10. මාරතජ්‌ජනීයසුත්‌තං
මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න
සිංහල පරිවර්ථනය සදහා font මෙතැනින් ලබාගන්න
506. එවං මෙ සුතං – එකං සමයං ආයස්‌මා මහාමොග්‌ගල්‌ලානො භග්‌ගෙසු විහරති සුසුමාරගිරෙ භෙසකළාවනෙ මිගදායෙ. තෙන ඛො පන සමයෙන ආයස්‌මා මහාමොග්‌ගල්‌ලානො අබ්‌භොකාසෙ චඞ්‌කමති. තෙන ඛො පන සමයෙන මාරො පාපිමා ආයස්‌මතො මහාමොග්‌ගල්‌ලානස්‌ස කුච්‌ඡිගතො හොති කොට්‌ඨමනුපවිට්‌ඨො. අථ ඛො ආයස්‌මතො මහාමොග්‌ගල්‌ලානස්‌ස එතදහොසි – ‘‘කිං නු ඛො මෙ කුච්‌ඡි ගරුගරො විය [ගරු ගරු විය (සී. පී. ටීකායං පාඨන්‌තරං)]? මාසාචිතං මඤ්‌ඤෙ’’ති. අථ ඛො ආයස්‌මා මහාමොග්‌ගල්‌ලානො චඞ්‌කමා ඔරොහිත්‌වා විහාරං පවිසිත්‌වා පඤ්‌ඤත්‌තෙ ආසනෙ නිසීදි. නිසජ්‌ජ ඛො ආයස්‌මා මහාමොග්‌ගල්‌ලානො පච්‌චත්‌තං යොනිසො මනසාකාසි. අද්‌දසා ඛො ආයස්‌මා මහාමොග්‌ගල්‌ලානො මාරං පාපිමන්‌තං කුච්‌ඡිගතං කොට්‌ඨමනුපවිට්‌ඨං. දිස්‌වානමාරං පාපිමන්‌තං එතදවොච – ‘‘නික්‌ඛම, පාපිම; නික්‌ඛම, පාපිම! මා තථාගතං විහෙසෙසි, මා තථාගතසාවකං. මා තෙ අහොසි දීඝරත්‌තං අහිතාය දුක්‌ඛායා’’ති. අථ ඛො මාරස්‌ස පාපිමතො එතදහොසි – ‘‘අජානමෙව ඛො මං අයං සමණො අපස්‌සං එවමාහ – ‘නික්‌ඛම, පාපිම; නික්‌ඛම, පාපිම! මා තථාගතං විහෙසෙසි, මා තථාගතසාවකං. මා තෙ අහොසි දීඝරත්‌තං අහිතාය දුක්‌ඛායා’ති. යොපිස්‌ස සො සත්‌ථා සොපි මං නෙව ඛිප්‌පං ජානෙය්‍ය, කුතො පන [කුතො ච පන (ස්‍යා.)] මං අයං සාවකො ජානිස්‌සතී’’ති? අථ ඛො ආයස්‌මා මහාමොග්‌ගල්‌ලානො මාරං පාපිමන්‌තං එතදවොච – ‘‘එවම්‌පි ඛො තාහං, පාපිම, ජානාමි, මා ත්‌වං මඤ්‌ඤිත්‌ථො – ‘න මං ජානාතී’ති. මාරො ත්‌වමසි, පාපිම; තුය්‌හඤ්‌හි, පාපිම, එවං හොති – ‘අජානමෙව ඛො මං අයං සමණො අපස්‌සං එවමාහ – නික්‌ඛම, පාපිම; නික්‌ඛම, පාපිම! මා තථාගතං විහෙසෙසි, මා තථාගතසාවකං. මා තෙ අහොසි දීඝරත්‌තං අහිතාය දුක්‌ඛායාති. යොපිස්‌ස සො සත්‌ථා සොපි මං නෙව ඛිප්‌පං ජානෙය්‍ය, කුතො පන මං අයං සාවකො ජානිස්‌සතී’’’ති?
