4. සාමගාමසුත්‌තං
මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න
සිංහල පරිවර්ථනය සදහා font මෙතැනින් ලබාගන්න
41. එවං මෙ සුතං – එකං සමයං භගවා සක්‌කෙසු විහරති සාමගාමෙ. තෙන ඛො පන සමයෙන නිගණ්‌ඨො නාටපුත්‌තො [නාථපුත්‌තො (සී. පී.)] පාවායං අධුනාකාලඞ්‌කතො [කාලකතො (සී. ස්‍යා. කං. පී.)] හොති. තස්‌ස කාලඞ්‌කිරියාය භින්‌නා නිගණ්‌ඨා ද්‌වෙධිකජාතා [ද්‌වෙළ්‌හකජාතා (ස්‍යා. කං. ක.)] භණ්‌ඩනජාතා කලහජාතා විවාදාපන්‌නා අඤ්‌ඤමඤ්‌ඤං මුඛසත්‌තීහි විතුදන්‌තා විහරන්‌ති – ‘‘න ත්‌වං ඉමං ධම්‌මවිනයං ආජානාසි, අහං ඉමං ධම්‌මවිනයං ආජානාමි. කිං ත්‌වං ඉමං ධම්‌මවිනයං ආජානිස්‌සසි! මිච්‌ඡාපටිපන්‌නො ත්‌වමසි, අහමස්‌මි සම්‌මාපටිපන්‌නො. සහිතං මෙ, අසහිතං තෙ. පුරෙවචනීයං පච්‌ඡා අවච , පච්‌ඡාවචනීයං පුරෙ අවච. අධිචිණ්‌ණං [අවිචිණ්‌ණං (සී. පී.)] තෙ විපරාවත්‌තං. ආරොපිතො තෙ වාදො. නිග්‌ගහිතොසි, චර වාදප්‌පමොක්‌ඛාය; නිබ්‌බෙඨෙහි වා සචෙ පහොසී’’ති. වධොයෙව ඛො [වධොයෙවෙකො (ස්‍යා. කං. ක.)] මඤ්‌ඤෙ නිගණ්‌ඨෙසු නාටපුත්‌තියෙසු වත්‌තති. යෙපි නිගණ්‌ඨස්‌ස නාටපුත්‌තස්‌ස සාවකා ගිහී ඔදාතවසනා තෙපි නිගණ්‌ඨෙසු නාටපුත්‌තියෙසු නිබ්‌බින්‌නරූපා [නිබ්‌බින්‌දරූපා (ස්‍යා. කං. ක.)] විරත්‌තරූපා පටිවානරූපා යථා තං දුරක්‌ඛාතෙ ධම්‌මවිනයෙ දුප්‌පවෙදිතෙ අනිය්‍යානිකෙ අනුපසමසංවත්‌තනිකෙ අසම්‌මාසම්‌බුද්‌ධප්‌පවෙදිතෙ භින්‌නථූපෙ අප්‌පටිසරණෙ.
42. අථ ඛො චුන්‌දො සමණුද්‌දෙසො පාවායං වස්‌සංවුට්‌ඨො [වස්‌සංවුත්‌ථො (සී. ස්‍යා. කං. පී.)] යෙන සාමගාමො යෙනායස්‌මා ආනන්‌දො තෙනුපසඞ්‌කමි; උපසඞ්‌කමිත්‌වා ආයස්‌මන්‌තං ආනන්‌දං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො චුන්‌දො සමණුද්‌දෙසො ආයස්‌මන්‌තං ආනන්‌දං එතදවොච – ‘‘නිගණ්‌ඨො, භන්‌තෙ, නාටපුත්‌තො පාවායං අධුනාකාලඞ්‌කතො. තස්‌ස කාලඞ්‌කිරියාය භින්‌නා නිගණ්‌ඨා ද්‌වෙධිකජාතා…පෙ.… භින්‌නථූපෙ අප්‌පටිසරණෙ’’ති. එවං වුත්‌තෙ, ආයස්‌මා ආනන්‌දො චුන්‌දං සමණුද්‌දෙසං එතදවොච – ‘‘අත්‌ථි ඛො ඉදං, ආවුසො චුන්‌ද, කථාපාභතං භගවන්‌තං දස්‌සනාය. ආයාම, ආවුසො චුන්‌ද, යෙන භගවා තෙනුපසඞ්‌කමිස්‌සාම; උපසඞ්‌කමිත්‌වා එතමත්‌ථං භගවතො ආරොචෙස්‌සාමා’’ති. ‘‘එවං, භන්‌තෙ’’ති ඛො චුන්‌දො සමණුද්‌දෙසො ආයස්‌මතො ආනන්‌දස්‌ස පච්‌චස්‌සොසි.
