7. පියජාතිකසුත්‌තං
353. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරස්‌ස ගහපතිස්‌ස එකපුත්‌තකො පියො මනාපො කාලඞ්‌කතො හොති. තස්‌ස කාලංකිරියාය නෙව කම්‌මන්‌තා පටිභන්‌ති න භත්‌තං පටිභාති. සො ආළාහනං ගන්‌ත්‌වා කන්‌දති – ‘‘කහං, එකපුත්‌තක, කහං, එකපුත්‌තකා’’ති! අථ ඛො සො ගහපති යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො තං ගහපතිං භගවා එතදවොච – ‘‘න ඛො තෙ, ගහපති, සකෙ චිත්‌තෙ ඨිතස්‌ස ඉන්‌ද්‍රියානි, අත්‌ථි තෙ ඉන්‌ද්‍රියානං අඤ්‌ඤථත්‌ත’’න්‌ති. ‘‘කිඤ්‌හි මෙ, භන්‌තෙ, ඉන්‌ද්‍රියානං නාඤ්‌ඤථත්‌තං භවිස්‌සති; මය්‌හඤ්‌හි, භන්‌තෙ, එකපුත්‌තො පියො මනාපො කාලඞ්‌කතො. තස්‌ස කාලංකිරියාය නෙව කම්‌මන්‌තා පටිභන්‌ති, න භත්‌තං පටිභාති. සොහං ආළාහනං ගන්‌ත්‌වා කන්‌දාමි – ‘කහං, එකපුත්‌තක, කහං, එකපුත්‌තකා’’’ති! ‘‘එවමෙතං, ගහපති, එවමෙතං, ගහපති [එවමෙතං ගහපති (පී. සකිදෙව), එවමෙව (සී. සකිදෙව)]! පියජාතිකා හි, ගහපති, සොකපරිදෙවදුක්‌ඛදොමනස්‌සුපායාසා පියප්‌පභවිකා’’ති. ‘‘කස්‌ස ඛො [කිස්‌ස නු ඛො (සී.)] නාමෙතං, භන්‌තෙ, එවං භවිස්‌සති – ‘පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’ති? පියජාතිකා හි ඛො, භන්‌තෙ, ආනන්‌දසොමනස්‌සා පියප්‌පභවිකා’’ති. අථ ඛො සො ගහපති භගවතො භාසිතං අනභිනන්‌දිත්‌වා පටික්‌කොසිත්‌වා උට්‌ඨායාසනා පක්‌කාමි.
354. තෙන ඛො පන සමයෙන සම්‌බහුලා අක්‌ඛධුත්‌තා භගවතො අවිදූරෙ අක්‌ඛෙහි දිබ්‌බන්‌ති. අථ ඛො සො ගහපති යෙන තෙ අක්‌ඛධුත්‌තා තෙනුපසඞ්‌කමි; උපසඞ්‌කමිත්‌වා අක්‌ඛධුත්‌තෙ එතදවොච – ‘‘ඉධාහං, භොන්‌තො, යෙන සමණො ගොතමො තෙනුපසඞ්‌කමිං; උපසඞ්‌කමිත්‌වා සමණං ගොතමං අභිවාදෙත්‌වා එකමන්‌තං නිසීදිං. එකමන්‌තං නිසින්‌නං ඛො මං, භොන්‌තො, සමණො ගොතමො එතදවොච – ‘න ඛො තෙ, ගහපති, සකෙ චිත්‌තෙ ඨිතස්‌ස ඉන්‌ද්‍රියානි, අත්‌ථි තෙ ඉන්‌ද්‍රියානං අඤ්‌ඤථත්‌ත’න්‌ති. එවං වුත්‌තෙ, අහං, භොන්‌තො, සමණං ගොතමං එතදවොචං – ‘කිඤ්‌හි මෙ, භන්‌තෙ, ඉන්‌ද්‍රියානං නාඤ්‌ඤථත්‌තං භවිස්‌සති; මය්‌හඤ්‌හි, භන්‌තෙ, එකපුත්‌තකො පියො