අථ ඛො මාරස්‌ස පාපිමතො එතදහොසි – ‘‘ජානමෙ ඛො මං අයං සමණො පස්‌සං එවමාහ – ‘නික්‌ඛම, පාපිම; නික්‌ඛම, පාපිම! මා තථාගතං විහෙසෙසි, මා තථාගතසාවකං. මා තෙ අහොසි දීඝරත්‌තං අහිතාය දුක්‌ඛායා’’’ති. අථ ඛො මාරො පාපිමා ආයස්‌මතො මහාමොග්‌ගල්‌ලානස්‌ස මුඛතො උග්‌ගන්‌ත්‌වා පච්‌චග්‌ගළෙ අට්‌ඨාසි.
507. අද්‌දසා ඛො ආයස්‌මා මහාමොග්‌ගල්‌ලානො මාරං පාපිමන්‌තං පච්‌චග්‌ගළෙ ඨිතං; දිස්‌වාන මාරං පාපිමන්‌තං එතදවොච – ‘එත්‌ථාපි ඛො තාහං, පාපිම, පස්‌සාමි; මා ත්‌වං මඤ්‌ඤිත්‌ථො ‘‘න මං පස්‌සතී’’ති. එසො ත්‌වං, පාපිම, පච්‌චග්‌ගළෙ ඨිතො. භූතපුබ්‌බාහං, පාපිම, දූසී නාම මාරො අහොසිං, තස්‌ස මෙ කාළී නාම භගිනී. තස්‌සා ත්‌වං පුත්‌තො. සො මෙ ත්‌වං භාගිනෙය්‍යො අහොසි. තෙන ඛො පන, පාපිම, සමයෙන කකුසන්‌ධො භගවා අරහං සම්‌මාසම්‌බුද්‌ධො ලොකෙ උප්‌පන්‌නො හොති. කකුසන්‌ධස්‌ස ඛො පන, පාපිම, භගවතො අරහතො සම්‌මාසම්‌බුද්‌ධස්‌ස විධුරසඤ්‌ජීවං නාම සාවකයුගං අහොසි අග්‌ගං භද්‌දයුගං. යාවතා ඛො පන, පාපිම, කකුසන්‌ධස්‌ස භගවතො අරහතො සම්‌මාසම්‌බුද්‌ධස්‌ස සාවකා. තෙසු න ච කොචි ආයස්‌මතා විධුරෙන සමසමො හොති යදිදං ධම්‌මදෙසනාය. ඉමිනා ඛො එවං [එතං (සී. ස්‍යා. පී.)], පාපිම, පරියායෙන ආයස්‌මතො විධුරස්‌ස විධුරොතෙව [විධුරස්‌ස විධුරො විධුරොත්‌වෙව (සී. ස්‍යා. කං. පී.)] සමඤ්‌ඤා උදපාදි.
‘‘ආයස්‌මා පන, පාපිම, සඤ්‌ජීවො අරඤ්‌ඤගතොපි රුක්‌ඛමූලගතොපි සුඤ්‌ඤාගාරගතොපි අප්‌පකසිරෙනෙව සඤ්‌ඤාවෙදයිතනිරොධං සමාපජ්‌ජති. භූතපුබ්‌බං, පාපිම, ආයස්‌මා සඤ්‌ජීවො අඤ්‌ඤතරස්‌මිං රුක්‌ඛමූලෙ සඤ්‌ඤාවෙදයිතනිරොධං සමාපන්‌නො නිසින්‌නො හොති. අද්‌දසංසු ඛො, පාපිම, ගොපාලකා පසුපාලකා කස්‌සකා පථාවිනො ආයස්‌මන්‌තං සඤ්‌ජීවං අඤ්‌ඤතරස්‌මිං රුක්‌ඛමූලෙ සඤ්‌ඤාවෙදයිතනිරොධං සමාපන්‌නං