අථ ඛො ආයස්‌මා ච ආනන්‌දො චුන්‌දො ච සමණුද්‌දෙසො යෙන භගවා තෙනුපසඞ්‌කමිංසු; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදිංසු. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච – ‘‘අයං, භන්‌තෙ, චුන්‌දො සමණුද්‌දෙසො එවමාහ – ‘නිගණ්‌ඨො , භන්‌තෙ, නාටපුත්‌තො පාවායං අධුනාකාලඞ්‌කතො. තස්‌ස කාලඞ්‌කිරියාය භින්‌නා නිගණ්‌ඨා ද්‌වෙධිකජාතා…පෙ.… භින්‌නථූපෙ අප්‌පටිසරණෙ’ති. තස්‌ස මය්‌හං, භන්‌තෙ, එවං හොති – ‘මාහෙව භගවතො අච්‌චයෙන සඞ්‌ඝෙ විවාදො උප්‌පජ්‌ජි; ස්‌වාස්‌ස [සො (සී. පී.), ස්‌වායං (ක.)] විවාදො බහුජනාහිතාය බහුජනාසුඛාය බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සාන’’’න්‌ති.
43. ‘‘තං කිං මඤ්‌ඤසි, ආනන්‌ද, යෙ වො මයා ධම්‌මා අභිඤ්‌ඤා දෙසිතා, සෙය්‍යථිදං – චත්‌තාරො සතිපට්‌ඨානා චත්‌තාරො සම්‌මප්‌පධානා චත්‌තාරො ඉද්‌ධිපාදා පඤ්‌චින්‌ද්‍රියානි පඤ්‌ච බලානි සත්‌ත බොජ්‌ඣඞ්‌ගා අරියො අට්‌ඨඞ්‌ගිකො මග්‌ගො, පස්‌සසි නො ත්‌වං, ආනන්‌ද, ඉමෙසු ධම්‌මෙසු ද්‌වෙපි භික්‌ඛූ නානාවාදෙ’’ති? ‘‘යෙ මෙ, භන්‌තෙ, ධම්‌මා භගවතා අභිඤ්‌ඤා දෙසිතා, සෙය්‍යථිදං – චත්‌තාරො සතිපට්‌ඨානා චත්‌තාරො සම්‌මප්‌පධානා චත්‌තාරො ඉද්‌ධිපාදා පඤ්‌චින්‌ද්‍රියානි පඤ්‌ච බලානි සත්‌ත බොජ්‌ඣඞ්‌ගා අරියො අට්‌ඨඞ්‌ගිකො මග්‌ගො, නාහං පස්‌සාමි ඉමෙසු ධම්‌මෙසු ද්‌වෙපි භික්‌ඛූ නානාවාදෙ. යෙ ච ඛො [සන්‌ති ච ඛො (ස්‍යා. කං.), සන්‌ති ච (ක.)], භන්‌තෙ, පුග්‌ගලා භගවන්‌තං පතිස්‌සයමානරූපා විහරන්‌ති තෙපි භගවතො අච්‌චයෙන සඞ්‌ඝෙ විවාදං ජනෙය්‍යුං අජ්‌ඣාජීවෙ වා අධිපාතිමොක්‌ඛෙ වා. ස්‌වාස්‌ස[සොස්‌ස (සී. පී.), ස්‌වායං (ක.)] විවාදො බහුජනාහිතාය බහුජනාසුඛාය බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සාන’’න්‌ති. අප්‌පමත්‌තකො සො, ආනන්‌ද, විවාදො යදිදං – අජ්‌ඣාජීවෙ වා අධිපාතිමොක්‌ඛෙ වා. මග්‌ගෙ වා හි, ආනන්‌ද, පටිපදාය වා සඞ්‌ඝෙ විවාදො උප්‌පජ්‌ජමානො උප්‌පජ්‌ජෙය්‍ය; ස්‌වාස්‌ස විවාදො බහුජනාහිතාය බහුජනාසුඛාය බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං.
