8. නගරවින්‌දෙය්‍යසුත්‌තං
434. එවං මෙ සුතං – එකං සමයං භගවා කොසලෙසු චාරිකං චරමානො මහතා භික්‌ඛුසඞ්‌ඝෙන සද්‌ධිං යෙන නගරවින්‌දං නාම කොසලානං බ්‍රාහ්‌මණානං ගාමො තදවසරි. අස්‌සොසුං ඛො නගරවින්‌දෙය්‍යකා [නගරවින්‌දෙය්‍යා (ක.)] බ්‍රාහ්‌මණගහපතිකා – ‘‘සමණො ඛලු, භො, ගොතමො සක්‍යපුත්‌තො සක්‍යකුලා පබ්‌බජිතො කොසලෙසු චාරිකං චරමානො මහතා භික්‌ඛුසඞ්‌ඝෙන සද්‌ධිං නගරවින්‌දං අනුප්‌පත්‌තො. තං ඛො පන භවන්‌තං ගොතමං එවං කල්‍යාණො කිත්‌තිසද්‌දො අබ්‌භුග්‌ගතො – ‘ඉතිපි සො භගවා අරහං සම්‌මාසම්‌බුද්‌ධො විජ්‌ජාචරණසම්‌පන්‌නො සුගතො ලොකවිදූ අනුත්‌තරො පුරිසදම්‌මසාරථි සත්‌ථා දෙවමනුස්‌සානං බුද්‌ධො භගවා’ති. සො ඉමං ලොකං සදෙවකං සමාරකං සබ්‍රහ්‌මකං සස්‌සමණබ්‍රාහ්‌මණිං පජං සදෙවමනුස්‌සං සයං අභිඤ්‌ඤා සච්‌ඡිකත්‌වා පවෙදෙති. සො ධම්‌මං දෙසෙති ආදිකල්‍යාණං මජ්‌ඣෙකල්‍යාණං පරියොසානකල්‍යාණං සාත්‌ථං සබ්‍යඤ්‌ජනං, කෙවලපරිපුණ්‌ණං පරිසුද්‌ධං බ්‍රහ්‌මචරියං පකාසෙති. සාධු ඛො පන තථාරූපානං අරහතං දස්‌සනං හොතී’’ති.
අථ ඛො නගරවින්‌දෙය්‍යකා බ්‍රාහ්‌මණගහපතිකා යෙන භගවා තෙනුපසඞ්‌කමිංසු; උපසඞ්‌කමිත්‌වා අප්‌පෙකච්‌චෙ භගවන්‌තං අභිවාදෙත්‌වා එකමන්‌තං නිසීදිංසු. අප්‌පෙකච්‌චෙ භගවතා සද්‌ධිං සම්‌මොදිංසු; සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදිංසු. අප්‌පෙකච්‌චෙ යෙන භගවා තෙනඤ්‌ජලිං පණාමෙත්‌වා එකමන්‌තං නිසීදිංසු. අප්‌පෙකච්‌චෙ භගවතො සන්‌තිකෙ නාමගොත්‌තං සාවෙත්‌වා එකමන්‌තං නිසීදිංසු. අප්‌පෙකච්‌චෙ තුණ්‌හීභූතා එකමන්‌තං නිසීදිංසු. එකමන්‌තංනිසින්‌නෙ ඛො නගරවින්‌දෙය්‍යකෙ බ්‍රාහ්‌මණගහපතිකෙ භගවා එතදවොච –
435. ‘‘සචෙ වො, ගහපතයො, අඤ්‌ඤතිත්‌ථියා පරිබ්‌බාජකා එවං පුච්‌ඡෙය්‍යුං – ‘කථංභූතා, ගහපතයො, සමණබ්‍රාහ්‌මණා න සක්‌කාතබ්‌බා න ගරුකාතබ්‌බා න මානෙතබ්‌බා න පූජෙතබ්‌බා’ති? එවං පුට්‌ඨා තුම්‌හෙ, ගහපතයො, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථ – ‘යෙ තෙ සමණබ්‍රාහ්‌මණා චක්‌ඛුවිඤ්‌ඤෙය්‍යෙසු රූපෙසු අවීතරාගා අවීතදොසා අවීතමොහා, අජ්‌ඣත්‌තං අවූපසන්‌තචිත්‌තා, සමවිසමං චරන්‌ති කායෙන වාචාය මනසා, එවරූපා සමණබ්‍රාහ්‌මණා න සක්‌කාතබ්‌බා න ගරුකාතබ්‌බා න මානෙතබ්‌බා න පූජෙතබ්‌බා. තං කිස්‌ස හෙතු? මයම්‌පි හි චක්‌ඛුවිඤ්‌ඤෙය්‍යෙසු රූපෙසු අවීතරාගා අවීතදොසා අවීතමොහා, අජ්‌ඣත්‌තං අවූපසන්‌තචිත්‌තා, සමවිසමං චරාම කායෙන වාචාය මනසා, තෙසං නො සමචරියම්‌පි හෙතං උත්‌තරි අපස්‌සතං. තස්‌මා තෙ භොන්‌තො සමණබ්‍රාහ්‌මණා න සක්‌කාතබ්‌බා න ගරුකාතබ්‌බා න මානෙතබ්‌බා න පූජෙතබ්‌බා. යෙ තෙ සමණබ්‍රාහ්‌මණා සොතවිඤ්‌ඤෙය්‍යෙසු සද්‌දෙසු… ඝානවිඤ්‌ඤෙය්‍යෙසු ගන්‌ධෙසු… ජිව්‌හාවිඤ්‌ඤෙය්‍යෙසු රසෙසු… කායවිඤ්‌ඤෙය්‍යෙසු ඵොට්‌ඨබ්‌බෙසු… මනොවිඤ්‌ඤෙය්‍යෙසු ධම්‌මෙසු අවීතරාගා අවීතදොසා අවීතමොහා, අජ්‌ඣත්‌තං අවූපසන්‌තචිත්‌තා, සමවිසමං චරන්‌ති කායෙන වාචාය මනසා, එවරූපා සමණබ්‍රාහ්‌මණා න සක්‌කාතබ්‌බා න ගරුකාතබ්‌බා න මානෙතබ්‌බා න පූජෙතබ්‌බා. තං කිස්‌ස හෙතු? මයම්‌පි හි මනොවිඤ්‌ඤෙය්‍යෙසු ධම්‌මෙසු අවීතරාගා අවීතදොසා අවීතමොහා , අජ්‌ඣත්‌තං අවූපසන්‌තචිත්‌තා, සමවිසමං චරාම කායෙන වාචාය මනසා, තෙසං නො සමචරියම්‌පි හෙතං උත්‌තරි අපස්‌සතං. තස්‌මා තෙ භොන්‌තො සමණබ්‍රාහ්‌මණා න සක්‌කාතබ්‌බා න ගරුකාතබ්‌බා න මානෙතබ්‌බා න පූජෙතබ්‌බා’ති. එවං පුට්‌ඨා තුම්‌හෙ, ගහපතයො, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථ.
436. ‘‘සචෙ පන වො, ගහපතයො, අඤ්‌ඤතිත්‌ථියා පරිබ්‌බාජකා එවං පුච්‌ඡෙය්‍යුං – ‘කථංභූතා, ගහපතයො, සමණබ්‍රාහ්‌මණා සක්‌කාතබ්‌බා ගරුකාතබ්‌බා මානෙතබ්‌බා පූජෙතබ්‌බා’ති? එවං පුට්‌ඨා තුම්‌හෙ, ගහපතයො, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථ – ‘යෙ තෙ සමණබ්‍රාහ්‌මණා චක්‌ඛුවිඤ්‌ඤෙය්‍යෙසු රූපෙසු වීතරාගා වීතදොසා වීතමොහා, අජ්‌ඣත්‌තං වූපසන්‌තචිත්‌තා, සමචරියං චරන්‌ති කායෙන වාචාය මනසා, එවරූපා සමණබ්‍රාහ්‌මණා සක්‌කාතබ්‌බා ගරුකාතබ්‌බා මානෙතබ්‌බා පූජෙතබ්‌බා. තං කිස්‌ස හෙතු? මයම්‌පි හි [මයං හි (?)]චක්‌ඛුවිඤ්‌ඤෙය්‍යෙසු රූපෙසු අවීතරාගා අවීතදොසා අවීතමොහා, අජ්‌ඣත්‌තං අවූපසන්‌තචිත්‌තා, සමවිසමං චරාම කායෙන වාචාය මනසා, තෙසං නො සමචරියම්‌පි හෙතං උත්‌තරි පස්‌සතං. තස්‌මා තෙ භොන්‌තො සමණබ්‍රාහ්‌මණා සක්‌කාතබ්‌බා ගරුකාතබ්‌බා මානෙතබ්‌බා පූජෙතබ්‌බා. යෙ තෙ සමණබ්‍රාහ්‌මණා සොතවිඤ්‌ඤෙය්‍යෙසු සද්‌දෙසු… ඝානවිඤ්‌ඤෙය්‍යෙසු ගන්‌ධෙසු… ජිව්‌හාවිඤ්‌ඤෙය්‍යෙසු රසෙසු… කායවිඤ්‌ඤෙය්‍යෙසු ඵොට්‌ඨබ්‌බෙසු… මනොවිඤ්‌ඤෙය්‍යෙසු ධම්‌මෙසු වීතරාගා වීතදොසා වීතමොහා, අජ්‌ඣත්‌තං වූපසන්‌තචිත්‌තා, සමචරියං චරන්‌ති කායෙන වාචාය මනසා, එවරූපා සමණබ්‍රාහ්‌මණා සක්‌කාතබ්‌බා ගරුකාතබ්‌බා මානෙතබ්‌බා පූජෙතබ්‌බා. තං කිස්‌ස හෙතු? මයම්‌පි හි මනොවිඤ්‌ඤෙය්‍යෙසු ධම්‌මෙසු අවීතරාගා අවීතදොසා අවීතමොහා අජ්‌ඣත්‌තං අවූපසන්‌තචිත්‌තා, සමවිසමං චරාම කායෙන වාචාය මනසා, තෙසං නො සමචරියම්‌පි හෙතං උත්‌තරි පස්‌සතං. තස්‌මා තෙ භොන්‌තො සමණබ්‍රාහ්‌මණා සක්‌කාතබ්‌බා ගරුකාතබ්‌බා මානෙතබ්‌බා පූජෙතබ්‌බා’ති . එවං පුට්‌ඨා තුම්‌හෙ, ගහපතයො, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථ.
