10. දෙවදූතසුත්‌තං
261. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
‘‘සෙය්‍යථාපි, භික්‌ඛවෙ, ද්‌වෙ අගාරා සද්‌වාරා [සන්‌ධිද්‌වාරා (ක.)], තත්‌ථ චක්‌ඛුමා පුරිසො මජ්‌ඣෙ ඨිතො පස්‌සෙය්‍ය මනුස්‌සෙ ගෙහං පවිසන්‌තෙපි නික්‌ඛමන්‌තෙපි අනුචඞ්‌කමන්‌තෙපි අනුවිචරන්‌තෙපි; එවමෙව ඛො අහං, භික්‌ඛවෙ, දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සාමි චවමානෙ උපපජ්‌ජමානෙ හීනෙ පණීතෙ සුවණ්‌ණෙ දුබ්‌බණ්‌ණෙ, සුගතෙ දුග්‌ගතෙ යථාකම්‌මූපගෙ සත්‌තෙ පජානාමි – ‘ඉමෙ වත භොන්‌තො සත්‌තා කායසුචරිතෙන සමන්‌නාගතා වචීසුචරිතෙන සමන්‌නාගතා මනොසුචරිතෙන සමන්‌නාගතා අරියානං අනුපවාදකා සම්‌මාදිට්‌ඨිකා සම්‌මාදිට්‌ඨිකම්‌මසමාදානා; තෙ කායස්‌ස භෙදා පරං මරණා සුගතිං සග්‌ගං ලොකං උපපන්‌නා. ඉමෙ වා පන භොන්‌තො සත්‌තා කායසුචරිතෙන සමන්‌නාගතා වචීසුචරිතෙන සමන්‌නාගතා මනොසුචරිතෙන සමන්‌නාගතා අරියානං අනුපවාදකා සම්‌මාදිට්‌ඨිකා සම්‌මාදිට්‌ඨිකම්‌මසමාදානා; තෙ කායස්‌ස භෙදා පරං මරණා මනුස්‌සෙසු උපපන්‌නා. ඉමෙ වත භොන්‌තො සත්‌තා කායදුච්‌චරිතෙන සමන්‌නාගතා වචීදුච්‌චරිතෙන සමන්‌නාගතා මනොදුච්‌චරිතෙන සමන්‌නාගතා අරියානං උපවාදකා මිච්‌ඡාදිට්‌ඨිකා මිච්‌ඡාදිට්‌ඨිකම්‌මසමාදානා ; තෙ කායස්‌ස භෙදා පරං මරණා පෙත්‌තිවිසයං උපපන්‌නා. ඉමෙ වා පන භොන්‌තො සත්‌තා කායදුච්‌චරිතෙන සමන්‌නාගතා වචීදුච්‌චරිතෙන සමන්‌නාගතා මනොදුච්‌චරිතෙන සමන්‌නාගතා අරියානං උපවාදකා මිච්‌ඡාදිට්‌ඨිකා මිච්‌ඡාදිට්‌ඨිකම්‌මසමාදානා; තෙ කායස්‌ස භෙදා පරං මරණා තිරච්‌ඡානයොනිං උපපන්‌නා. ඉමෙ වා පන භොන්‌තො සත්‌තා කායදුච්‌චරිතෙන සමන්‌නාගතා වචීදුච්‌චරිතෙන සමන්‌නාගතා මනොදුච්‌චරිතෙන සමන්‌නාගතා අරියානං උපවාදකා මිච්‌ඡාදිට්‌ඨිකා මිච්‌ඡාදිට්‌ඨිකම්‌මසමාදානා; තෙ කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපන්‌නා’’’ති.