44. ‘‘ඡයිමානි, ආනන්‌ද, විවාදමූලානි. කතමානි ඡ? ඉධානන්‌ද, භික්‌ඛු කොධනො හොති උපනාහී. යො සො, ආනන්‌ද, භික්‌ඛු කොධනො හොති උපනාහී සො සත්‌ථරිපි අගාරවො විහරති අප්‌පතිස්‌සො, ධම්‌මෙපි අගාරවො විහරති අප්‌පතිස්‌සො, සඞ්‌ඝෙපි අගාරවො විහරති අප්‌පතිස්‌සො, සික්‌ඛායපි න පරිපූරකාරී හොති. යො සො, ආනන්‌ද, භික්‌ඛු සත්‌ථරි අගාරවො විහරති අප්‌පතිස්‌සො, ධම්‌මෙ… සඞ්‌ඝෙ අගාරවො විහරති අප්‌පතිස්‌සො, සික්‌ඛාය න පරිපූරකාරී හොති, සො සඞ්‌ඝෙ විවාදං ජනෙති; යො හොති විවාදො බහුජනාහිතාය බහුජනාසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. එවරූපඤ්‌චෙ තුම්‌හෙ, ආනන්‌ද, විවාදමූලං අජ්‌ඣත්‌තං වා බහිද්‌ධා වා සමනුපස්‌සෙය්‍යාථ, තත්‍ර තුම්‌හෙ, ආනන්‌ද, තස්‌සෙව පාපකස්‌ස විවාදමූලස්‌ස පහානාය වායමෙය්‍යාථ. එවරූපඤ්‌චෙ තුම්‌හෙ, ආනන්‌ද, විවාදමූලං අජ්‌ඣත්‌තං වා බහිද්‌ධා වා න සමනුපස්‌සෙය්‍යාථ. තත්‍ර තුම්‌හෙ, ආනන්‌ද, තස්‌සෙව පාපකස්‌ස විවාදමූලස්‌ස ආයතිං අනවස්‌සවාය පටිපජ්‌ජෙය්‍යාථ. එවමෙතස්‌ස පාපකස්‌ස විවාදමූලස්‌ස පහානං හොති, එවමෙතස්‌ස පාපකස්‌ස විවාදමූලස්‌ස ආයතිං අනවස්‌සවො හොති.
45. ‘‘පුන චපරං, ආනන්‌ද, භික්‌ඛු මක්‌ඛී හොති පළාසී…පෙ.… ඉස්‌සුකී හොති මච්‌ඡරී…පෙ.… සඨො හොති මායාවී…පෙ.… පාපිච්‌ඡො හොති මිච්‌ඡාදිට්‌ඨි[මිච්‌ඡාදිට්‌ඨී (ස්‍යා. කං. පී. ක.)] …පෙ.… සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී. යො සො, ආනන්‌ද, භික්‌ඛු සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී සො සත්‌ථරිපි අගාරවො විහරති අප්‌පතිස්‌සො, ධම්‌මෙපි අගාරවො විහරති අප්‌පතිස්‌සො, සඞ්‌ඝෙපි අගාරවො විහරති අප්‌පතිස්‌සො, සික්‌ඛායපි න පරිපූරකාරී හොති. යො සො, ආනන්‌ද, භික්‌ඛු සත්‌ථරි අගාරවො විහරති අප්‌පතිස්‌සො, ධම්‌මෙ… සඞ්‌ඝෙ… සික්‌ඛාය න පරිපූරකාරී හොති සො සඞ්‌ඝෙ විවාදං ජනෙති; යො හොති විවාදො බහුජනාහිතාය බහුජනාසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. එවරූපඤ්‌චෙ තුම්‌හෙ, ආනන්‌ද, විවාදමූලං අජ්‌ඣත්‌තං වා බහිද්‌ධා වා සමනුපස්‌සෙය්‍යාථ. තත්‍ර තුම්‌හෙ, ආනන්‌ද, තස්‌සෙව පාපකස්‌ස විවාදමූලස්‌ස පහානාය වායමෙය්‍යාථ. එවරූපඤ්‌චෙ තුම්‌හෙ, ආනන්‌ද, විවාදමූලං අජ්‌ඣත්‌තං වා බහිද්‌ධා වා න සමනුපස්‌සෙය්‍යාථ, තත්‍ර තුම්‌හෙ, ආනන්‌ද, තස්‌සෙව පාපකස්‌ස විවාදමූලස්‌ස ආයතිං අනවස්‌සවාය පටිපජ්‌ජෙය්‍යාථ. එවමෙතස්‌ස පාපකස්‌ස විවාදමූලස්‌ස පහානං හොති , එවමෙතස්‌ස පාපකස්‌ස විවාදමූලස්‌ස ආයතිං අනවස්‌සවො හොති. ඉමානි ඛො, ආනන්‌ද, ඡ විවාදමූලානි.
