‌මදින්‌නාය භික්‌ඛුනියා බ්‍යාකතං. එසො චෙවෙතස්‌ස [එසොවෙතස්‌ස (ස්‍යා. කං.)] අත්‌ථො. එවඤ්‌ච නං [එවමෙතං (සී. ස්‍යා. කං.)]ධාරෙහී’’ති.
ඉදමවොච භගවා. අත්‌තමනො විසාඛො උපාසකො භගවතො භාසිතං අභිනන්‌දීති.
චූළවෙදල්‌ලසුත්‌තං නිට්‌ඨිතං චතුත්‌ථං.
No comments:
Post a Comment