262. ‘‘තමෙනං, භික්‌ඛවෙ, නිරයපාලා නානාබාහාසු ගහෙත්‌වා යමස්‌ස රඤ්‌ඤො දස්‌සෙන්‌ති – ‘අයං, දෙව, පුරිසො අමත්‌තෙය්‍යො අපෙත්‌තෙය්‍යො අසාමඤ්‌ඤො අබ්‍රාහ්‌මඤ්‌ඤො, න කුලෙ ජෙට්‌ඨාපචායී. ඉමස්‌ස දෙවො දණ්‌ඩං පණෙතූ’ති. තමෙනං, භික්‌ඛවෙ, යමො රාජා පඨමං දෙවදූතං සමනුයුඤ්‌ජති සමනුගාහති සමනුභාසති – ‘අම්‌භො පුරිස, න ත්‌වං අද්‌දස මනුස්‌සෙසු පඨමං දෙවදූතං පාතුභූත’න්‌ති? සො එවමාහ – ‘නාද්‌දසං, භන්‌තෙ’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, න ත්‌වං අද්‌දස මනුස්‌සෙසු දහරං කුමාරං මන්‌දං උත්‌තානසෙය්‍යකං සකෙ මුත්‌තකරීසෙ පලිපන්‌නං සෙමාන’න්‌ති? සො එවමාහ – ‘අද්‌දසං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, තස්‌ස තෙ විඤ්‌ඤුස්‌ස සතො මහල්‌ලකස්‌ස න එතදහොසි – අහම්‌පි ඛොම්‌හි ජාතිධම්‌මො, ජාතිං අනතීතො. හන්‌දාහං කල්‍යාණං කරොමි කායෙන වාචාය මනසා’ති? සො එවමාහ – ‘නාසක්‌ඛිස්‌සං, භන්‌තෙ, පමාදස්‌සං, භන්‌තෙ’’’ති.
‘‘තමෙනං , භික්‌ඛවෙ, යමො රාජා එවමාහ – ‘අම්‌භො පුරිස, පමාදවතාය න කල්‍යාණමකාසි කායෙන වාචාය මනසා. තග්‌ඝ ත්‌වං, අම්‌භො පුරිස, තථා කරිස්‌සන්‌ති යථා තං පමත්‌තං. තං ඛො පන තෙ එතං පාපකම්‌මං [පාපං කම්‌මං (සී. පී.)] නෙව මාතරා කතං න පිතරා කතං න භාතරා කතං න භගිනියා කතං න මිත්‌තාමච්‌චෙහි කතං න ඤාතිසාලොහිතෙහි කතං න සමණබ්‍රාහ්‌මණෙහි කතං න දෙවතාහි කතං, තයාවෙතං පාපකම්‌මං [පාපං කම්‌මං (සී. පී.)] කතං, ත්‌වඤ්‌ඤෙවෙතස්‌ස විපාකං පටිසංවෙදිස්‌සසී’’’ති.
263. ‘‘තමෙනං, භික්‌ඛවෙ, යමො රාජා පඨමං දෙවදූතං සමනුයුඤ්‌ජිත්‌වා සමනුගාහිත්‌වා සමනුභාසිත්‌වා දුතියං දෙවදූතං සමනුයුඤ්‌ජති සමනුගාහති සමනුභාසති – ‘අම්‌භො පුරිස, න ත්‌වං අද්‌දස මනුස්‌සෙසු දුතියං දෙවදූතං පාතුභූත’න්‌ති? සො එවමාහ – ‘නාද්‌දසං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, න ත්‌වං අද්‌දස මනුස්‌සෙසු ඉත්‌ථිං වා පුරිසං වා ( )[(ආසීතිකං වා නාවුතිකං වා වස්‌සසතිකං වා ජාතියා) (ක. සී. ස්‍යා. කං. පී.) තිකඞ්‌ගුත්‌තරෙපි] ජිණ්‌ණං ගොපානසිවඞ්‌කං භොග්‌ගං දණ්‌ඩපරායනං පවෙධමානං ගච්‌ඡන්‌තං ආතුරං ගතයොබ්‌බනං ඛණ්‌ඩදන්‌තං පලිතකෙසං විලූනං ඛලිතසිරං [ඛලිතංසිරො (සී.), ඛලිතංසිරං (ස්‍යා. කං. පී.)] වලිනං තිලකාහතගත්‌ත’න්‌ති? සො එවමාහ – ‘අද්‌දසං, භන්‌තෙ’’’ති.
‘‘තමෙනං , භික්‌ඛවෙ, යමො රාජා එවමාහ – ‘අම්‌භො පුරිස, තස්‌ස තෙ විඤ්‌ඤුස්‌ස සතො මහල්‌ලකස්‌ස න එතදහොසි – අහම්‌පි ඛොම්‌හි ජරාධම්‌මො, ජරං අනතීතො. හන්‌දාහං කල්‍යාණං කරොමි කායෙන වාචාය මනසා’ති? සො එවමාහ – ‘නාසක්‌ඛිස්‌සං, භන්‌තෙ, පමාදස්‌සං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, පමාදවතාය න කල්‍යාණමකාසි කායෙන වාචාය මනසා. තග්‌ඝ ත්‌වං, අම්‌භො පුරිස, තථා කරිස්‌සන්‌ති යථා තං පමත්‌තං. තං ඛො පන තෙ එතං පාපකම්‌මං නෙව මාතරා කතං න පිතරා කතං න භාතරා කතං න භගිනියා කතං න මිත්‌තාමච්‌චෙහි කතං න ඤාතිසාලොහිතෙහි කතං න සමණබ්‍රාහ්‌මණෙහි කතං න දෙවතාහි කතං, තයාවෙතං පාපකම්‌මං කතං, ත්‌වඤ්‌ඤෙවෙතස්‌ස විපාකං පටිසංවෙදිස්‌සසී’’’ති.