නිසින්‌නං; දිස්‌වාන තෙසං එතදහොසි – ‘අච්‌ඡරියං වත, භො, අබ්‌භුතං වත, භො! අයං සමණො නිසින්‌නකොව කාලඞ්‌කතො! හන්‌ද නං දහාමා’ති. අථ ඛො තෙ, පාපිම, ගොපාලකා පසුපාලකා කස්‌සකා පථාවිනො තිණඤ්‌ච කට්‌ඨඤ්‌ච ගොමයඤ්‌ච සංකඩ්‌ඪිත්‌වා ආයස්‌මතො සඤ්‌ජීවස්‌ස කායෙ උපචිනිත්‌වා අග්‌ගිං දත්‌වා පක්‌කමිංසු. අථ ඛො, පාපිම, ආයස්‌මා සඤ්‌ජීවො තස්‌සා රත්‌තියා අච්‌චයෙන තාය සමාපත්‌තියා වුට්‌ඨහිත්‌වා චීවරානි පප්‌ඵොටෙත්‌වා පුබ්‌බණ්‌හසමයං නිවාසෙත්‌වා පත්‌තචීවරමාදාය ගාමං පිණ්‌ඩාය පාවිසි. අද්‌දසංසු ඛො තෙ, පාපිම, ගොපාලකා පසුපාලකා කස්‌සකා පථාවිනො ආයස්‌මන්‌තං සඤ්‌ජීවං පිණ්‌ඩාය චරන්‌තං; දිස්‌වාන නෙසං එතදහොසි – ‘අච්‌ඡරියං වත, භො, අබ්‌භුතං වත, භො! අයං සමණො නිසින්‌නකොව කාලඞ්‌කතො, ස්‌වායං පටිසඤ්‌ජීවිතො’ති . ඉමිනා ඛො එවං, පාපිම, පරියායෙන ආයස්‌මතො සඤ්‌ජීවස්‌ස සඤ්‌ජීවොතෙව[සඤ්‌ජීවො සඤ්‌ජීවොත්‌වෙව (සී. ස්‍යා. කං. පී.)] සමඤ්‌ඤා උදපාදි.
508. ‘‘අථ ඛො, පාපිම, දූසිස්‌ස මාරස්‌ස එතදහොසි – ‘ඉමෙසං ඛො අහං භික්‌ඛූනං සීලවන්‌තානං කල්‍යාණධම්‌මානං නෙව ජානාමි ආගතිං වා ගතිං වා. යංනූනාහං බ්‍රාහ්‌මණගහපතිකෙ අන්‌වාවිසෙය්‍යං – එථ, තුම්‌හෙ භික්‌ඛූ සීලවන්‌තෙ කල්‍යාණධම්‌මෙ අක්‌කොසථ පරිභාසථ රොසෙථ විහෙසෙථ. අප්‌පෙව නාම තුම්‌හෙහි අක්‌කොසියමානානං පරිභාසියමානානං රොසියමානානං විහෙසියමානානං සියා චිත්‌තස්‌ස අඤ්‌ඤථත්‌තං, යථා තං දූසී මාරො ලභෙථ ඔතාර’න්‌ති. අථ ඛො තෙ, පාපිම, දූසී මාරො බ්‍රාහ්‌මණගහපතිකෙ අන්‌වාවිසි – ‘එථ, තුම්‌හෙ භික්‌ඛූ සීලවන්‌තෙ කල්‍යාණධම්‌මෙ අක්‌කොසථ පරිභාසථ රොසෙථ විහෙසෙථ. අප්‌පෙව නාම තුම්‌හෙහි අක්‌කොසියමානානං පරිභාසියමානානං රොසියමානානං විහෙසියමානානං සියා චිත්‌තස්‌ස අඤ්‌ඤථත්‌තං, යථා තං දූසී මාරො ලභෙථ ඔතාර’න්‌ති.