46. ‘‘චත්‌තාරිමානි , ආනන්‌ද, අධිකරණානි. කතමානි චත්‌තාරි? විවාදාධිකරණං, අනුවාදාධිකරණං, ආපත්‌තාධිකරණං, කිච්‌චාධිකරණං – ඉමානි ඛො, ආනන්‌ද, චත්‌තාරි අධිකරණානි. සත්‌ත ඛො පනිමෙ, ආනන්‌ද, අධිකරණසමථා – උප්‌පන්‌නුප්‌පන්‌නානං අධිකරණානං සමථාය වූපසමාය සම්‌මුඛාවිනයො දාතබ්‌බො, සතිවිනයො දාතබ්‌බො, අමූළ්‌හවිනයො දාතබ්‌බො, පටිඤ්‌ඤාය කාරෙතබ්‌බං, යෙභුය්‍යසිකා, තස්‌සපාපියසිකා, තිණවත්‌ථාරකො.
47. ‘‘කථඤ්‌චානන්‌ද, සම්‌මුඛාවිනයො හොති? ඉධානන්‌ද, භික්‌ඛූ විවදන්‌ති ධම්‌මොති වා අධම්‌මොති වා විනයොති වා අවිනයොති වා. තෙහානන්‌ද, භික්‌ඛූහි සබ්‌බෙහෙව සමග්‌ගෙහි සන්‌නිපතිතබ්‌බං. සන්‌නිපතිත්‌වා ධම්‌මනෙත්‌ති සමනුමජ්‌ජිතබ්‌බා . ධම්‌මනෙත්‌තිං සමනුමජ්‌ජිත්‌වා යථා තත්‌ථ සමෙති තථා තං අධිකරණං වූපසමෙතබ්‌බං. එවං ඛො, ආනන්‌ද, සම්‌මුඛාවිනයො හොති; එවඤ්‌ච පනිධෙකච්‌චානං අධිකරණානං වූපසමො හොති යදිදං – සම්‌මුඛාවිනයෙන.
48. ‘‘කථඤ්‌චානන්‌ද, යෙභුය්‍යසිකා හොති? තෙ චෙ, ආනන්‌ද, භික්‌ඛූ න සක්‌කොන්‌ති තං අධිකරණං තස්‌මිං ආවාසෙ වූපසමෙතුං. තෙහානන්‌ද, භික්‌ඛූහි යස්‌මිං ආවාසෙ බහුතරා භික්‌ඛූ සො ආවාසො ගන්‌තබ්‌බො. තත්‌ථ සබ්‌බෙහෙව සමග්‌ගෙහි සන්‌නිපතිතබ්‌බං. සන්‌නිපතිත්‌වා ධම්‌මනෙත්‌ති සමනුමජ්‌ජිතබ්‌බා. ධම්‌මනෙත්‌තිං සමනුමජ්‌ජිත්‌වා යථා තත්‌ථ සමෙති තථා තං අධිකරණං වූපසමෙතබ්‌බං. එවං ඛො, ආනන්‌ද, යෙභුය්‍යසිකා හොති, එවඤ්‌ච පනිධෙකච්‌චානං අධිකරණානං වූපසමො හොති යදිදං – යෙභුය්‍යසිකාය.