264. ‘‘තමෙනං, භික්‌ඛවෙ, යමො රාජා දුතියං දෙවදූතං සමනුයුඤ්‌ජිත්‌වා සමනුගාහිත්‌වා සමනුභාසිත්‌වා තතියං දෙවදූතං සමනුයුඤ්‌ජති සමනුගාහති සමනුභාසති – ‘අම්‌භො පුරිස, න ත්‌වං අද්‌දස මනුස්‌සෙසු තතියං දෙවදූතං පාතුභූත’න්‌ති? සො එවමාහ – ‘නාද්‌දසං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, න ත්‌වං අද්‌දස මනුස්‌සෙසු ඉත්‌ථිං වා පුරිසං වා ආබාධිකං දුක්‌ඛිතං බාළ්‌හගිලානං සකෙ මුත්‌තකරීසෙ පලිපන්‌නං සෙමානං අඤ්‌ඤෙහි වුට්‌ඨාපියමානං අඤ්‌ඤෙහි සංවෙසියමාන’න්‌ති? සො එවමාහ – ‘අද්‌දසං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, තස්‌ස තෙ විඤ්‌ඤුස්‌ස සතො මහල්‌ලකස්‌ස න එතදහොසි – අහම්‌පි ඛොම්‌හි බ්‍යාධිධම්‌මො , බ්‍යාධිං අනතීතො. හන්‌දාහං කල්‍යාණං කරොමි කායෙන වාචාය මනසා’ති? සො එවමාහ – ‘නාසක්‌ඛිස්‌සං, භන්‌තෙ, පමාදස්‌සං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, පමාදවතාය න කල්‍යාණමකාසි කායෙන වාචාය මනසා. තග්‌ඝ ත්‌වං, අම්‌භො පුරිස, තථා කරිස්‌සන්‌ති යථා තං පමත්‌තං. තං ඛො පන තෙ එතං පාපකම්‌මං නෙව මාතරා කතං න පිතරා කතං න භාතරා කතං න භගිනියා කතං න මිත්‌තාමච්‌චෙහි කතං න ඤාතිසාලොහිතෙහි කතං න සමණබ්‍රාහ්‌මණෙහි කතං න දෙවතාහි කතං, තයාවෙතං පාපකම්‌මං කතං, ත්‌වඤ්‌ඤෙවෙතස්‌ස විපාකං පටිසංවෙදිස්‌සසී’’’ති.
265. ‘‘තමෙනං, භික්‌ඛවෙ, යමො රාජා තතියං දෙවදූතං සමනුයුඤ්‌ජිත්‌වා සමනුගාහිත්‌වා සමනුභාසිත්‌වා චතුත්‌ථං දෙවදූතං සමනුයුඤ්‌ජති සමනුගාහති සමනුභාසති – ‘අම්‌භො පුරිස, න ත්‌වං අද්‌දස මනුස්‌සෙසු චතුත්‌ථං දෙවදූතං පාතුභූත’න්‌ති? සො එවමාහ – ‘නාද්‌දසං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, න ත්‌වං අද්‌දස මනුස්‌සෙසු රාජානො චොරං ආගුචාරිං ගහෙත්‌වා විවිධා කම්‌මකාරණා කාරෙන්‌තෙ – කසාහිපි තාළෙන්‌තෙ වෙත්‌තෙහිපි තාළෙන්‌තෙ අද්‌ධදණ්‌ඩකෙහිපි තාළෙන්‌තෙ හත්‌ථම්‌පි ඡින්‌දන්‌තෙ පාදම්‌පි ඡින්‌දන්‌තෙ හත්‌ථපාදම්‌පි ඡින්‌දන්‌තෙ කණ්‌ණම්‌පි ඡින්‌දන්‌තෙ නාසම්‌පි ඡින්‌දන්‌තෙ කණ්‌ණනාසම්‌පි ඡින්‌දන්‌තෙ බිලඞ්‌ගථාලිකම්‌පි කරොන්‌තෙ සඞ්‌ඛමුණ්‌ඩිකම්‌පි කරොන්‌තෙ රාහුමුඛම්‌පි කරොන්‌තෙ ජොතිමාලිකම්‌පි