‘‘අථ ඛො තෙ, පාපිම, බ්‍රාහ්‌මණගහපතිකා අන්‌වාවිසිට්‌ඨා දූසිනා මාරෙන භික්‌ඛූ සීලවන්‌තෙ කල්‍යාණධම්‌මෙ අක්‌කොසන්‌ති පරිභාසන්‌ති රොසෙන්‌ති විහෙසෙන්‌ති – ‘ඉමෙ පන මුණ්‌ඩකා සමණකා ඉබ්‌භා කිණ්‌හා [කණ්‌හා (ස්‍යා. කං. ක.)] බන්‌ධුපාදාපච්‌චා ‘‘ඣායිනොස්‌මා ඣායිනොස්‌මා’’ති පත්‌තක්‌ඛන්‌ධා අධොමුඛා මධුරකජාතා ඣායන්‌ති පජ්‌ඣායන්‌ති නිජ්‌ඣායන්‌ති අපජ්‌ඣායන්‌ති. සෙය්‍යථාපි නාම උලූකො රුක්‌ඛසාඛායං මූසිකං මග්‌ගයමානො ඣායති පජ්‌ඣායති නිජ්‌ඣායති අපජ්‌ඣායති; එවමෙවිමෙ මුණ්‌ඩකා සමණකා ඉබ්‌භා කිණ්‌හා බන්‌ධුපාදාපච්‌චා ‘‘ඣායිනොස්‌මා ඣායිනොස්‌මා’’ති පත්‌තක්‌ඛන්‌ධා අධොමුඛා මධුරකජාතා ඣායන්‌ති පජ්‌ඣායන්‌ති නිජ්‌ඣායන්‌ති අපජ්‌ඣායන්‌ති. සෙය්‍යථාපි නාම කොත්‌ථු නදීතීරෙ මච්‌ඡෙ මග්‌ගයමානො ඣායති පජ්‌ඣායති නිජ්‌ඣායති අපජ්‌ඣායති; එවමෙවිමෙ මුණ්‌ඩකා සමණකා ඉබ්‌භා කිණ්‌හා බන්‌ධුපාදාපච්‌චා ‘‘ඣායිනොස්‌මා ඣායිනොස්‌මා’’ති පත්‌තක්‌ඛන්‌ධා අධොමුඛා මධුරකජාතා ඣායන්‌ති පජ්‌ඣායන්‌ති නිජ්‌ඣායන්‌ති අපජ්‌ඣායන්‌ති. සෙය්‍යථාපි නාම බිළාරො සන්‌ධිසමලසඞ්‌කටීරෙ මූසිකං මග්‌ගයමානො ඣායති පජ්‌ඣායති නිජ්‌ඣායති අපජ්‌ඣායති; එවමෙවිමෙ මුණ්‌ඩකා සමණකා ඉබ්‌භා කිණ්‌හා බන්‌ධුපාදාපච්‌චා ‘‘ඣායිනොස්‌මා ඣායිනොස්‌මා’’ති පත්‌තක්‌ඛන්‌ධා අධොමුඛා මධුරකජාතා ඣායන්‌ති පජ්‌ඣායන්‌ති නිජ්‌ඣායන්‌ති අපජ්‌ඣායන්‌ති. සෙය්‍යථාපි නාම ගද්‍රභො වහච්‌ඡින්‌නො සන්‌ධිසමලසඞ්‌කටීරෙ ඣායති පජ්‌ඣායති නිජ්‌ඣායති අපජ්‌ඣායති, එවමෙවිමෙ මුණ්‌ඩකා සමණකා ඉබ්‌භා කිණ්‌හා බන්‌ධුපාදාපච්‌චා ‘‘ඣායිනොස්‌මා ඣායිනොස්‌මා’’ති පත්‌තක්‌ඛන්‌ධා අධොමුඛා මධුරකජාතා ඣායන්‌ති පජ්‌ඣායන්‌ති නිජ්‌ඣායන්‌ති අපජ්‌ඣායන්‌තී’’ති.
‘‘යෙ ඛො පන, පාපිම, තෙන සමයෙන මනුස්‌සා කාලඞ්‌කරොන්‌ති යෙභුය්‍යෙන කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජන්‌ති.
