9. මහාඅස්‌සපුරසුත්‌තං
මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න
සිංහල පරිවර්ථනය සදහා font මෙතැනින් ලබාගන්න
415. එවං මෙ සුතං – එකං සමයං භගවා අඞ්‌ගෙසු විහරති අස්‌සපුරං නාම අඞ්‌ගානං නිගමො. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
‘‘සමණා සමණාති වො, භික්‌ඛවෙ, ජනො සඤ්‌ජානාති. තුම්‌හෙ ච පන ‘කෙ තුම්‌හෙ’ති පුට්‌ඨා සමානා ‘සමණාම්‌හා’ති පටිජානාථ; තෙසං වො, භික්‌ඛවෙ, එවංසමඤ්‌ඤානං සතං එවංපටිඤ්‌ඤානං සතං ‘යෙ ධම්‌මා සමණකරණා ච බ්‍රාහ්‌මණකරණා ච තෙ ධම්‌මෙ සමාදාය වත්‌තිස්‌සාම, එවං නො අයං අම්‌හාකං සමඤ්‌ඤා ච සච්‌චා භවිස්‌සති පටිඤ්‌ඤා ච භූතා. යෙසඤ්‌ච මයං චීවරපිණ්‌ඩපාතසෙනාසනගිලානප්‌පච්‌චයභෙසජ්‌ජපරික්‌ඛාරං පරිභුඤ්‌ජාම, තෙසං තෙ කාරා අම්‌හෙසු මහප්‌ඵලා භවිස්‌සන්‌ති මහානිසංසා, අම්‌හාකඤ්‌චෙවායං පබ්‌බජ්‌ජා අවඤ්‌ඣා භවිස්‌සති සඵලා සඋද්‍රයා’ති. එවඤ්‌හි වො, භික්‌ඛවෙ, සික්‌ඛිතබ්‌බං.
416. ‘‘කතමෙ ච, භික්‌ඛවෙ, ධම්‌මා සමණකරණා ච බ්‍රාහ්‌මණකරණා ච? ‘හිරොත්‌තප්‌පෙන සමන්‌නාගතා භවිස්‌සාමා’ති එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා , අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති තාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො, භික්‌ඛවෙ , පටිවෙදයාමි වො, භික්‌ඛවෙ – ‘මා වො සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි, සති උත්‌තරිං කරණීයෙ’.
417. ‘‘කිඤ්‌ච, භික්‌ඛවෙ, උත්‌තරිං කරණීයං? ‘පරිසුද්‌ධො නො කායසමාචාරො භවිස්‌සති උත්‌තානො විවටො න ච ඡිද්‌දවා සංවුතො ච. තාය ච පන පරිසුද්‌ධකායසමාචාරතාය නෙවත්‌තානුක්‌කංසෙස්‌සාම න පරං වම්‌භෙස්‌සාමා’ති[නෙවත්‌තානුක්‌කංසිස්‌සාම න පරං වම්‌භිස්‌සාමාති (සබ්‌බත්‌ථ)] එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති තාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො, භික්‌ඛවෙ, පටිවෙදයාමි වො, භික්‌ඛවෙ – ‘මා වො සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි, සති උත්‌තරිං කරණීයෙ’.
418. ‘‘කිඤ්‌ච, භික්‌ඛවෙ, උත්‌තරිං කරණීයං? ‘පරිසුද්‌ධො නො වචීසමාචාරො භවිස්‌සති උත්‌තානො විවටො න ච ඡිද්‌දවා සංවුතො ච. තාය ච පන පරිසුද්‌ධවචීසමාචාරතාය නෙවත්‌තානුක්‌කංසෙස්‌සාම න පරං වම්‌භෙස්‌සාමා’ති එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො, පරිසුද්‌ධො වචීසමාචාරො; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති තාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො , භික්‌ඛවෙ, පටිවෙදයාමි වො, භික්‌ඛවෙ – ‘මා වො සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි, සති උත්‌තරිං කරණීයෙ’.
419. ‘‘කිඤ්‌ච, භික්‌ඛවෙ, උත්‌තරිං කරණීයං? ‘පරිසුද්‌ධො නො මනොසමාචාරො භවිස්‌සති උත්‌තානො විවටො න ච ඡිද්‌දවා සංවුතො ච. තාය ච පනපරිසුද්‌ධමනොසමාචාරතාය නෙවත්‌තානුක්‌කංසෙස්‌සාම න පරං වම්‌භෙස්‌සාමා’ති එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො, පරිසුද්‌ධො වචීසමාචාරො, පරිසුද්‌ධො මනොසමාචාරො; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති තාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො, භික්‌ඛවෙ, පටිවෙදයාමි වො, භික්‌ඛවෙ – ‘මා වො සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි, සති උත්‌තරිං කරණීයෙ’.