මනාපො කාලඞ්‌කතො. තස්‌ස කාලංකිරියාය නෙව කම්‌මන්‌තා පටිභන්‌ති, න භත්‌තං පටිභාති . සොහං ආළාහනං ගන්‌ත්‌වා කන්‌දාමි – කහං, එකපුත්‌තක, කහං, එකපුත්‌තකා’ති! ‘එවමෙතං, ගහපති, එවමෙතං, ගහපති! පියජාතිකා හි, ගහපති, සොකපරිදෙවදුක්‌ඛදොමනස්‌සුපායාසා පියප්‌පභවිකා’ති. ‘කස්‌ස ඛො නාමෙතං, භන්‌තෙ, එවං භවිස්‌සති – පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා? පියජාතිකා හි ඛො, භන්‌තෙ, ආනන්‌දසොමනස්‌සා පියප්‌පභවිකා’ති. අථ ඛ්‌වාහං, භොන්‌තො, සමණස්‌ස ගොතමස්‌ස භාසිතං අනභිනන්‌දිත්‌වා පටික්‌කොසිත්‌වා උට්‌ඨායාසනා පක්‌කමි’’න්‌ති. ‘‘එවමෙතං, ගහපති, එවමෙතං, ගහපති! පියජාතිකා හි, ගහපති, ආනන්‌දසොමනස්‌සා පියප්‌පභවිකා’’ති . අථ ඛො සො ගහපති ‘‘සමෙති මෙ අක්‌ඛධුත්‌තෙහී’’ති පක්‌කාමි. අථ ඛො ඉදං කථාවත්‌ථු අනුපුබ්‌බෙන රාජන්‌තෙපුරං පාවිසි.
355. අථ ඛො රාජා පසෙනදි කොසලො මල්‌ලිකං දෙවිං ආමන්‌තෙසි – ‘‘ඉදං තෙ, මල්‌ලිකෙ, සමණෙන ගොතමෙන භාසිතං – ‘පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’’’ති. ‘‘සචෙතං, මහාරාජ, භගවතා භාසිතං, එවමෙත’’න්‌ති. ‘‘එවමෙව පනායං මල්‌ලිකා යඤ්‌ඤදෙව සමණො ගොතමො භාසති තං තදෙවස්‌ස අබ්‌භනුමොදති’’. ‘‘සචෙතං, මහාරාජ, භගවතා භාසිතං එවමෙතන්‌ති. සෙය්‍යථාපි නාම, යඤ්‌ඤදෙව ආචරියො අන්‌තෙවාසිස්‌ස භාසති තං තදෙවස්‌ස අන්‌තෙවාසී අබ්‌භනුමොදති – ‘එවමෙතං, ආචරිය, එවමෙතං, ආචරියා’’’ති. ‘‘එවමෙව ඛො ත්‌වං, මල්‌ලිකෙ, යඤ්‌ඤදෙව සමණො ගොතමො භාසති තං තදෙවස්‌ස අබ්‌භනුමොදසි’’. ‘‘සචෙතං, මහාරාජ , භගවතා භාසිතං එවමෙත’’න්‌ති. ‘‘චරපි, රෙ මල්‌ලිකෙ, විනස්‌සා’’ති. අථ ඛො මල්‌ලිකා දෙවී නාළිජඞ්‌ඝං බ්‍රාහ්‌මණං ආමන්‌තෙසි – ‘‘එහි ත්‌වං, බ්‍රාහ්‌මණ, යෙන භගවා තෙනුපසඞ්‌කම; උපසඞ්‌කමිත්‌වා මම වචනෙන භගවතො පාදෙ සිරසා වන්‌දාහි, අප්‌පාබාධං අප්‌පාතඞ්‌කං ලහුට්‌ඨානං බලං ඵාසුවිහාරං පුච්‌ඡ – ‘මල්‌ලිකා, භන්‌තෙ, දෙවී භගවතො පාදෙ සිරසා වන්‌දති, අප්‌පාබාධං අප්‌පාතඞ්‌කං ලහුට්‌ඨානං බලං ඵාසුවිහාරං පුච්‌ඡතී’ති. එවඤ්‌ච වදෙහි – ‘භාසිතා නු