කරොන්‌තෙ හත්‌ථපජ්‌ජොතිකම්‌පි කරොන්‌තෙ එරකවත්‌තිකම්‌පි කරොන්‌තෙ චීරකවාසිකම්‌පි කරොන්‌තෙ එණෙය්‍යකම්‌පි කරොන්‌තෙ බළිසමංසිකම්‌පි කරොන්‌තෙ කහාපණිකම්‌පි කරොන්‌තෙ ඛාරාපතච්‌ඡිකම්‌පි කරොන්‌තෙ පලිඝපරිවත්‌තිකම්‌පි කරොන්‌තෙ පලාලපීඨකම්‌පි කරොන්‌තෙ තත්‌තෙනපි තෙලෙන ඔසිඤ්‌චන්‌තෙ සුනඛෙහිපි ඛාදාපෙන්‌තෙ ජීවන්‌තම්‌පි සූලෙ උත්‌තාසෙන්‌තෙ අසිනාපි සීසං ඡින්‌දන්‌තෙ’ති? සො එවමාහ – ‘අද්‌දසං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, තස්‌ස තෙ විඤ්‌ඤුස්‌ස සතො මහල්‌ලකස්‌ස න එතදහොසි – යෙ කිර, භො, පාපකානි කම්‌මානි කරොන්‌ති තෙ දිට්‌ඨෙව ධම්‌මෙ එවරූපා විවිධා කම්‌මකාරණා කරීයන්‌ති, කිමඞ්‌ගං [කිමඞ්‌ග (සී. පී.)] පන පරත්‌ථ ! හන්‌දාහං කල්‍යාණං කරොමි කායෙන වාචාය මනසා’ති? සො එවමාහ – ‘නාසක්‌ඛිස්‌සං, භන්‌තෙ, පමාදස්‌සං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, පමාදවතාය න කල්‍යාණමකාසි කායෙන වාචාය මනසා. තග්‌ඝ ත්‌වං, අම්‌භො පුරිස, තථා කරිස්‌සන්‌ති යථා තං පමත්‌තං. තං ඛො පන තෙ එතං පාපකම්‌මං නෙව මාතරා කතං න පිතරා කතං න භාතරා කතං න භගිනියා කතං න මිත්‌තාමච්‌චෙහි කතං න ඤාතිසාලොහිතෙහි කතං න සමණබ්‍රාහ්‌මණෙහි කතං න දෙවතාහි කතං, තයාවෙතං පාපකම්‌මං කතං, ත්‌වඤ්‌ඤෙවෙතස්‌ස විපාකං පටිසංවෙදිස්‌සසී’’’ති.
266. ‘‘තමෙනං, භික්‌ඛවෙ, යමො රාජා චතුත්‌ථං දෙවදූතං සමනුයුඤ්‌ජිත්‌වා සමනුගාහිත්‌වා සමනුභාසිත්‌වා පඤ්‌චමං දෙවදූතං සමනුයුඤ්‌ජති සමනුගාහති සමනුභාසති – ‘අම්‌භො පුරිස, න ත්‌වං අද්‌දස මනුස්‌සෙසු පඤ්‌චමං දෙවදූතං පාතුභූත’න්‌ති? සො එවමාහ – ‘නාද්‌දසං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, න ත්‌වං අද්‌දස මනුස්‌සෙසු ඉත්‌ථිං වා පුරිසං වා එකාහමතං වා ද්‌වීහමතං වා තීහමතං වා උද්‌ධුමාතකං විනීලකං විපුබ්‌බකජාත’න්‌ති? සො එවමාහ – ‘අද්‌දසං, භන්‌තෙ’’’ති.
‘‘තමෙනං , භික්‌ඛවෙ, යමො රාජා එවමාහ – ‘අම්‌භො පුරිස, තස්‌ස තෙ විඤ්‌ඤුස්‌ස සතො මහල්‌ලකස්‌ස න එතදහොසි – අහම්‌පි ඛොම්‌හි මරණධම්‌මො, මරණං අනතීතො. හන්‌දාහං කල්‍යාණං කරොමි කායෙන වාචාය මනසා’ති? සො එවමාහ – ‘නාසක්‌ඛිස්‌සං, භන්‌තෙ, පමාදස්‌සං, භන්‌තෙ’’’ති.