420. ‘‘කිඤ්‌ච, භික්‌ඛවෙ, උත්‌තරිං කරණීයං? ‘පරිසුද්‌ධො නො ආජීවො භවිස්‌සති උත්‌තානො විවටො න ච ඡිද්‌දවා සංවුතො ච. තාය ච පන පරිසුද්‌ධාජීවතාය නෙවත්‌තානුක්‌කංසෙස්‌සාම න පරං වම්‌භෙස්‌සාමා’ති එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො, පරිසුද්‌ධො වචීසමාචාරො, පරිසුද්‌ධො මනොසමාචාරො, පරිසුද්‌ධො ආජීවො; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො , නත්‌ථි නො කිඤ්‌චි උත්‌තරිං කරණීය’න්‌තිතාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො, භික්‌ඛවෙ, පටිවෙදයාමි වො, භික්‌ඛවෙ – ‘මා වො සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි, සති උත්‌තරිං කරණීයෙ’.
421. ‘‘කිඤ්‌ච, භික්‌ඛවෙ, උත්‌තරිං කරණීයං? ‘ඉන්‌ද්‍රියෙසු ගුත්‌තද්‌වාරා භවිස්‌සාම; චක්‌ඛුනා රූපං දිස්‌වා න නිමිත්‌තග්‌ගාහී නානුබ්‍යඤ්‌ජනග්‌ගාහී. යත්‌වාධිකරණමෙනං චක්‌ඛුන්‌ද්‍රියං අසංවුතං විහරන්‌තං අභිජ්‌ඣාදොමනස්‌සා පාපකා අකුසලා ධම්‌මා අන්‌වාස්‌සවෙය්‍යුං, තස්‌ස සංවරාය පටිපජ්‌ජිස්‌සාම, රක්‌ඛිස්‌සාම චක්‌ඛුන්‌ද්‍රියං, චක්‌ඛුන්‌ද්‍රියෙ සංවරං ආපජ්‌ජිස්‌සාම. සොතෙන සද්‌දං සුත්‌වා…පෙ.… ඝානෙන ගන්‌ධං ඝායිත්‌වා…පෙ.… ජිව්‌හාය රසං සායිත්‌වා…පෙ.… කායෙන ඵොට්‌ඨබ්‌බං ඵුසිත්‌වා…පෙ.… මනසා ධම්‌මං විඤ්‌ඤාය න නිමිත්‌තග්‌ගාහී නානුබ්‍යඤ්‌ජනග්‌ගාහී. යත්‌වාධිකරණමෙනං මනින්‌ද්‍රියං අසංවුතං විහරන්‌තං අභිජ්‌ඣාදොමනස්‌සා පාපකා අකුසලා ධම්‌මා අන්‌වාස්‌සවෙය්‍යුං, තස්‌ස සංවරාය පටිපජ්‌ජිස්‌සාම, රක්‌ඛිස්‌සාම මනින්‌ද්‍රියං, මනින්‌ද්‍රියෙ සංවරං ආපජ්‌ජිස්‌සාමා’ති එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො, පරිසුද්‌ධො වචීසමාචාරො, පරිසුද්‌ධො මනොසමාචාරො, පරිසුද්‌ධො ආජීවො, ඉන්‌ද්‍රියෙසුම්‌හ ගුත්‌තද්‌වාරා; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති තාවතකෙනෙව තුට්‌ඨිංආපජ්‌ජෙය්‍යාථ. ආරොචයාමි වො, භික්‌ඛවෙ, පටිවෙදයාමි වො, භික්‌ඛවෙ – ‘මා වො සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි, සති උත්‌තරිං කරණීයෙ’.
422. ‘‘කිඤ්‌ච, භික්‌ඛවෙ, උත්‌තරිං කරණීයං? ‘භොජනෙ මත්‌තඤ්‌ඤුනො භවිස්‌සාම, පටිසඞ්‌ඛා යොනිසො ආහාරං ආහරිස්‌සාම, නෙව දවාය න මදාය න මණ්‌ඩනාය න විභූසනාය යාවදෙව ඉමස්‌ස කායස්‌ස ඨිතියා යාපනාය, විහිංසූපරතියා, බ්‍රහ්‌මචරියානුග්‌ගහාය, ඉති පුරාණඤ්‌ච වෙදනං පටිහඞ්‌ඛාම නවඤ්‌ච වෙදනං න උප්‌පාදෙස්‌සාම, යාත්‍රා ච නො භවිස්‌සති, අනවජ්‌ජතා ච, ඵාසු විහාරො චා’ති එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො, පරිසුද්‌ධො වචීසමාචාරො, පරිසුද්‌ධො මනොසමාචාරො, පරිසුද්‌ධො ආජීවො, ඉන්‌ද්‍රියෙසුම්‌හ ගුත්‌තද්‌වාරා, භොජනෙ මත්‌තඤ්‌ඤුනො; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති තාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො, භික්‌ඛවෙ, පටිවෙදයාමි වො, භික්‌ඛවෙ – ‘මා වො, සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි සති උත්‌තරිං කරණීයෙ’.