ඛො, භන්‌තෙ, භගවතා එසා වාචා – පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’ති . යථා තෙ භගවා බ්‍යාකරොති තං සාධුකං උග්‌ගහෙත්‌වා මම ආරොචෙය්‍යාසි. න හි තථාගතා විතථං භණන්‌තී’’ති. ‘‘එවං, භොතී’’ති ඛො නාළිජඞ්‌ඝො බ්‍රාහ්‌මණො මල්‌ලිකාය දෙවියා පටිස්‌සුත්‌වා යෙන භගවාතෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො නාළිජඞ්‌ඝො බ්‍රාහ්‌මණො භගවන්‌තං එතදවොච – ‘‘මල්‌ලිකා, භො ගොතම, දෙවී භොතො ගොතමස්‌ස පාදෙ සිරසා වන්‌දති; අප්‌පාබාධං අප්‌පාතඞ්‌කං ලහුට්‌ඨානං බලං ඵාසුවිහාරං පුච්‌ඡති; එවඤ්‌ච වදෙති – ‘භාසිතා නු ඛො, භන්‌තෙ, භගවතා එසා වාචා – පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’’’ති.
356. ‘‘එවමෙතං, බ්‍රාහ්‌මණ, එවමෙතං, බ්‍රාහ්‌මණ! පියජාතිකා හි, බ්‍රාහ්‌මණ, සොකපරිදෙවදුක්‌ඛදොමනස්‌සුපායාසා පියප්‌පභවිකාති. තදමිනාපෙතං, බ්‍රාහ්‌මණ, පරියායෙන වෙදිතබ්‌බං යථා පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා. භූතපුබ්‌බං, බ්‍රාහ්‌මණ, ඉමිස්‌සායෙව සාවත්‌ථියා අඤ්‌ඤතරිස්‌සා ඉත්‌ථියා මාතා කාලමකාසි. සා තස්‌සා කාලකිරියාය උම්‌මත්‌තිකා ඛිත්‌තචිත්‌තා රථිකාය රථිකං[රථියාය රථියං (සී. ස්‍යා. කං. පී.)] සිඞ්‌ඝාටකෙන සිඞ්‌ඝාටකං උපසඞ්‌කමිත්‌වා එවමාහ – ‘අපි මෙ මාතරං අද්‌දස්‌සථ[අද්‌දසථ (සී. පී.)], අපි මෙ මාතරං අද්‌දස්‌සථා’ති? ඉමිනාපි ඛො එතං, බ්‍රාහ්‌මණ, පරියායෙන වෙදිතබ්‌බං යථා පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකාති.
‘‘භූතපුබ්‌බං , බ්‍රාහ්‌මණ, ඉමිස්‌සායෙව සාවත්‌ථියා අඤ්‌ඤතරිස්‌සා ඉත්‌ථියා පිතා කාලමකාසි… භාතා කාලමකාසි… භගිනී කාලමකාසි… පුත්‌තො කාලමකාසි… ධීතා කාලමකාසි… සාමිකො කාලමකාසි. සා තස්‌ස කාලකිරියාය උම්‌මත්‌තිකා ඛිත්‌තචිත්‌තා රථිකාය රථිකං සිඞ්‌ඝාටකෙන සිඞ්‌ඝාටකං උපසඞ්‌කමිත්‌වා එවමාහ – ‘අපි මෙ සාමිකං අද්‌දස්‌සථ, අපි මෙ සාමිකං අද්‌දස්‌සථා’ති? ඉමිනාපි ඛො එතං, බ්‍රාහ්‌මණ, පරියායෙන වෙදිතබ්‌බං යථා පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකාති.