509. ‘‘අථ ඛො, පාපිම, කකුසන්‌ධො භගවා අරහං සම්‌මාසම්‌බුද්‌ධො භික්‌ඛූ ආමන්‌තෙසි – ‘අන්‌වාවිට්‌ඨා ඛො, භික්‌ඛවෙ, බ්‍රාහ්‌මණගහපතිකා දූසිනා මාරෙන – එථ, තුම්‌හෙ භික්‌ඛූ සීලවන්‌තෙ කල්‍යාණධම්‌මෙ අක්‌කොසථ පරිභාසථ රොසෙථ විහෙසෙථ, අප්‌පෙව නාම තුම්‌හෙහි අක්‌කොසියමානානං පරිභාසියමානානං රොසියමානානං විහෙසියමානානං සියා චිත්‌තස්‌ස අඤ්‌ඤථත්‌තං, යථා තං දූසී මාරො ලභෙථ ඔතාර’න්‌ති. එථ, තුම්‌හෙ, භික්‌ඛවෙ, මෙත්‌තාසහගතෙන චෙතසා එකං දිසං ඵරිත්‌වා විහරථ, තථා දුතියං, තථා තතියං, තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං මෙත්‌තාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාබජ්‌ඣෙන ඵරිත්‌වා විහරථ. කරුණාසහගතෙන චෙතසා…පෙ.… මුදිතාසහගතෙන චෙතසා…පෙ.… උපෙක්‌ඛාසහගතෙන චෙතසා එකං දිසං ඵරිත්‌වා විහරථ, තථා දුතියං, තථා තතියං, තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං උපෙක්‌ඛාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාබජ්‌ඣෙන ඵරිත්‌වා විහරථා’ති.
‘‘අථ ඛො තෙ, පාපිම, භික්‌ඛූ කකුසන්‌ධෙන භගවතා අරහතා සම්‌මාසම්‌බුද්‌ධෙන එවං ඔවදියමානා එවං අනුසාසියමානා අරඤ්‌ඤගතාපි රුක්‌ඛමූලගතාපි සුඤ්‌ඤාගාරගතාපි මෙත්‌තාසහගතෙන චෙතසා එකං දිසං ඵරිත්‌වා විහරිංසු, තථා දුතියං, තථා තතියං, තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං මෙත්‌තාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාබජ්‌ඣෙන ඵරිත්‌වා විහරිංසු. කරුණාසහගතෙන චෙතසා…පෙ.… මුදිතාසහගතෙන චෙතසා…පෙ.… උපෙක්‌ඛාසහගතෙන චෙතසා එකං දිසං ඵරිත්‌වා විහරිංසු, තථා දුතියං, තථා තතියං, තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං උපෙක්‌ඛාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාබජ්‌ඣෙන ඵරිත්‌වා විහරිංසු .
510. ‘‘අථ ඛො, පාපිම, දූසිස්‌ස මාරස්‌ස එතදහොසි – ‘එවම්‌පි ඛො අහං කරොන්‌තො ඉමෙසං භික්‌ඛූනං සීලවන්‌තානං කල්‍යාණධම්‌මානං නෙව ජානාමි ආගතිං වා ගතිං වා, යංනූනාහං බ්‍රාහ්‌මණගහපතිකෙ අන්‌වාවිසෙය්‍යං – එථ, තුම්‌හෙ භික්‌ඛූ සීලවන්‌තෙ කල්‍යාණධම්‌මෙ සක්‌කරොථ ගරුං කරොථ මානෙථ පූජෙථ , අප්‌පෙව නාම තුම්‌හෙහි සක්‌කරියමානානං ගරුකරියමානානං මානියමානානං පූජියමානානං සියා චිත්‌තස්‌ස අඤ්‌ඤථත්‌තං, යථා තං දූසී මාරො ලභෙථ ඔතාර’න්‌ති . අථ ඛො තෙ, පාපිම, දූසී මාරො බ්‍රාහ්‌මණගහපතිකෙ අන්‌වාවිසි – ‘එථ, තුම්‌හෙ භික්‌ඛූ සීලවන්‌තෙ කල්‍යාණධම්‌මෙ සක්‌කරොථ ගරුං කරොථ මානෙථ පූජෙථ, අප්‌පෙව නාම තුම්‌හෙහි සක්‌කරියමානානං ගරුකරියමානානං මානියමානානං පූජියමානානං සියා චිත්‌තස්‌ස අඤ්‌ඤථත්‌තං, යථා තං දූසී මාරො ලභෙථ ඔතාර’න්‌ති. අථ ඛො තෙ, පාපිම, බ්‍රාහ්‌මණගහපතිකා අන්‌වාවිට්‌ඨා දූසිනා මාරෙන භික්‌ඛූ සීලවන්‌තෙ කල්‍යාණධම්‌මෙ සක්‌කරොන්‌ති ගරුං කරොන්‌ති මානෙන්‌ති පූජෙන්‌ති.