423. ‘‘කිඤ්‌ච , භික්‌ඛවෙ, උත්‌තරිං කරණීයං? ‘ජාගරියං අනුයුත්‌තා භවිස්‌සාම, දිවසං චඞ්‌කමෙන නිසජ්‌ජාය ආවරණීයෙහි ධම්‌මෙහි චිත්‌තං පරිසොධෙස්‌සාම. රත්‌තියා පඨමං යාමං චඞ්‌කමෙන නිසජ්‌ජාය ආවරණීයෙහි ධම්‌මෙහි චිත්‌තං පරිසොධෙස්‌සාම. රත්‌තියා මජ්‌ඣිමං යාමං දක්‌ඛිණෙන පස්‌සෙන සීහසෙය්‍යං කප්‌පෙස්‌සාම පාදෙ පාදං අච්‌චාධාය, සතො සම්‌පජානො උට්‌ඨානසඤ්‌ඤං මනසි කරිත්‌වා. රත්‌තියා පච්‌ඡිමං යාමං පච්‌චුට්‌ඨාය චඞ්‌කමෙන නිසජ්‌ජාය ආවරණීයෙහි ධම්‌මෙහි චිත්‌තං පරිසොධෙස්‌සාමා’ති, එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො, පරිසුද්‌ධො වචීසමාචාරො, පරිසුද්‌ධො මනොසමාචාරො, පරිසුද්‌ධො ආජීවො, ඉන්‌ද්‍රියෙසුම්‌හ ගුත්‌තද්‌වාරා, භොජනෙ මත්‌තඤ්‌ඤුනො, ජාගරියං අනුයුත්‌තා; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති, තාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො, භික්‌ඛවෙ, පටිවෙදයාමි වො, භික්‌ඛවෙ – ‘මා වො, සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි සති උත්‌තරිං කරණීයෙ’.
424. ‘‘කිඤ්‌ච, භික්‌ඛවෙ, උත්‌තරිං කරණීයං? ‘සතිසම්‌පජඤ්‌ඤෙන සමන්‌නාගතා භවිස්‌සාම, අභික්‌කන්‌තෙ පටික්‌කන්‌තෙ සම්‌පජානකාරී, ආලොකිතෙ විලොකිතෙ සම්‌පජානකාරී, සමිඤ්‌ජිතෙ පසාරිතෙ සම්‌පජානකාරී, සඞ්‌ඝාටිපත්‌තචීවරධාරණෙ සම්‌පජානකාරී, අසිතෙ පීතෙ ඛායිතෙ සායිතෙ සම්‌පජානකාරී, උච්‌චාරපස්‌සාවකම්‌මෙ සම්‌පජානකාරී, ගතෙ ඨිතෙ නිසින්‌නෙ සුත්‌තෙ ජාගරිතෙ භාසිතෙ තුණ්‌හීභාවෙ සම්‌පජානකාරී’ති, එවඤ්‌හි වො, භික්‌ඛවෙ, සික්‌ඛිතබ්‌බං. සියා ඛො පන, භික්‌ඛවෙ, තුම්‌හාකං එවමස්‌ස – ‘හිරොත්‌තප්‌පෙනම්‌හ සමන්‌නාගතා, පරිසුද්‌ධො නො කායසමාචාරො, පරිසුද්‌ධො වචීසමාචාරො, පරිසුද්‌ධො මනොසමාචාරො, පරිසුද්‌ධො ආජීවො, ඉන්‌ද්‍රියෙසුම්‌හ ගුත්‌තද්‌වාරා, භොජනෙ මත්‌තඤ්‌ඤුනො, ජාගරියං අනුයුත්‌තා, සතිසම්‌පජඤ්‌ඤෙන සමන්‌නාගතා; අලමෙත්‌තාවතා කතමෙත්‌තාවතා, අනුප්‌පත්‌තො නො සාමඤ්‌ඤත්‌ථො, නත්‌ථි නො කිඤ්‌චි උත්‌තරිං කරණීය’න්‌ති තාවතකෙනෙව තුට්‌ඨිං ආපජ්‌ජෙය්‍යාථ. ආරොචයාමි වො, භික්‌ඛවෙ, පටිවෙදයාමි වො, භික්‌ඛවෙ – ‘මා වො, සාමඤ්‌ඤත්‌ථිකානං සතං සාමඤ්‌ඤත්‌ථො පරිහායි සති උත්‌තරිං කරණීයෙ’.