‘‘භූතපුබ්‌බං , බ්‍රාහ්‌මණ, ඉමිස්‌සායෙව සාවත්‌ථියා අඤ්‌ඤතරස්‌ස පුරිසස්‌ස මාතා කාලමකාසි. සො තස්‌සා කාලකිරියාය උම්‌මත්‌තකො ඛිත්‌තචිත්‌තො රථිකාය රථිකං සිඞ්‌ඝාටකෙන සිඞ්‌ඝාටකං උපසඞ්‌කමිත්‌වා එවමාහ – ‘අපි මෙ මාතරං අද්‌දස්‌සථ, අපි මෙ මාතරං අද්‌දස්‌සථා’ති ? ඉමිනාපි ඛො එතං, බ්‍රාහ්‌මණ , පරියායෙන වෙදිතබ්‌බං යථා පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකාති.
‘‘භූතපුබ්‌බං, බ්‍රාහ්‌මණ, ඉමිස්‌සායෙව සාවත්‌ථියා අඤ්‌ඤතරස්‌ස පුරිසස්‌ස පිතා කාලමකාසි… භාතා කාලමකාසි… භගිනී කාලමකාසි… පුත්‌තො කාලමකාසි… ධීතා කාලමකාසි… පජාපති කාලමකාසි. සො තස්‌සා කාලකිරියාය උම්‌මත්‌තකො ඛිත්‌තචිත්‌තො රථිකාය රථිකං සිඞ්‌ඝාටකෙන සිඞ්‌ඝාටකං උපසඞ්‌කමිත්‌වා එවමාහ – ‘අපි මෙ පජාපතිං අද්‌දස්‌සථ, අපි මෙ පජාපතිං අද්‌දස්‌සථා’ති? ඉමිනාපි ඛො එතං, බ්‍රාහ්‌මණ, පරියායෙන වෙදිතබ්‌බං යථා පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකාති.
‘‘භූතපුබ්‌බං, බ්‍රාහ්‌මණ, ඉමිස්‌සායෙව සාවත්‌ථියා අඤ්‌ඤතරා ඉත්‌ථී ඤාතිකුලං අගමාසි. තස්‌සා තෙ ඤාතකා සාමිකං[සාමිකා (සී.)] අච්‌ඡින්‌දිත්‌වා අඤ්‌ඤස්‌ස දාතුකාමා. සා ච තං න ඉච්‌ඡති. අථ ඛො සා ඉත්‌ථී සාමිකං එතදවොච – ‘ඉමෙ, මං [මම (ස්‍යා. කං. පී.)], අය්‍යපුත්‌ත, ඤාතකා ත්‌වං [තයා (සී.), තං (ස්‍යා. කං. පී.)]අච්‌ඡින්‌දිත්‌වා අඤ්‌ඤස්‌ස දාතුකාමා. අහඤ්‌ච තං න ඉච්‌ඡාමී’ති. අථ ඛො සො පුරිසො තං ඉත්‌ථිං ද්‌විධා ඡෙත්‌වා අත්‌තානං උප්‌ඵාලෙසි[උප්‌පාටෙසි (සී. පී.), ඔඵාරෙසි (ක.)] – ‘උභො පෙච්‌ච භවිස්‌සාමා’ති. ඉමිනාපි ඛො එතං, බ්‍රාහ්‌මණ, පරියායෙන වෙදිතබ්‌බං යථා පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’’ති.