‘‘යෙ ඛො පන, පාපිම, තෙන සමයෙන මනුස්‌සා කාලඞ්‌කරොන්‌ති යෙභුය්‍යෙන කායස්‌ස භෙදා පරං මරණා සුගතිං සග්‌ගං ලොකං උපපජ්‌ජන්‌ති.
511. ‘‘අථ ඛො, පාපිම, කකුසන්‌ධො භගවා අරහං සම්‌මාසම්‌බුද්‌ධො භික්‌ඛූ ආමන්‌තෙසි – ‘අන්‌වාවිට්‌ඨා ඛො, භික්‌ඛවෙ, බ්‍රාහ්‌මණගහපතිකා දූසිනා මාරෙන – එථ, තුම්‌හෙ භික්‌ඛූ සීලවන්‌තෙ කල්‍යාණධම්‌මෙ සක්‌කරොථ ගරුං කරොථ මානෙථ පූජෙථ, අප්‌පෙව නාම තුම්‌හෙහි සක්‌කරියමානානං ගරුකරියමානානං මානියමානානං පූජියමානානං සියා චිත්‌තස්‌ස අඤ්‌ඤථත්‌තං, යථා තං දූසී මාරො ලභෙථ ඔතාරන්‌ති. එථ, තුම්‌හෙ, භික්‌ඛවෙ, අසුභානුපස්‌සිනො කායෙ විහරථ, ආහාරෙ පටිකූලසඤ්‌ඤිනො, සබ්‌බලොකෙ අනභිරතිසඤ්‌ඤිනො [අනභිරතසඤ්‌ඤීනො (සී. ස්‍යා. කං. පී.)], සබ්‌බසඞ්‌ඛාරෙසු අනිච්‌චානුපස්‌සිනො’ති.
‘‘අථ ඛො තෙ, පාපිම, භික්‌ඛූ කකුසන්‌ධෙන භගවතා අරහතා සම්‌මාසම්‌බුද්‌ධෙන එවං ඔවදියමානා එවං අනුසාසියමානා අරඤ්‌ඤගතාපි රුක්‌ඛමූලගතාපි සුඤ්‌ඤාගාරගතාපි අසුභානුපස්‌සිනො කායෙ විහරිංසු, ආහාරෙ පටිකූලසඤ්‌ඤිනො, සබ්‌බලොකෙ අනභිරතිසඤ්‌ඤිනො, සබ්‌බසඞ්‌ඛාරෙසු අනිච්‌චානුපස්‌සිනො.
512. ‘‘අථ ඛො, පාපිම, කකුසන්‌ධො භගවා අරහං සම්‌මාසම්‌බුද්‌ධො පුබ්‌බණ්‌හසමයං නිවාසෙත්‌වා පත්‌තචීවරමාදාය ආයස්‌මතා විධුරෙන පච්‌ඡාසමණෙන ගාමං පිණ්‌ඩාය පාවිසි. අථ ඛො, පාපිම, දූසී මාරො අඤ්‌ඤතරං කුමාරකං [කුමාරං (සී. පී.)] අන්‌වාවිසිත්‌වා සක්‌ඛරං ගහෙත්‌වා ආයස්‌මතො විධුරස්‌ස සීසෙ පහාරමදාසි; සීසං වොභින්‌දි [සීසං තෙ භින්‌දිස්‌සාමීති (ක.)]. අථ ඛො, පාපිම, ආයස්‌මා විධුරො භින්‌නෙන සීසෙන ලොහිතෙන ගළන්‌තෙන කකුසන්‌ධංයෙව භගවන්‌තං අරහන්‌තං සම්‌මාසම්‌බුද්‌ධං පිට්‌ඨිතො පිට්‌ඨිතො අනුබන්‌ධි. අථ ඛො , පාපිම, කකුසන්‌ධො භගවා අරහං සම්‌මාසම්‌බුද්‌ධො නාගාපලොකිතං අපලොකෙසි – ‘න වායං දූසී මාරො මත්‌තමඤ්‌ඤාසී’ති. සහාපලොකනාය ච පන, පාපිම, දූසී මාරො තම්‌හා ච ඨානා චවි මහානිරයඤ්‌ච උපපජ්‌ජි.