425. ‘‘කිඤ්‌ච, භික්‌ඛවෙ, උත්‌තරිං කරණීයං? ඉධ, භික්‌ඛවෙ, භික්‌ඛු විවිත්‌තං සෙනාසනං භජති – අරඤ්‌ඤං රුක්‌ඛමූලං පබ්‌බතං කන්‌දරං ගිරිගුහං සුසානං වනප්‌පත්‌ථං අබ්‌භොකාසං පලාලපුඤ්‌ජං. සො පච්‌ඡාභත්‌තං පිණ්‌ඩපාතපටික්‌කන්‌තො නිසීදති පල්‌ලඞ්‌කං ආභුජිත්‌වා, උජුං කායං පණිධාය පරිමුඛං සතිං උපට්‌ඨපෙත්‌වා. සො අභිජ්‌ඣං ලොකෙ පහාය විගතාභිජ්‌ඣෙන චෙතසා විහරති, අභිජ්‌ඣාය චිත්‌තං පරිසොධෙති; බ්‍යාපාදපදොසං පහාය අබ්‍යාපන්‌නචිත්‌තො විහරති, සබ්‌බපාණභූතහිතානුකම්‌පී , බ්‍යාපාදපදොසා චිත්‌තං පරිසොධෙති; ථීනමිද්‌ධං පහාය විගතථීනමිද්‌ධො විහරති, ආලොකසඤ්‌ඤී සතො සම්‌පජානො, ථීනමිද්‌ධා චිත්‌තං පරිසොධෙති; උද්‌ධච්‌චකුක්‌කුච්‌චං පහාය අනුද්‌ධතො විහරති , අජ්‌ඣත්‌තං වූපසන්‌තචිත්‌තො, උද්‌ධච්‌චකුක්‌කුච්‌චා චිත්‌තං පරිසොධෙති; විචිකිච්‌ඡං පහාය තිණ්‌ණවිචිකිච්‌ඡො විහරති, අකථංකථී කුසලෙසු ධම්‌මෙසු, විචිකිච්‌ඡාය චිත්‌තං පරිසොධෙති.
426. ‘‘සෙය්‍යථාපි , භික්‌ඛවෙ, පුරිසො ඉණං ආදාය කම්‌මන්‌තෙ පයොජෙය්‍ය. තස්‌ස තෙ කම්‌මන්‌තා සමිජ්‌ඣෙය්‍යුං[සම්‌පජ්‌ජෙය්‍යුං (ස්‍යා. කං. ක.)]. සො යානි ච පොරාණානි ඉණමූලානි තානි ච බ්‍යන්‌තී [බ්‍යන්‌තිං (ක.), බ්‍යන්‌ති (පී.)] කරෙය්‍ය, සියා චස්‌ස උත්‌තරිං අවසිට්‌ඨං දාරභරණාය. තස්‌ස එවමස්‌ස – ‘අහං ඛො පුබ්‌බෙ ඉණං ආදාය කම්‌මන්‌තෙ පයොජෙසිං, තස්‌ස මෙ තෙ කම්‌මන්‌තා සමිජ්‌ඣිංසු. සොහං යානි ච පොරාණානි ඉණමූලානි තානි ච බ්‍යන්‌තී අකාසිං, අත්‌ථි ච මෙ උත්‌තරිං අවසිට්‌ඨං දාරභරණායා’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.
‘‘සෙය්‍යථාපි, භික්‌ඛවෙ, පුරිසො ආබාධිකො අස්‌ස දුක්‌ඛිතො බාළ්‌හගිලානො, භත්‌තඤ්‌චස්‌ස නච්‌ඡාදෙය්‍ය, න චස්‌ස කායෙ බලමත්‌තා. සො අපරෙන සමයෙන තම්‌හා ආබාධා මුච්‌චෙය්‍ය, භත්‌තඤ්‌චස්‌ස ඡාදෙය්‍ය, සියා චස්‌ස කායෙ බලමත්‌තා. තස්‌ස එවමස්‌ස – ‘අහං ඛො පුබ්‌බෙ ආබාධිකො අහොසිං දුක්‌ඛිතො බාළ්‌හගිලානො, භත්‌තඤ්‌ච මෙ නච්‌ඡාදෙසි, න ච මෙ ආසි කායෙ බලමත්‌තා, සොම්‌හි එතරහි තම්‌හා ආබාධා මුත්‌තො, භත්‌තඤ්‌ච මෙ ඡාදෙති, අත්‌ථි ච මෙ කායෙ බලමත්‌තා’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.
‘‘සෙය්‍යථාපි, භික්‌ඛවෙ, පුරිසො බන්‌ධනාගාරෙ බද්‌ධො අස්‌ස. සො අපරෙන සමයෙන තම්‌හා බන්‌ධනා මුච්‌චෙය්‍ය සොත්‌ථිනා අබ්‌භයෙන [අබ්‍යයෙන (සී. පී.)], න චස්‌ස කිඤ්‌චි භොගානං වයො. තස්‌ස එවමස්‌ස – ‘අහං ඛො පුබ්‌බෙ බන්‌ධනාගාරෙ බද්‌ධො අහොසිං, සොම්‌හි එතරහි තම්‌හා බන්‌ධනා මුත්‌තො, සොත්‌ථිනා අබ්‌භයෙන, නත්‌ථි ච මෙ කිඤ්‌චි භොගානං වයො’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.