49. ‘‘කථඤ්‌චානන්‌ද, සතිවිනයො හොති? ඉධානන්‌ද, භික්‌ඛූ භික්‌ඛුං එවරූපාය ගරුකාය ආපත්‌තියා චොදෙන්‌ති පාරාජිකෙන වා පාරාජිකසාමන්‌තෙන වා – ‘සරතායස්‌මා එවරූපිං [එවරූපං (සී. ස්‍යා. කං. පී.) එවරූපාය-ඉති වුච්‌චමානවචනෙන සමෙති. විනයෙනපි සංසන්‌දෙතබ්‌බං] ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති? සො එවමාහ – ‘න ඛො අහං, ආවුසො, සරාමි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති. තස්‌ස ඛො[තස්‌ස ඛො එවං (සබ්‌බත්‌ථ)], ආනන්‌ද, භික්‌ඛුනො සතිවිනයො දාතබ්‌බො. එවං ඛො, ආනන්‌ද, සතිවිනයො හොති, එවඤ්‌ච පනිධෙකච්‌චානං අධිකරණානං වූපසමො හොති යදිදං – සතිවිනයෙන.
50. ‘‘කථඤ්‌චානන්‌ද , අමූළ්‌හවිනයො හොති? ඉධානන්‌ද, භික්‌ඛූ භික්‌ඛුං එවරූපාය ගරුකාය ආපත්‌තියා චොදෙන්‌ති පාරාජිකෙන වා පාරාජිකසාමන්‌තෙන වා – ‘සරතායස්‌මා එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති? (සො එවමාහ – ‘න ඛො අහං, ආවුසො, සරාමි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති. තමෙනං සො නිබ්‌බෙඨෙන්‌තං අතිවෙඨෙති – ‘ඉඞ්‌ඝායස්‌මා සාධුකමෙව ජානාහි යදි සරසි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති.) [( ) එත්‌ථන්‌තරෙ පාඨො චූළව. 237 නත්‌ථි තස්‌සපාපියසිකාවාරෙඑවෙතෙන භවිතබ්‌බං] සො එවමාහ – ‘අහං ඛො, ආවුසො, උම්‌මාදං පාපුණිං චෙතසො විපරියාසං. තෙන මෙ උම්‌මත්‌තකෙන බහුං අස්‌සාමණකං අජ්‌ඣාචිණ්‌ණං භාසිතපරික්‌කන්‌තං [භාසිතපරිකන්‌තං (සී. ස්‍යා. කං. පී.)]. නාහං තං සරාමි. මූළ්‌හෙන මෙ එතං කත’න්‌ති. තස්‌ස ඛො [තස්‌ස ඛො එවං (ස්‍යා. කං. ක.)], ආනන්‌ද, භික්‌ඛුනො අමූළ්‌හවිනයො දාතබ්‌බො. එවං ඛො, ආනන්‌ද , අමූළ්‌හවිනයො හොති, එවඤ්‌ච පනිධෙකච්‌චානං අධිකරණානං වූපසමො හොති යදිදං – අමූළ්‌හවිනයෙන.
51. ‘‘කථඤ්‌චානන්‌ද, පටිඤ්‌ඤාතකරණං හොති? ඉධානන්‌ද, භික්‌ඛු චොදිතො වා අචොදිතො වා ආපත්‌තිං සරති, විවරති උත්‌තානීකරොති [උත්‌තානිං කරොති (ක.)]. තෙන, ආනන්‌ද, භික්‌ඛුනා වුඩ්‌ඪතරං භික්‌ඛුං [වුඩ්‌ඪතරො භික්‌ඛු (සී. ස්‍යා. කං. පී.)] උපසඞ්‌කමිත්‌වා එකංසං චීවරං කත්‌වා පාදෙ වන්‌දිත්‌වා උක්‌කුටිකං නිසීදිත්‌වා අඤ්‌ජලිං පග්‌ගහෙත්‌වා එවමස්‌ස වචනීයො – ‘අහං, භන්‌තෙ, ඉත්‌ථන්‌නාමං ආපත්‌තිං ආපන්‌නො, තං පටිදෙසෙමී’ති. සො එවමාහ – ‘පස්‌සසී’ති? ‘ආම පස්‌සාමී’ති. ‘ආයතිං සංවරෙය්‍යාසී’ති. (‘සංවරිස්‌සාමී’ති.) [( ) විනයෙ නත්‌ථි] එවං ඛො, ආනන්‌ද, පටිඤ්‌ඤාතකරණං හොති, එවඤ්‌ච පනිධෙකච්‌චානං අධිකරණානං වූපසමො හොති යදිදං – පටිඤ්‌ඤාතකරණෙන.