‘‘තමෙනං, භික්‌ඛවෙ, යමො රාජා එවමාහ – ‘අම්‌භො පුරිස, පමාදවතාය න කල්‍යාණමකාසි කායෙන වාචාය මනසා. තග්‌ඝ ත්‌වං, අම්‌භො පුරිස, තථා කරිස්‌සන්‌ති යථා තං පමත්‌තං. තං ඛො පන තෙ එතං පාපකම්‌මං නෙව මාතරා කතං න පිතරා කතං න භාතරා කතං න භගිනියා කතං න මිත්‌තාමච්‌චෙහි කතං න ඤාතිසාලොහිතෙහි කතං න සමණබ්‍රාහ්‌මණෙහි කතං න දෙවතාහි කතං, තයාවෙතං පාපකම්‌මං කතං, ත්‌වඤ්‌ඤෙවෙතස්‌ස විපාකං පටිසංවෙදිස්‌සසී’’’ති.
267. ‘‘තමෙනං, භික්‌ඛවෙ, යමො රාජා පඤ්‌චමං දෙවදූතං සමනුයුඤ්‌ජිත්‌වා සමනුගාහිත්‌වා සමනුභාසිත්‌වා තුණ්‌හී හොති. තමෙනං, භික්‌ඛවෙ, නිරයපාලා පඤ්‌චවිධබන්‌ධනං නාම කම්‌මකාරණං කරොන්‌ති – තත්‌තං අයොඛිලං හත්‌ථෙ ගමෙන්‌ති, තත්‌තං අයොඛිලං දුතියෙ හත්‌ථෙ ගමෙන්‌ති, තත්‌තං අයොඛිලං පාදෙ ගමෙන්‌ති, තත්‌තං අයොඛිලං දුතියෙ පාදෙ ගමෙන්‌ති, තත්‌තං අයොඛිලං මජ්‌ඣෙඋරස්‌මිං ගමෙන්‌ති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලං කරොති යාව න තං පාපකම්‌මං බ්‍යන්‌තීහොති. තමෙනං, භික්‌ඛවෙ, නිරයපාලා සංවෙසෙත්‌වා කුඨාරීහි තච්‌ඡන්‌ති…පෙ.… තමෙනං, භික්‌ඛවෙ, නිරයපාලා උද්‌ධංපාදං අධොසිරං ගහෙත්‌වා වාසීහි තච්‌ඡන්‌ති…පෙ.… තමෙනං, භික්‌ඛවෙ, නිරයපාලා රථෙ යොජෙත්‌වා ආදිත්‌තාය පථවියා සම්‌පජ්‌ජලිතාය සජොතිභූතාය සාරෙන්‌තිපි, පච්‌චාසාරෙන්‌තිපි…පෙ.… තමෙනං, භික්‌ඛවෙ, නිරයපාලා මහන්‌තං අඞ්‌ගාරපබ්‌බතං ආදිත්‌තං සම්‌පජ්‌ජලිතං සජොතිභූතං ආරොපෙන්‌තිපි ඔරොපෙන්‌තිපි…පෙ.… තමෙනං, භික්‌ඛවෙ, නිරයපාලා උද්‌ධංපාදං අධොසිරං ගහෙත්‌වා තත්‌තාය ලොහකුම්‌භියා පක්‌ඛිපන්‌ති ආදිත්‌තාය සම්‌පජ්‌ජලිතාය සජොතිභූතාය. සො තත්‌ථ ඵෙණුද්‌දෙහකං පච්‌චති. සො තත්‌ථ ඵෙණුද්‌දෙහකං පච්‌චමානො සකිම්‌පි උද්‌ධං ගච්‌ඡති, සකිම්‌පි අධො ගච්‌ඡති, සකිම්‌පි තිරියං ගච්‌ඡති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති. තමෙනං, භික්‌ඛවෙ, නිරයපාලා මහානිරයෙ පක්‌ඛිපන්‌ති. සො ඛො පන, භික්‌ඛවෙ, මහානිරයො –
‘‘චතුක්‌කණ්‌ණො චතුද්‌වාරො, විභත්‌තො භාගසො මිතො;
අයොපාකාරපරියන්‌තො, අයසා පටිකුජ්‌ජිතො.