‘‘සෙය්‍යථාපි , භික්‌ඛවෙ, පුරිසො දාසො අස්‌ස අනත්‌තාධීනො පරාධීනො න යෙනකාමංගමො. සො අපරෙන සමයෙන තම්‌හා දාසබ්‍යා මුච්‌චෙය්‍ය අත්‌තාධීනො අපරාධීනො භුජිස්‌සො යෙනකාමංගමො. තස්‌ස එවමස්‌ස – ‘අහං ඛො පුබ්‌බෙ දාසො අහොසිං අනත්‌තාධීනො පරාධීනො න යෙනකාමංගමො, සොම්‌හි එතරහි තම්‌හා දාසබ්‍යා මුත්‌තො අත්‌තාධීනො අපරාධීනො භුජිස්‌සො යෙනකාමංගමො’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.
‘‘සෙය්‍යථාපි, භික්‌ඛවෙ, පුරිසො සධනො සභොගො කන්‌තාරද්‌ධානමග්‌ගං පටිපජ්‌ජෙය්‍ය [සීලක්‌ඛන්‌ධවග්‌ගපාළියා කිඤ්‌චි විසදිසං]. සො අපරෙන සමයෙන තම්‌හා කන්‌තාරා නිත්‌ථරෙය්‍ය සොත්‌ථිනා අබ්‌භයෙන, න චස්‌ස කිඤ්‌චි භොගානං වයො. තස්‌ස එවමස්‌ස – ‘අහං ඛො පුබ්‌බෙ සධනො සභොගො කන්‌තාරද්‌ධානමග්‌ගං පටිපජ්‌ජිං. සොම්‌හි එතරහි තම්‌හා කන්‌තාරා නිත්‌ථිණ්‌ණො සොත්‌ථිනා අබ්‌භයෙන, නත්‌ථි ච මෙ කිඤ්‌චි භොගානං වයො’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.
‘‘එවමෙව ඛො, භික්‌ඛවෙ, භික්‌ඛු යථා ඉණං යථා රොගං යථා බන්‌ධනාගාරං යථා දාසබ්‍යං යථා කන්‌තාරද්‌ධානමග්‌ගං, ඉමෙ පඤ්‌ච නීවරණෙ අප්‌පහීනෙ අත්‌තනි සමනුපස්‌සති. සෙය්‍යථාපි, භික්‌ඛවෙ, ආණණ්‍යං යථා ආරොග්‍යං යථා බන්‌ධනාමොක්‌ඛං යථා භුජිස්‌සං යථා ඛෙමන්‌තභූමිං; එවමෙව භික්‌ඛු ඉමෙ පඤ්‌ච නීවරණෙපහීනෙ අත්‌තනි සමනුපස්‌සති.
427. ‘‘සො ඉමෙ පඤ්‌ච නීවරණෙ පහාය චෙතසො උපක්‌කිලෙසෙ පඤ්‌ඤාය දුබ්‌බලීකරණෙ, විවිච්‌චෙව කාමෙහි විවිච්‌ච අකුසලෙහි ධම්‌මෙහි, සවිතක්‌කං සවිචාරං විවෙකජං පීතිසුඛං පඨමං ඣානං උපසම්‌පජ්‌ජ විහරති. සො ඉමමෙව කායං විවෙකජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස විවෙකජෙන පීතිසුඛෙන අප්‌ඵුටං හොති. සෙය්‍යථාපි, භික්‌ඛවෙ, දක්‌ඛො න්‌හාපකො[නහාපකො (සී. ස්‍යා. කං. පී.)] වා න්‌හාපකන්‌තෙවාසී වා කංසථාලෙ න්‌හානීයචුණ්‌ණානි [නහානීයචුණ්‌ණානි (සී. ස්‍යා. කං. පී.)] ආකිරිත්‌වා උදකෙන පරිප්‌ඵොසකං පරිප්‌ඵොසකං සන්‌නෙය්‍ය. සායං න්‌හානීයපිණ්‌ඩි ස්‌නෙහානුගතා ස්‌නෙහපරෙතා සන්‌තරබාහිරා, ඵුටා ස්‌නෙහෙන න ච පග්‌ඝරිණී. එවමෙව ඛො, භික්‌ඛවෙ, භික්‌ඛු ඉමමෙව කායං විවෙකජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස විවෙකජෙන පීතිසුඛෙන අප්‌ඵුටං හොති.