52. ‘‘කථඤ්‌චානන්‌ද , තස්‌සපාපියසිකා හොති? ඉධානන්‌ද, භික්‌ඛු භික්‌ඛුං එවරූපාය ගරුකාය ආපත්‌තියා චොදෙති පාරාජිකෙන වා පාරාජිකසාමන්‌තෙන වා – ‘සරතායස්‌මා එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති? සො එවමාහ – ‘න ඛො අහං, ආවුසො, සරාමි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති. තමෙනං සො නිබ්‌බෙඨෙන්‌තං අතිවෙඨෙති – ‘ඉඞ්‌ඝායස්‌මා සාධුකමෙව ජානාහි යදි සරසි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති. සො එවමාහ – ‘න ඛො අහං, ආවුසො, සරාමි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා; සරාමි ච ඛො අහං, ආවුසො, එවරූපිං අප්‌පමත්‌තිකං ආපත්‌තිං ආපජ්‌ජිතා’ති. තමෙනං සො නිබ්‌බෙඨෙන්‌තං අතිවෙඨෙති – ‘ඉඞ්‌ඝායස්‌මා සාධුකමෙව ජානාහි යදි සරසි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති? සො එවමාහ – ‘ඉමඤ්‌හි නාමාහං, ආවුසො, අප්‌පමත්‌තිකං ආපත්‌තිං ආපජ්‌ජිත්‌වා අපුට්‌ඨො පටිජානිස්‌සාමි. කිං පනාහං එවරූපිං ගරුකං ආපත්‌තිං ආපජ්‌ජිත්‌වා පාරාජිකං වා පාරාජිකසාමන්‌තං වා පුට්‌ඨො නපටිජානිස්‌සාමී’ති? සො එවමාහ – ‘ඉමඤ්‌හි නාම ත්‌වං, ආවුසො , අප්‌පමත්‌තිකං ආපත්‌තිං ආපජ්‌ජිත්‌වා අපුට්‌ඨො නපටිජානිස්‌සසි, කිං පන ත්‌වං එවරූපිං ගරුකං ආපත්‌තිං ආපජ්‌ජිත්‌වා පාරාජිකං වා පාරාජිකසාමන්‌තං වා පුට්‌ඨො [අපුට්‌ඨො (ස්‍යා. කං. ක.)] පටිජානිස්‌සසි? ඉඞ්‌ඝායස්‌මා සාධුකමෙව ජානාහි යදි සරසි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති. සො එවමාහ – ‘සරාමි ඛො අහං, ආවුසො, එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා. දවා මෙ එතං වුත්‌තං, රවා මෙ එතං වුත්‌තං – නාහං තං සරාමි එවරූපිං ගරුකං ආපත්‌තිං ආපජ්‌ජිතා පාරාජිකං වා පාරාජිකසාමන්‌තං වා’ති. එවං ඛො, ආනන්‌ද, තස්‌සපාපියසිකා හොති, එවඤ්‌ච පනිධෙකච්‌චානං අධිකරණානං වූපසමො හොති යදිදං – තස්‌සපාපියසිකාය.