437. ‘‘සචෙ පන වො [සචෙ තෙ (ස්‍යා. කං. පී. ක.)], ගහපතයො, අඤ්‌ඤතිත්‌ථියා පරිබ්‌බාජකා එවං පුච්‌ඡෙය්‍යුං – ‘කෙ පනායස්‌මන්‌තානං ආකාරා, කෙ අන්‌වයා, යෙන තුම්‌හෙ ආයස්‌මන්‌තො එවං වදෙථ? අද්‌ධා තෙ ආයස්‌මන්‌තො වීතරාගා වා රාගවිනයාය වා පටිපන්‌නා, වීතදොසා වා දොසවිනයාය වා පටිපන්‌නා, වීතමොහා වා මොහවිනයාය වා පටිපන්‌නා’ති? එවං පුට්‌ඨා තුම්‌හෙ, ගහපතයො, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථ – ‘තථා හි තෙ ආයස්‌මන්‌තො අරඤ්‌ඤවනපත්‌ථානි පන්‌තානි සෙනාසනානි පටිසෙවන්‌ති. නත්‌ථි ඛො පන තත්‌ථ තථාරූපා චක්‌ඛුවිඤ්‌ඤෙය්‍යා රූපා යෙ දිස්‌වා දිස්‌වා අභිරමෙය්‍යුං, නත්‌ථි ඛො පන තත්‌ථ තථාරූපා සොතවිඤ්‌ඤෙය්‍යා සද්‌දා යෙ සුත්‌වා සුත්‌වා අභිරමෙය්‍යුං, නත්‌ථි ඛො පන තත්‌ථ තථාරූපා ඝානවිඤ්‌ඤෙය්‍යා ගන්‌ධා යෙ ඝායිත්‌වා ඝායිත්‌වා අභිරමෙය්‍යුං , නත්‌ථි ඛො පන තත්‌ථ තථාරූපා ජිව්‌හාවිඤ්‌ඤෙය්‍යා රසා යෙ සායිත්‌වා සායිත්‌වා අභිරමෙය්‍යුං, නත්‌ථි ඛො පන තත්‌ථ තථාරූපා කායවිඤ්‌ඤෙය්‍යා ඵොට්‌ඨබ්‌බා යෙ ඵුසිත්‌වා ඵුසිත්‌වා අභිරමෙය්‍යුං. ඉමෙ ඛො නො, ආවුසො, ආකාරා, ඉමෙ අන්‌වයා, යෙන මයං [යෙන මයං ආයස්‌මන්‌තො (සී. පී.), යෙන මයං ආයස්‌මන්‌තෙ (ස්‍යා. කං.)] එවං වදෙම – අද්‌ධා තෙ ආයස්‌මන්‌තො වීතරාගා වා රාගවිනයාය වා පටිපන්‌නා, වීතදොසා වා දොසවිනයාය වා පටිපන්‌නා, වීතමොහා වා මොහවිනයාය වා පටිපන්‌නා’ති. එවං පුට්‌ඨා තුම්‌හෙ, ගහපතයො, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථා’’ති.
එවං වුත්‌තෙ, නගරවින්‌දෙය්‍යකා බ්‍රාහ්‌මණගහපතිකා භගවන්‌තං එතදවොචුං – ‘‘අභික්‌කන්‌තං, භො ගොතම, අභික්‌කන්‌තං, භො ගොතම! සෙය්‍යථාපි, භො ගොතම, නික්‌කුජ්‌ජිතං වා උක්‌කුජ්‌ජෙය්‍ය, පටිච්‌ඡන්‌නං වා විවරෙය්‍ය, මූළ්‌හස්‌ස වා මග්‌ගං ආචික්‌ඛෙය්‍ය, අන්‌ධකාරෙ වා තෙලපජ්‌ජොතං ධාරෙය්‍ය – ‘චක්‌ඛුමන්‌තො රූපානි දක්‌ඛන්‌තී’ති; එවමෙවං භොතා ගොතමෙන අනෙකපරියායෙන ධම්‌මො පකාසිතො. එතෙ මයං භවන්‌තං ගොතමං සරණං ගච්‌ඡාම ධම්‌මඤ්‌ච භික්‌ඛුසඞ්‌ඝඤ්‌ච. උපාසකෙ නො භවං ගොතමො ධාරෙතු අජ්‌ජතග්‌ගෙ පාණුපෙතෙ සරණං ගතෙ’’ති.
නගරවින්‌දෙය්‍යසුත්‌තං නිට්‌ඨිතං අට්‌ඨමං.
No comments:
Post a Comment