357. අථ ඛො නාළිජඞ්‌ඝො බ්‍රාහ්‌මණො භගවතො භාසිතං අභිනන්‌දිත්‌වා අනුමොදිත්‌වා උට්‌ඨායාසනා යෙන මල්‌ලිකා දෙවී තෙනුපසඞ්‌කමි; උපසඞ්‌කමිත්‌වා යාවතකො අහොසි භගවතා සද්‌ධිං කථාසල්‌ලාපො තං සබ්‌බං මල්‌ලිකාය දෙවියා ආරොචෙසි. අථ ඛො මල්‌ලිකා දෙවී යෙන රාජා පසෙනදි කොසලො තෙනුපසඞ්‌කමි; උපසඞ්‌කමිත්‌වා රාජානං පසෙනදිං කොසලං එතදවොච – ‘‘තං කිං මඤ්‌ඤසි, මහාරාජ, පියා තෙ වජිරී කුමාරී’’ති? ‘‘එවං, මල්‌ලිකෙ, පියා මෙ වජිරී කුමාරී’’ති. ‘‘තං කිං මඤ්‌ඤසි, මහාරාජ, වජිරියා තෙ කුමාරියා විපරිණාමඤ්‌ඤථාභාවා උප්‌පජ්‌ජෙය්‍යුං සොකපරිදෙවදුක්‌ඛදොමනස්‌සුපායාසා’’ති? ‘‘වජිරියා මෙ, මල්‌ලිකෙ, කුමාරියා විපරිණාමඤ්‌ඤථාභාවා ජීවිතස්‌සපි සියා අඤ්‌ඤථත්‌තං, කිං පන මෙ න උප්‌පජ්‌ජිස්‌සන්‌ති සොකපරිදෙවදුක්‌ඛදොමනස්‌සුපායාසා’’ති? ‘‘ඉදං ඛො තං, මහාරාජ, තෙන භගවතා ජානතා පස්‌සතා අරහතා සම්‌මාසම්‌බුද්‌ධෙන සන්‌ධාය භාසිතං – ‘පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’ති.
‘‘තං කිං මඤ්‌ඤසි, මහාරාජ, පියා තෙ වාසභා ඛත්‌තියා’’ති? ‘‘එවං, මල්‌ලිකෙ, පියා මෙ වාසභා ඛත්‌තියා’’ති. ‘‘තං කිං මඤ්‌ඤසි, මහාරාජ, වාසභාය තෙ ඛත්‌තියාය විපරිණාමඤ්‌ඤථාභාවා උප්‌පජ්‌ජෙය්‍යුං සොකපරිදෙවදුක්‌ඛදොමනස්‌සුපායාසා’’ති? ‘‘වාසභාය මෙ, මල්‌ලිකෙ, ඛත්‌තියාය විපරිණාමඤ්‌ඤථාභාවා ජීවිතස්‌සපි සියා අඤ්‌ඤථත්‌තං, කිං පන මෙ න උප්‌පජ්‌ජිස්‌සන්‌ති සොකපරිදෙවදුක්‌ඛදොමනස්‌සුපායාසා’’ති? ‘‘ඉදං ඛො තං, මහාරාජ, තෙන භගවතා ජානතා පස්‌සතා අරහතා සම්‌මාසම්‌බුද්‌ධෙන සන්‌ධාය භාසිතං – ‘පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’ති.
‘‘තං කිං මඤ්‌ඤසි, මහාරාජ, පියො තෙ විටටූභො [විඩූඩභො (සී. ස්‍යා. කං. පී.)] සෙනාපතී’’ති? ‘‘එවං , මල්‌ලිකෙ, පියො මෙ විටටූභො සෙනාපතී’’ති. ‘‘තං කිං මඤ්‌ඤසි, මහාරාජ, විටටූභස්‌ස තෙ සෙනාපතිස්‌ස විපරිණාමඤ්‌ඤථාභාවා උප්‌පජ්‌ජෙය්‍යුං සොකපරිදෙවදුක්‌ඛදොමනස්‌සුපායාසා’’ති? ‘‘විටටූභස්‌ස මෙ, මල්‌ලිකෙ, සෙනාපතිස්‌ස විපරිණාමඤ්‌ඤථාභාවා ජීවිතස්‌සපි සියා අඤ්‌ඤථත්‌තං , කිං පන මෙ න උප්‌පජ්‌ජිස්‌සන්‌ති සොකපරිදෙවදුක්‌ඛදොමනස්‌සුපායාසා’’ති? ‘‘ඉදං ඛො තං, මහාරාජ, තෙන භගවතා ජානතා පස්‌සතා අරහතා සම්‌මාසම්‌බුද්‌ධෙන සන්‌ධාය භාසිතං – ‘පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’ති.