428. ‘‘පුන චපරං, භික්‌ඛවෙ, භික්‌ඛු විතක්‌කවිචාරානං වූපසමා අජ්‌ඣත්‌තං සම්‌පසාදනං චෙතසො එකොදිභාවං අවිතක්‌කං අවිචාරං සමාධිජං පීතිසුඛං දුතියං ඣානං උපසම්‌පජ්‌ජ විහරති. සො ඉමමෙව කායං සමාධිජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස සමාධිජෙන පීතිසුඛෙන අප්‌ඵුටං හොති. සෙය්‍යථාපි, භික්‌ඛවෙ, උදකරහදො උබ්‌භිදොදකො [උබ්‌භිතොදකො (ක.)]. තස්‌සනෙවස්‌ස පුරත්‌ථිමාය දිසාය උදකස්‌ස ආයමුඛං, න පච්‌ඡිමාය දිසාය උදකස්‌ස ආයමුඛං, න උත්‌තරාය දිසාය උදකස්‌ස ආයමුඛං, න දක්‌ඛිණාය දිසාය උදකස්‌ස ආයමුඛං, දෙවො ච න කාලෙන කාලං සම්‌මාධාරං අනුප්‌පවෙච්‌ඡෙය්‍ය. අථ ඛො තම්‌හාව උදකරහදා සීතා වාරිධාරා උබ්‌භිජ්‌ජිත්‌වා තමෙව උදකරහදං සීතෙන වාරිනා අභිසන්‌දෙය්‍ය පරිසන්‌දෙය්‍ය පරිපූරෙය්‍ය පරිප්‌ඵරෙය්‍ය, නාස්‌ස කිඤ්‌චි සබ්‌බාවතො උදකරහදස්‌ස සීතෙන වාරිනා අප්‌ඵුටං අස්‌ස. එවමෙව ඛො, භික්‌ඛවෙ, භික්‌ඛු ඉමමෙව කායං සමාධිජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස සමාධිජෙන පීතිසුඛෙන අප්‌ඵුටං හොති.
429. ‘‘පුන චපරං, භික්‌ඛවෙ, භික්‌ඛු පීතියා ච විරාගා උපෙක්‌ඛකො ච විහරති, සතො ච සම්‌පජානො, සුඛඤ්‌ච කායෙන පටිසංවෙදෙති, යං තං අරියා ආචික්‌ඛන්‌ති – ‘උපෙක්‌ඛකො සතිමා සුඛවිහාරී’ති තතියං ඣානං උපසම්‌පජ්‌ජ විහරති. සො ඉමමෙව කායං නිප්‌පීතිකෙන සුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස නිප්‌පීතිකෙන සුඛෙන අප්‌ඵුටං හොති. සෙය්‍යථාපි, භික්‌ඛවෙ, උප්‌පලිනියං වා පදුමිනියං වා පුණ්‌ඩරීකිනියං වා අප්‌පෙකච්‌චානි උප්‌පලානි වා පදුමානි වා පුණ්‌ඩරීකානි වා උදකෙ ජාතානි උදකෙ සංවඩ්‌ඪානි උදකානුග්‌ගතානි අන්‌තොනිමුග්‌ගපොසීනි, තානි යාව චග්‌ගා යාව ච මූලා සීතෙන වාරිනා අභිසන්‌නානි පරිසන්‌නානි පරිපූරානි පරිප්‌ඵුටානි, නාස්‌ස [න නෙසං (සී.)] කිඤ්‌චි සබ්‌බාවතං උප්‌පලානං වා පදුමානං වා පුණ්‌ඩරීකානං වා සීතෙන වාරිනා අප්‌ඵුටං අස්‌ස. එවමෙව ඛො, භික්‌ඛවෙ, භික්‌ඛු ඉමමෙව කායං නිප්‌පීතිකෙන සුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස නිප්‌පීතිකෙන සුඛෙන අප්‌ඵුටං හොති.
430. ‘‘පුන චපරං, භික්‌ඛවෙ, භික්‌ඛු සුඛස්‌ස ච පහානා දුක්‌ඛස්‌ස ච පහානා, පුබ්‌බෙව සොමනස්‌සදොමනස්‌සානං අත්‌ථඞ්‌ගමා, අදුක්‌ඛමසුඛං උපෙක්‌ඛාසතිපාරිසුද්‌ධිං චතුත්‌ථං ඣානං උපසම්‌පජ්‌ජ විහරති. සො ඉමමෙව කායං පරිසුද්‌ධෙන චෙතසා පරියොදාතෙන ඵරිත්‌වා නිසින්‌නො හොති , නාස්‌ස කිඤ්‌චි සබ්‌බාවතො කායස්‌ස පරිසුද්‌ධෙන චෙතසා පරියොදාතෙන අප්‌ඵුටං හොති. සෙය්‍යථාපි, භික්‌ඛවෙ, පුරිසො ඔදාතෙන වත්‌ථෙන සසීසං පාරුපෙත්‌වා නිසින්‌නො අස්‌ස, නාස්‌ස කිඤ්‌චි සබ්‌බාවතො කායස්‌ස ඔදාතෙන වත්‌ථෙන අප්‌ඵුටං අස්‌ස. එවමෙව ඛො, භික්‌ඛවෙ, භික්‌ඛු ඉමමෙව කායං පරිසුද්‌ධෙන චෙතසා පරියොදාතෙන ඵරිත්‌වා නිසින්‌නො හොති, නාස්‌ස කිඤ්‌චි සබ්‌බාවතො කායස්‌ස පරිසුද්‌ධෙන චෙතසා පරියොදාතෙන අප්‌ඵුටං හොති.
431. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ පුබ්‌බෙනිවාසානුස්‌සතිඤාණාය චිත්‌තං අභිනින්‌නාමෙති. සො අනෙකවිහිතං පුබ්‌බෙනිවාසං අනුස්‌සරති, සෙය්‍යථිදං – එකම්‌පි ජාතිං, ද්‌වෙපි ජාතියො…පෙ.… ඉති සාකාරං සඋද්‌දෙසං අනෙකවිහිතං පුබ්‌බෙනිවාසං අනුස්‌සරති. සෙය්‍යථාපි, භික්‌ඛවෙ, පුරිසො සකම්‌හා ගාමා අඤ්‌ඤං ගාමං ගච්‌ඡෙය්‍ය, තම්‌හාපි ගාමා අඤ්‌ඤං ගාමං ගච්‌ඡෙය්‍ය, සො තම්‌හා ගාමා සකංයෙව ගාමං පච්‌චාගච්‌ඡෙය්‍ය. තස්‌ස එවමස්‌ස – ‘අහං ඛො සකම්‌හා ගාමා අමුං ගාමං අගච්‌ඡිං [අගච්‌ඡිං (සී. ස්‍යා. කං. පී.)], තත්‍රපි එවං අට්‌ඨාසිං එවං නිසීදිං එවං අභාසිං එවං තුණ්‌හී අහොසිං; තම්‌හාපි ගාමා අමුං ගාමං අගච්‌ඡිං, තත්‍රපි එවං අට්‌ඨාසිං එවං නිසීදිං එවං අභාසිං එවං තුණ්‌හී අහොසිං; සොම්‌හි තම්‌හා ගාමා සකංයෙව ගාමං පච්‌චාගතො’ති. එවමෙව ඛො, භික්‌ඛවෙ, භික්‌ඛු අනෙකවිහිතං පුබ්‌බෙනිවාසං අනුස්‌සරති, සෙය්‍යථිදං – එකම්‌පි ජාතිං ද්‌වෙපි ජාතියො…පෙ.… ඉති සාකාරං සඋද්‌දෙසං අනෙකවිහිතං පුබ්‌බෙනිවාසං අනුස්‌සරති.
432. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ සත්‌තානං චුතූපපාතඤාණාය චිත්‌තං අභිනින්‌නාමෙති. සො දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ හීනෙ පණීතෙසුවණ්‌ණෙ දුබ්‌බණ්‌ණෙ, සුගතෙ දුග්‌ගතෙ, යථාකම්‌මූපගෙ සත්‌තෙ පජානාති…පෙ.… සෙය්‍යථාපි, භික්‌ඛවෙ, ද්‌වෙ අගාරා සද්‌වාරා [සන්‌නද්‌වාරා (ක.)]. තත්‌ථ චක්‌ඛුමා පුරිසො මජ්‌ඣෙ ඨිතො පස්‌සෙය්‍ය මනුස්‌සෙ ගෙහං පවිසන්‌තෙපි නික්‌ඛමන්‌තෙපි, අනුචඞ්‌කමන්‌තෙපි අනුවිචරන්‌තෙපි . එවමෙව ඛො, භික්‌ඛවෙ, භික්‌ඛු දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ හීනෙ පණීතෙ සුවණ්‌ණෙ දුබ්‌බණ්‌ණෙ, සුගතෙ දුග්‌ගතෙ යථාකම්‌මූපගෙ සත්‌තෙ පජානාති…පෙ.….
433. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙඨිතෙ ආනෙඤ්‌ජප්‌පත්‌තෙ ආසවානං ඛයඤාණාය චිත්‌තං අභිනින්‌නාමෙති. සො ‘ඉදං දුක්‌ඛ’න්‌ති යථාභූතං පජානාති, ‘අයං දුක්‌ඛසමුදයො’ති යථාභූතං පජානාති, ‘අයං දුක්‌ඛනිරොධො’ති යථාභූතං පජානාති, ‘අයං දුක්‌ඛනිරොධගාමිනී පටිපදා’ති යථාභූතං පජානාති. ‘ඉමෙ ආසවා’ති යථාභූතං පජානාති, ‘අයං ආසවසමුදයො’ති යථාභූතං පජානාති, ‘අයං ආසවනිරොධො’ති යථාභූතං පජානාති, ‘අයං ආසවනිරොධගාමිනී පටිපදා’ති යථාභූතං පජානාති. තස්‌ස එවං ජානතො එවං පස්‌සතො කාමාසවාපි චිත්‌තං විමුච්‌චති, භවාසවාපි චිත්‌තං විමුච්‌චති, අවිජ්‌ජාසවාපි චිත්‌තං විමුච්‌චති. විමුත්‌තස්‌මිං විමුත්‌තමිති ඤාණං හොති – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාති.