‘‘තස්‌ස ඛො පන, පාපිම, මහානිරයස්‌ස තයො නාමධෙය්‍යා හොන්‌ති – ඡඵස්‌සායතනිකො ඉතිපි, සඞ්‌කුසමාහතො ඉතිපි, පච්‌චත්‌තවෙදනියො ඉතිපි. අථ ඛො මං, පාපිම, නිරයපාලා උපසඞ්‌කමිත්‌වා එතදවොචුං – යදා ඛො තෙ [යතො තෙ (ක.)], මාරිස, සඞ්‌කුනා සඞ්‌කු හදයෙ සමාගච්‌ඡෙය්‍ය. අථ නං ත්‌වං ජානෙය්‍යාසි – ‘වස්‌සසහස්‌සං මෙ නිරයෙ පච්‌චමානස්‌සා’ති. සො ඛො අහං, පාපිම, බහූනි වස්‌සානි බහූනි වස්‌සසතානි බහූනි වස්‌සසහස්‌සානි තස්‌මිං මහානිරයෙ අපච්‌චිං. දසවස්‌සසහස්‌සානි තස්‌සෙව මහානිරයස්‌ස උස්‌සදෙ අපච්‌චිං වුට්‌ඨානිමං නාම වෙදනං වෙදියමානො. තස්‌ස මය්‌හං, පාපිම, එවරූපො කායො හොති, සෙය්‍යථාපි මනුස්‌සස්‌ස. එවරූපං සීසං හොති, සෙය්‍යථාපි මච්‌ඡස්‌ස.
‘‘කීදිසො නිරයො ආසි, යත්‌ථ දූසී අපච්‌චථ;
විධුරං සාවකමාසජ්‌ජ, කකුසන්‌ධඤ්‌ච බ්‍රාහ්‌මණං.
‘‘සතං ආසි අයොසඞ්‌කූ, සබ්‌බෙ පච්‌චත්‌තවෙදනා;
ඊදිසො නිරයො ආසි, යත්‌ථ දූසී අපච්‌චථ;
විධුරං සාවකමාසජ්‌ජ, කකුසන්‌ධඤ්‌ච බ්‍රාහ්‌මණං.
‘‘යො එතමභිජානාති, භික්‌ඛු බුද්‌ධස්‌ස සාවකො;
තාදිසං භික්‌ඛුමාසජ්‌ජ, කණ්‌හ දුක්‌ඛං නිගච්‌ඡසි.
‘‘මජ්‌ඣෙ සරස්‌ස තිට්‌ඨන්‌ති, විමානා කප්‌පට්‌ඨායිනො;
වෙළුරියවණ්‌ණා රුචිරා, අච්‌චිමන්‌තො පභස්‌සරා;
අච්‌ඡරා තත්‌ථ නච්‌චන්‌ති, පුථු නානත්‌තවණ්‌ණියො.
‘‘යො එතමභිජානාති, භික්‌ඛු බුද්‌ධස්‌ස සාවකො;
තාදිසං භික්‌ඛුමාසජ්‌ජ, කණ්‌හ දුක්‌ඛං නිගච්‌ඡසි.
‘‘යො වෙ බුද්‌ධෙන චොදිතො, භික්‌ඛු සඞ්‌ඝස්‌ස පෙක්‌ඛතො;
මිගාරමාතුපාසාදං, පාදඞ්‌ගුට්‌ඨෙන කම්‌පයි.
‘‘යො එතමභිජානාති, භික්‌ඛු බුද්‌ධස්‌ස සාවකො;
තාදිසං භික්‌ඛුමාසජ්‌ජ, කණ්‌හ දුක්‌ඛං නිගච්‌ඡසි.