53. ‘‘කථඤ්‌චානන්‌ද , තිණවත්‌ථාරකො හොති? ඉධානන්‌ද, භික්‌ඛූනං භණ්‌ඩනජාතානං කලහජාතානං විවාදාපන්‌නානං විහරතං බහුං අස්‌සාමණකං අජ්‌ඣාචිණ්‌ණං හොති භාසිතපරික්‌කන්‌තං. තෙහානන්‌ද, භික්‌ඛූහි සබ්‌බෙහෙව සමග්‌ගෙහි සන්‌නිපතිතබ්‌බං. සන්‌නිපතිත්‌වා එකතොපක්‌ඛිකානං භික්‌ඛූනං බ්‍යත්‌තෙන[බ්‍යත්‌තතරෙන (සී. පී. ක.)] භික්‌ඛුනා උට්‌ඨායාසනා එකංසං චීවරං කත්‌වා අඤ්‌ජලිං පණාමෙත්‌වා සඞ්‌ඝො ඤාපෙතබ්‌බො –
‘සුණාතු මෙ, භන්‌තෙ, සඞ්‌ඝො. ඉදං අම්‌හාකං භණ්‌ඩනජාතානං කලහජාතානං විවාදාපන්‌නානං විහරතං බහුං අස්‌සාමණකං අජ්‌ඣාචිණ්‌ණං භාසිතපරික්‌කන්‌තං . යදි සඞ්‌ඝස්‌ස පත්‌තකල්‌ලං, අහං යා චෙව ඉමෙසං ආයස්‌මන්‌තානං ආපත්‌ති යා ච අත්‌තනො ආපත්‌ති, ඉමෙසඤ්‌චෙව ආයස්‌මන්‌තානං අත්‌ථාය අත්‌තනො ච අත්‌ථාය, සඞ්‌ඝමජ්‌ඣෙ තිණවත්‌ථාරකෙන දෙසෙය්‍යං, ඨපෙත්‌වා ථුල්‌ලවජ්‌ජං ඨපෙත්‌වා ගිහිපටිසංයුත්‌ත’’’න්‌ති.
‘‘අථාපරෙසං එකතොපක්‌ඛිකානං භික්‌ඛූනං බ්‍යත්‌තෙන භික්‌ඛුනා උට්‌ඨායාසනා එකංසං චීවරං කත්‌වා අඤ්‌ජලිං පණාමෙත්‌වා සඞ්‌ඝො ඤාපෙතබ්‌බො –
‘සුණාතු මෙ, භන්‌තෙ, සඞ්‌ඝො. ඉදං අම්‌හාකං භණ්‌ඩනජාතානං කලහජාතානං විවාදාපන්‌නානං විහරතං බහුං අස්‌සාමණකං අජ්‌ඣාචිණ්‌ණං භාසිතපරික්‌කන්‌තං. යදි සඞ්‌ඝස්‌ස පත්‌තකල්‌ලං, අහං යා චෙව ඉමෙසං ආයස්‌මන්‌තානං ආපත්‌ති යා ච අත්‌තනො ආපත්‌ති, ඉමෙසඤ්‌චෙව ආයස්‌මන්‌තානං අත්‌ථාය අත්‌තනො ච අත්‌ථාය, සඞ්‌ඝමජ්‌ඣෙ තිණවත්‌ථාරකෙන දෙසෙය්‍යං, ඨපෙත්‌වා ථුල්‌ලවජ්‌ජං ඨපෙත්‌වා ගිහිපටිසංයුත්‌ත’’’න්‌ති.
‘‘එවං ඛො, ආනන්‌ද, තිණවත්‌ථාරකො හොති, එවඤ්‌ච පනිධෙකච්‌චානං අධිකරණානං වූපසමො හොති යදිදං – තිණවත්‌ථාරකෙන.
54. ‘‘ඡයිමෙ , ආනන්‌ද, ධම්‌මා සාරණීයා පියකරණා ගරුකරණා සඞ්‌ගහාය අවිවාදාය සාමග්‌ගියා එකීභාවාය සංවත්‌තන්‌ති. කතමෙ ඡ? ඉධානන්‌ද, භික්‌ඛුනො මෙත්‌තං කායකම්‌මං පච්‌චුපට්‌ඨිතං හොති සබ්‍රහ්‌මචාරීසු ආවි චෙව රහො ච. අයම්‌පි ධම්‌මො සාරණීයො පියකරණො ගරුකරණො සඞ්‌ගහාය අවිවාදාය සාමග්‌ගියා එකීභාවාය සංවත්‌තති.