‘‘තස්‌ස අයොමයා භූමි, ජලිතා තෙජසායුතා;
සමන්‌තා යොජනසතං, ඵරිත්‌වා තිට්‌ඨති සබ්‌බදා’’ .
268. ‘‘තස්‌ස ඛො පන, භික්‌ඛවෙ, මහානිරයස්‌ස පුරත්‌ථිමාය භිත්‌තියා අච්‌චි උට්‌ඨහිත්‌වා පච්‌ඡිමාය භිත්‌තියා පටිහඤ්‌ඤති, පච්‌ඡිමාය භිත්‌තියා අච්‌චි උට්‌ඨහිත්‌වා පුරත්‌ථිමාය භිත්‌තියා පටිහඤ්‌ඤති, උත්‌තරාය භිත්‌තියා අච්‌චි උට්‌ඨහිත්‌වා දක්‌ඛිණාය භිත්‌තියා පටිහඤ්‌ඤති, දක්‌ඛිණාය භිත්‌තියා අච්‌චි උට්‌ඨහිත්‌වා උත්‌තරාය භිත්‌තියා පටිහඤ්‌ඤති, හෙට්‌ඨා අච්‌චි උට්‌ඨහිත්‌වා උපරි පටිහඤ්‌ඤති, උපරිතො අච්‌චි උට්‌ඨහිත්‌වා හෙට්‌ඨා පටිහඤ්‌ඤති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘හොති ඛො සො, භික්‌ඛවෙ, සමයො යං කදාචි කරහචි දීඝස්‌ස අද්‌ධුනො අච්‌චයෙන තස්‌ස මහානිරයස්‌ස පුරත්‌ථිමං ද්‌වාරං අපාපුරීයති [අවාපුරීයති (සී.)]. සො තත්‌ථ සීඝෙන ජවෙන ධාවති. තස්‌ස සීඝෙන ජවෙන ධාවතො ඡවිම්‌පි ඩය්‌හති, චම්‌මම්‌පි ඩය්‌හති, මංසම්‌පි ඩය්‌හති, න්‌හාරුම්‌පි ඩය්‌හති, අට්‌ඨීනිපි සම්‌පධූපායන්‌ති, උබ්‌භතං තාදිසමෙව හොති. යතො ච ඛො සො, භික්‌ඛවෙ, බහුසම්‌පත්‌තො හොති, අථ තං ද්‌වාරං පිධීයති [පිථීයති (සී. ස්‍යා. කං. පී.)]. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘හොති ඛො සො, භික්‌ඛවෙ, සමයො යං කදාචි කරහචි දීඝස්‌ස අද්‌ධුනො අච්‌චයෙන තස්‌ස මහානිරයස්‌ස පච්‌ඡිමං ද්‌වාරං අපාපුරීයති…පෙ.… උත්‌තරං ද්‌වාරං අපාපුරීයති…පෙ.… දක්‌ඛිණං ද්‌වාරං අපාපුරීයති . සො තත්‌ථ සීඝෙන ජවෙන ධාවති. තස්‌ස සීඝෙන ජවෙන ධාවතො ඡවිම්‌පි ඩය්‌හති, චම්‌මම්‌පි ඩය්‌හති, මංසම්‌පි ඩය්‌හති, න්‌හාරුම්‌පි ඩය්‌හති, අට්‌ඨීනිපි සම්‌පධූපායන්‌ති, උබ්‌භතං තාදිසමෙව හොති. යතො ච ඛො සො, භික්‌ඛවෙ, බහුසම්‌පත්‌තො හොති, අථ තං ද්‌වාරං පිධීයති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘හොති ඛො සො, භික්‌ඛවෙ, සමයො යං කදාචි කරහචි දීඝස්‌ස අද්‌ධුනො අච්‌චයෙන තස්‌ස මහානිරයස්‌ස පුරත්‌ථිමං ද්‌වාරං අපාපුරීයති. සො තත්‌ථ සීඝෙන ජවෙන ධාවති. තස්‌ස සීඝෙන ජවෙන ධාවතො ඡවිම්‌පි ඩය්‌හති, චම්‌මම්‌පි ඩය්‌හති, මංසම්‌පි ඩය්‌හති, න්‌හාරුම්‌පි ඩය්‌හති, අට්‌ඨීනිපි සම්‌පධූපායන්‌ති, උබ්‌භතං තාදිසමෙව හොති. සො තෙන ද්‌වාරෙන නික්‌ඛමති.