‘‘සෙය්‍යථාපි, භික්‌ඛවෙ, පබ්‌බතසඞ්‌ඛෙපෙ උදකරහදො අච්‌ඡො විප්‌පසන්‌නො අනාවිලො. තත්‌ථ චක්‌ඛුමා පුරිසො තීරෙ ඨිතො පස්‌සෙය්‍ය සිප්‌පිසම්‌බුකම්‌පි[සිප්‌පිකසම්‌බුකම්‌පි (ස්‍යා. කං. ක.)] සක්‌ඛරකථලම්‌පි මච්‌ඡගුම්‌බම්‌පි, චරන්‌තම්‌පි තිට්‌ඨන්‌තම්‌පි. තස්‌ස එවමස්‌ස – ‘අයං ඛො උදකරහදො අච්‌ඡො විප්‌පසන්‌නො අනාවිලො. තත්‍රිමෙ සිප්‌පිසම්‌බුකාපි සක්‌ඛරකථලාපි මච්‌ඡගුම්‌බාපි චරන්‌තිපි තිට්‌ඨන්‌තිපීති . එවමෙව ඛො, භික්‌ඛවෙ, භික්‌ඛු ‘ඉදං දුක්‌ඛ’න්‌ති යථාභූතං පජානාති…පෙ.… නාපරං ඉත්‌ථත්‌තායාති පජානාති.
434. ‘‘අයං වුච්‌චති, භික්‌ඛවෙ, භික්‌ඛු ‘සමණො’ ඉතිපි ‘බ්‍රාහ්‌මණො’ඉතිපි ‘න්‌හාතකො’ඉතිපි ‘වෙදගූ’ඉතිපි ‘සොත්‌තියො’ඉතිපි ‘අරියො’ඉතිපි ‘අරහං’ඉතිපි. කථඤ්‌ච, භික්‌ඛවෙ, භික්‌ඛු සමණො හොති? සමිතාස්‌ස හොන්‌ති පාපකා අකුසලා ධම්‌මා, සංකිලෙසිකා, පොනොබ්‌භවිකා, සදරා, දුක්‌ඛවිපාකා , ආයතිං, ජාතිජරාමරණියා. එවං ඛො, භික්‌ඛවෙ, භික්‌ඛු සමණො හොති.
‘‘කථඤ්‌ච, භික්‌ඛවෙ, භික්‌ඛු බ්‍රාහ්‌මණො හොති? බාහිතාස්‌ස හොන්‌ති පාපකා අකුසලා ධම්‌මා , සංකිලෙසිකා, පොනොබ්‌භවිකා, සදරා, දුක්‌ඛවිපාකා, ආයතිං, ජාතිජරාමරණියා. එවං ඛො, භික්‌ඛවෙ, භික්‌ඛු බ්‍රාහ්‌මණො හොති.
‘‘කථඤ්‌ච, භික්‌ඛවෙ, භික්‌ඛු න්‌හාතකො [නහාතකො (සී. ස්‍යා. කං. පී.)] හොති? න්‌හාතාස්‌ස හොන්‌ති පාපකා අකුසලා ධම්‌මා, සංකිලෙසිකා, පොනොබ්‌භවිකා, සදරා, දුක්‌ඛවිපාකා, ආයතිං, ජාතිජරාමරණියා. එවං ඛො, භික්‌ඛවෙ, භික්‌ඛු න්‌හාතකො හොති.
‘‘කථඤ්‌ච, භික්‌ඛවෙ, භික්‌ඛු වෙදගූ හොති? විදිතාස්‌ස හොන්‌ති පාපකා අකුසලා ධම්‌මා, සංකිලෙසිකා, පොනොබ්‌භවිකා, සදරා, දුක්‌ඛවිපාකා, ආයතිං, ජාතිජරාමරණියා. එවං ඛො, භික්‌ඛවෙ, භික්‌ඛු වෙදගූ හොති.
‘‘කථඤ්‌ච, භික්‌ඛවෙ, භික්‌ඛු සොත්‌තියො හොති? නිස්‌සුතාස්‌ස හොන්‌ති පාපකා අකුසලා ධම්‌මා, සංකිලෙසිකා, පොනොබ්‌භවිකා, සදරා, දුක්‌ඛවිපාකා, ආයතිං, ජාතිජරාමරණියා. එවං ඛො, භික්‌ඛවෙ, භික්‌ඛු සොත්‌තියො හොති.
‘‘කථඤ්‌ච, භික්‌ඛවෙ, භික්‌ඛු අරියො හොති ? ආරකාස්‌ස හොන්‌ති පාපකා අකුසලා ධම්‌මා, සංකිලෙසිකා, පොනොබ්‌භවිකා, සදරා, දුක්‌ඛවිපාකා, ආයතිං, ජාතිජරාමරණියා. එවං ඛො, භික්‌ඛවෙ, භික්‌ඛු අරියො හොති.
‘‘කථඤ්‌ච, භික්‌ඛවෙ, භික්‌ඛු අරහං හොති? ආරකාස්‌ස හොන්‌ති පාපකා අකුසලා ධම්‌මා, සංකිලෙසිකා, පොනොබ්‌භවිකා, සදරා, දුක්‌ඛවිපාකා, ආයතිං, ජාතිජරාමරණියා. එවං ඛො, භික්‌ඛවෙ, භික්‌ඛු අරහං හොතී’’ති.
ඉදමවොච භගවා. අත්‌තමනා තෙ භික්‌ඛූ භගවතො භාසිතං අභිනන්‌දුන්‌ති.
මහාඅස්‌සපුරසුත්‌තං නිට්‌ඨිතං නවමං.
No comments:
Post a Comment