‘‘තං කිං මඤ්‌ඤසි, මහාරාජ, පියා තෙ අහ’’න්‌ති? ‘‘එවං, මල්‌ලිකෙ, පියා මෙසි ත්‌ව’’න්‌ති. ‘‘තං කිං මඤ්‌ඤසි, මහාරාජ, මය්‌හං තෙ විපරිණාමඤ්‌ඤථාභාවා උප්‌පජ්‌ජෙය්‍යුං සොකපරිදෙවදුක්‌ඛදොමනස්‌සුපායාසා’’ති? ‘‘තුය්‌හඤ්‌හි මෙ, මල්‌ලිකෙ, විපරිණාමඤ්‌ඤථාභාවා ජීවිතස්‌සපි සියා අඤ්‌ඤථත්‌තං, කිං පන මෙ න උප්‌පජ්‌ජිස්‌සන්‌ති සොකපරිදෙවදුක්‌ඛදොමනස්‌සුපායාසා’’ති? ‘‘ඉදං ඛො තං, මහාරාජ, තෙන භගවතා ජානතා පස්‌සතා අරහතා සම්‌මාසම්‌බුද්‌ධෙන සන්‌ධාය භාසිතං – ‘පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’ති.
‘‘තං කිං මඤ්‌ඤසි, මහාරාජ, පියා තෙ කාසිකොසලා’’ති? ‘‘එවං, මල්‌ලිකෙ, පියා මෙ කාසිකොසලා. කාසිකොසලානං, මල්‌ලිකෙ, ආනුභාවෙන කාසිකචන්‌දනං පච්‌චනුභොම, මාලාගන්‌ධවිලෙපනං ධාරෙමා’’ති. ‘‘තං කිං මඤ්‌ඤසි, මහාරාජ, කාසිකොසලානං තෙ විපරිණාමඤ්‌ඤථාභාවා උප්‌පජ්‌ජෙය්‍යුං සොකපරිදෙවදුක්‌ඛදොමනස්‌සුපායාසා’’ති? ‘‘කාසිකොසලානඤ්‌හි, මල්‌ලිකෙ , විපරිණාමඤ්‌ඤථාභාවා ජීවිතස්‌සපි සියා අඤ්‌ඤථත්‌තං, කිං පන මෙ න උප්‌පජ්‌ජිස්‌සන්‌ති සොකපරිදෙවදුක්‌ඛදොමනස්‌සුපායාසා’’ති? ‘‘ඉදං ඛො තං, මහාරාජ, තෙන භගවතා ජානතා පස්‌සතා අරහතා සම්‌මාසම්‌බුද්‌ධෙන සන්‌ධාය භාසිතං – ‘පියජාතිකා සොකපරිදෙවදුක්‌ඛදොමනස්‌සුපායාසා පියප්‌පභවිකා’’’ති.
‘‘අච්‌ඡරියං, මල්‌ලිකෙ, අබ්‌භුතං, මල්‌ලිකෙ! යාවඤ්‌ච සො භගවා පඤ්‌ඤාය අතිවිජ්‌ඣ මඤ්‌ඤෙ [පටිවිජ්‌ඣ පඤ්‌ඤාය (ක.)] පස්‌සති. එහි, මල්‌ලිකෙ, ආචමෙහී’’ති[ආචාමෙහීති (සී. පී.)]. අථ ඛො රාජා පසෙනදි කොසලො උට්‌ඨායාසනා එකංසං උත්‌තරාසඞ්‌ගං කරිත්‌වා යෙන භගවා තෙනඤ්‌ජලිං පණාමෙත්‌වා තික්‌ඛත්‌තුං උදානං උදානෙසි – ‘‘නමො තස්‌ස භගවතො අරහතො සම්‌මාසම්‌බුද්‌ධස්‌ස, නමො තස්‌ස භගවතො අරහතො සම්‌මාසම්‌බුද්‌ධස්‌ස, නමො තස්‌ස භගවතො අරහතො සම්‌මාසම්‌බුද්‌ධස්‌සා’’ති.
පියජාතිකසුත්‌තං නිට්‌ඨිතං සත්‌තමං.
No comments:
Post a Comment