269. ‘‘තස්‌ස ඛො පන, භික්‌ඛවෙ, මහානිරයස්‌ස සමනන්‌තරා සහිතමෙව මහන්‌තො ගූථනිරයො. සො තත්‌ථ පතති. තස්‌මිං ඛො පන, භික්‌ඛවෙ, ගූථනිරයෙ සූචිමුඛා පාණා ඡවිං ඡින්‌දන්‌ති, ඡවිං ඡෙත්‌වා චම්‌මං ඡින්‌දන්‌ති, චම්‌මං ඡෙත්‌වා මංසං ඡින්‌දන්‌ති, මංසං ඡෙත්‌වා න්‌හාරුං ඡින්‌දන්‌ති, න්‌හාරුං ඡෙත්‌වා අට්‌ඨිං ඡින්‌දන්‌ති, අට්‌ඨිං ඡෙත්‌වා අට්‌ඨිමිඤ්‌ජං ඛාදන්‌ති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘තස්‌ස ඛො පන, භික්‌ඛවෙ, ගූථනිරයස්‌ස සමනන්‌තරා සහිතමෙව මහන්‌තො කුක්‌කුලනිරයො. සො තත්‌ථ පතති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘තස්‌ස ඛො පන, භික්‌ඛවෙ, කුක්‌කුලනිරයස්‌ස සමනන්‌තරා සහිතමෙව මහන්‌තං සිම්‌බලිවනං උද්‌ධං [උච්‌චං (ස්‍යා. කං.), උබ්‌භතො (ක.)] යොජනමුග්‌ගතං සොළසඞ්‌ගුලකණ්‌ටකං [සොළසඞ්‌ගුලකණ්‌ඩකං (සී.)] ආදිත්‌තං සම්‌පජ්‌ජලිතං සජොතිභූතං. තත්‌ථ ආරොපෙන්‌තිපි ඔරොපෙන්‌තිපි. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘තස්‌ස ඛො පන, භික්‌ඛවෙ, සිම්‌බලිවනස්‌ස සමනන්‌තරා සහිතමෙව මහන්‌තං අසිපත්‌තවනං. සො තත්‌ථ පවිසති. තස්‌ස වාතෙරිතානි පත්‌තානි පතිතානි හත්‌ථම්‌පි ඡින්‌දන්‌ති, පාදම්‌පි ඡින්‌දන්‌ති, හත්‌ථපාදම්‌පි ඡින්‌දන්‌ති, කණ්‌ණම්‌පි ඡින්‌දන්‌ති, නාසම්‌පි ඡින්‌දන්‌ති, කණ්‌ණනාසම්‌පි ඡින්‌දන්‌ති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘තස්‌ස ඛො පන, භික්‌ඛවෙ, අසිපත්‌තවනස්‌ස සමනන්‌තරා සහිතමෙව මහතී ඛාරොදකා නදී [ඛාරොදිකා නදී (සී.)]. සො තත්‌ථ පතති. සො තත්‌ථ අනුසොතම්‌පි වුය්‌හති , පටිසොතම්‌පි වුය්‌හති, අනුසොතපටිසොතම්‌පි වුය්‌හති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
270. ‘‘තමෙනං, භික්‌ඛවෙ, නිරයපාලා බලිසෙන උද්‌ධරිත්‌වා ථලෙ පතිට්‌ඨාපෙත්‌වා එවමාහංසු – ‘අම්‌භො පුරිස, කිං ඉච්‌ඡසී’ති? සො එවමාහ – ‘ජිඝච්‌ඡිතොස්‌මි, භන්‌තෙ’ති. තමෙනං, භික්‌ඛවෙ, නිරයපාලා තත්‌තෙන අයොසඞ්‌කුනා මුඛං විවරිත්‌වා ආදිත්‌තෙන සම්‌පජ්‌ජලිතෙන සජොතිභූතෙන තත්‌තං ලොහගුළං මුඛෙ පක්‌ඛිපන්‌ති ආදිත්‌තං සම්‌පජ්‌ජලිතං සජොතිභූතං. සො තස්‌ස [තං තස්‌ස (ක.), තස්‌ස (සී. පී.)] ඔට්‌ඨම්‌පි දහති [ඩය්‌හති (සී. ස්‍යා. කං. පී.)], මුඛම්‌පි දහති, කණ්‌ඨම්‌පි දහති, උරම්‌පි [උදරම්‌පි (සී. ස්‍යා. කං.)] දහති, අන්‌තම්‌පි අන්‌තගුණම්‌පි ආදාය අධොභාගා නික්‌ඛමති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති යාව න තං පාපකම්‌මං බ්‍යන්‌තීහොති.