‘‘යො වෙජයන්‌තං පාසාදං, පාදඞ්‌ගුට්‌ඨෙන කම්‌පයි;
ඉද්‌ධිබලෙනුපත්‌ථද්‌ධො, සංවෙජෙසි ච දෙවතා.
‘‘යො එතමභිජානාති, භික්‌ඛු බුද්‌ධස්‌ස සාවකො;
තාදිසං භික්‌ඛුමාසජ්‌ජ, කණ්‌හ දුක්‌ඛං නිගච්‌ඡසි.
‘‘යො වෙජයන්‌තපාසාදෙ, සක්‌කං සො පරිපුච්‌ඡති;
අපි වාසව ජානාසි, තණ්‌හාක්‌ඛයවිමුත්‌තියො;
තස්‌ස සක්‌කො වියාකාසි, පඤ්‌හං පුට්‌ඨො යථාතථං.
‘‘යො එතමභිජානාති, භික්‌ඛු බුද්‌ධස්‌ස සාවකො;
තාදිසං භික්‌ඛුමාසජ්‌ජ, කණ්‌හ දුක්‌ඛං නිගච්‌ඡසි.
‘‘යො බ්‍රහ්‌මං පරිපුච්‌ඡති, සුධම්‌මායාභිතො සභං;
අජ්‌ජාපි ත්‍යාවුසො දිට්‌ඨි, යා තෙ දිට්‌ඨි පුරෙ අහු;
පස්‌සසි වීතිවත්‌තන්‌තං, බ්‍රහ්‌මලොකෙ පභස්‌සරං.
‘‘තස්‌ස බ්‍රහ්‌මා වියාකාසි, අනුපුබ්‌බං යථාතථං;
න මෙ මාරිස සා දිට්‌ඨි, යා මෙ දිට්‌ඨි පුරෙ අහු.
‘‘පස්‌සාමි වීතිවත්‌තන්‌තං, බ්‍රහ්‌මලොකෙ පභස්‌සරං;
සොහං අජ්‌ජ කථං වජ්‌ජං, අහං නිච්‌චොම්‌හි සස්‌සතො.
‘‘යො එතමභිජානාති, භික්‌ඛු බුද්‌ධස්‌ස සාවකො;
තාදිසං භික්‌ඛුමාසජ්‌ජ, කණ්‌හ දුක්‌ඛං නිගච්‌ඡසි.
‘‘යො මහාමෙරුනො කූටං, විමොක්‌ඛෙන අඵස්‌සයි;
වනං පුබ්‌බවිදෙහානං, යෙ ච භූමිසයා නරා.
‘‘යො එතමභිජානාති, භික්‌ඛු බුද්‌ධස්‌ස සාවකො;
තාදිසං භික්‌ඛුමාසජ්‌ජ, කණ්‌හ දුක්‌ඛං නිගච්‌ඡසි.
‘‘න වෙ අග්‌ගි චෙතයති [වෙඨයති (සී.)], ‘අහං බාලං ඩහාමී’ති;
බාලො ච ජලිතං අග්‌ගිං, ආසජ්‌ජ නං ස ඩය්‌හති.
‘‘එවමෙව තුවං මාර, ආසජ්‌ජ නං තථාගතං;
සයං ඩහිස්‌සසි අත්‌තානං, බාලො අග්‌ගිංව සංඵුසං.
‘‘අපුඤ්‌ඤං පසවී මාරො, ආසජ්‌ජ නං තථාගතං;
කින්‌නු මඤ්‌ඤසි පාපිම, න මෙ පාපං විපච්‌චති.
‘‘කරොතො චීයති පාපං, චිරරත්‌තාය අන්‌තක;
මාර නිබ්‌බින්‌ද බුද්‌ධම්‌හා, ආසං මාකාසි භික්‌ඛුසු.
‘‘ඉති මාරං අතජ්‌ජෙසි, භික්‌ඛු භෙසකළාවනෙ;
තතො සො දුම්‌මනො යක්‌ඛො, නතත්‌ථෙවන්‌තරධායථා’’ති.
මාරතජ්‌ජනීයසුත්‌තං නිට්‌ඨිතං දසමං.
No comments:
Post a Comment