‘‘තමෙනං , භික්‌ඛවෙ, නිරයපාලා එවමාහංසු – ‘අම්‌භො පුරිස, කිං ඉච්‌ඡසී’ති? සො එවමාහ – ‘පිපාසිතොස්‌මි, භන්‌තෙ’ති. තමෙනං, භික්‌ඛවෙ, නිරයපාලා තත්‌තෙන අයොසඞ්‌කුනා මුඛං විවරිත්‌වා ආදිත්‌තෙන සම්‌පජ්‌ජලිතෙන සජොතිභූතෙන තත්‌තං තම්‌බලොහං මුඛෙ ආසිඤ්‌චන්‌ති ආදිත්‌තං සම්‌පජ්‌ජලිතං සජොතිභූතං. තං තස්‌ස[එත්‌ථ පන පාඨභෙදො නත්‌ථි] ඔට්‌ඨම්‌පි දහති, මුඛම්‌පි දහති, කණ්‌ඨම්‌පි දහති, උරම්‌පි දහති, අන්‌තම්‌පි අන්‌තගුණම්‌පි ආදාය අධොභාගා නික්‌ඛමති. සො තත්‌ථ දුක්‌ඛා තිබ්‌බා ඛරා කටුකා වෙදනා වෙදෙති, න ච තාව කාලඞ්‌කරොති, යාව න තං පාපකම්‌මං බ්‍යන්‌තීහොති. තමෙනං, භික්‌ඛවෙ, නිරයපාලා පුන මහානිරයෙ පක්‌ඛිපන්‌ති.
‘‘භූතපුබ්‌බං, භික්‌ඛවෙ, යමස්‌ස රඤ්‌ඤො එතදහොසි – ‘යෙ කිර , භො, ලොකෙ පාපකානි අකුසලානි කම්‌මානි කරොන්‌ති තෙ එවරූපා විවිධා කම්‌මකාරණා කරීයන්‌ති. අහො වතාහං මනුස්‌සත්‌තං ලභෙය්‍යං. තථාගතො ච ලොකෙ උප්‌පජ්‌ජෙය්‍ය අරහං සම්‌මාසම්‌බුද්‌ධො. තඤ්‌චාහං භගවන්‌තං පයිරුපාසෙය්‍යං. සො ච මෙ භගවා ධම්‌මං දෙසෙය්‍ය. තස්‌ස චාහං භගවතො ධම්‌මං ආජානෙය්‍ය’න්‌ති. තං ඛො පනාහං, භික්‌ඛවෙ, නාඤ්‌ඤස්‌ස සමණස්‌ස වා බ්‍රාහ්‌මණස්‌ස වා සුත්‌වා වදාමි, අපි ච යදෙව සාමං ඤාතං සාමං දිට්‌ඨං සාමං විදිතං තදෙවාහං වදාමී’’ති.
271. ඉදමවොච භගවා. ඉදං වත්‌වාන [ඉදං වත්‌වා (සී. පී.) එවමීදිසෙසු ඨානෙසු] සුගතො අථාපරං එතදවොච සත්‌ථා –
‘‘චොදිතා දෙවදූතෙහි, යෙ පමජ්‌ජන්‌ති මාණවා;
තෙ දීඝරත්‌තං සොචන්‌ති, හීනකායූපගා නරා.
‘‘යෙ ච ඛො දෙවදූතෙහි, සන්‌තො සප්‌පුරිසා ඉධ;
චොදිතා නප්‌පමජ්‌ජන්‌ති, අරියධම්‌මෙ කුදාචනං.
‘‘උපාදානෙ භයං දිස්‌වා, ජාතිමරණසම්‌භවෙ;
අනුපාදා විමුච්‌චන්‌ති, ජාතිමරණසඞ්‌ඛයෙ.
‘‘තෙ ඛෙමප්‌පත්‌තා සුඛිනො, දිට්‌ඨධම්‌මාභිනිබ්‌බුතා;
සබ්‌බවෙරභයාතීතා, සබ්‌බදුක්‌ඛං [සබ්‌බදුක්‌ඛා (ක.)] උපච්‌චගු’’න්‌ති.
දෙවදූතසුත්‌තං නිට්‌ඨිතං දසමං.
No comments:
Post a Comment