‘‘පුන චපරං, ආනන්‌ද, භික්‌ඛුනො මෙත්‌තං වචීකම්‌මං පච්‌චුපට්‌ඨිතං හොති සබ්‍රහ්‌මචාරීසු ආවි චෙව රහො ච. අයම්‌පි ධම්‌මො සාරණීයො පියකරණො ගරුකරණොසඞ්‌ගහාය අවිවාදාය සාමග්‌ගියා එකීභාවාය සංවත්‌තති.
‘‘පුන චපරං, ආනන්‌ද, භික්‌ඛුනො මෙත්‌තං මනොකම්‌මං පච්‌චුපට්‌ඨිතං හොති සබ්‍රහ්‌මචාරීසු ආවි චෙව රහො ච. අයම්‌පි ධම්‌මො සාරණීයො පියකරණො ගරුකරණො සඞ්‌ගහාය අවිවාදාය සාමග්‌ගියා එකීභාවාය සංවත්‌තති.
‘‘පුන චපරං, ආනන්‌ද, භික්‌ඛු – යෙ තෙ ලාභා ධම්‌මිකා ධම්‌මලද්‌ධා අන්‌තමසො පත්‌තපරියාපන්‌නමත්‌තම්‌පි තථාරූපෙහි ලාභෙහි – අපටිවිභත්‌තභොගී හොති, සීලවන්‌තෙහි සබ්‍රහ්‌මචාරීහි සාධාරණභොගී. අයම්‌පි ධම්‌මො සාරණීයො පියකරණො ගරුකරණො සඞ්‌ගහාය අවිවාදාය සාමග්‌ගියා එකීභාවාය සංවත්‌තති.
‘‘පුන චපරං, ආනන්‌ද, භික්‌ඛු – යානි තානි සීලානි අඛණ්‌ඩානි අච්‌ඡිද්‌දානි අසබලානි අකම්‌මාසානි භුජිස්‌සානි විඤ්‌ඤුප්‌පසත්‌ථානි අපරාමට්‌ඨානි සමාධිසංවත්‌තනිකානි තථාරූපෙසු සීලෙසු – සීලසාමඤ්‌ඤගතො විහරති සබ්‍රහ්‌මචාරීහි ආවි චෙව රහො ච. අයම්‌පි ධම්‌මො සාරණීයො පියකරණො ගරුකරණො සඞ්‌ගහාය අවිවාදාය සාමග්‌ගියා එකීභාවාය සංවත්‌තති.
‘‘පුන චපරං, ආනන්‌ද, භික්‌ඛු – යායං දිට්‌ඨි අරියා නිය්‍යානිකා නිය්‍යාති තක්‌කරස්‌ස සම්‌මා දුක්‌ඛක්‌ඛයා තථාරූපාය දිට්‌ඨියා – දිට්‌ඨිසාමඤ්‌ඤගතො විහරති සබ්‍රහ්‌මචාරීහි ආවි චෙව රහො ච. අයම්‌පි ධම්‌මො සාරණීයො පියකරණො ගරුකරණො සඞ්‌ගහාය අවිවාදාය සාමග්‌ගියා එකීභාවාය සංවත්‌තති. ඉමෙ ඛො, ආනන්‌ද, ඡ සාරණීයා ධම්‌මා පියකරණා ගරුකරණා සඞ්‌ගහාය අවිවාදාය සාමග්‌ගියා එකීභාවාය සංවත්‌තන්‌ති.
‘‘ඉමෙ චෙ තුම්‌හෙ, ආනන්‌ද, ඡ සාරණීයෙ ධම්‌මෙ සමාදාය වත්‌තෙය්‍යාථ, පස්‌සථ නො තුම්‌හෙ, ආනන්‌ද, තං වචනපථං අණුං වා ථූලං වා යං තුම්‌හෙ නාධිවාසෙය්‍යාථා’’ති? ‘‘නො හෙතං, භන්‌තෙ’’. ‘‘තස්‌මාතිහානන්‌ද , ඉමෙ ඡ සාරණීයෙ ධම්‌මෙ සමාදාය වත්‌තථ. තං වො භවිස්‌සති දීඝරත්‌තං හිතාය සුඛායා’’ති.
ඉදමවොච භගවා. අත්‌තමනො ආයස්‌මා ආනන්‌දො භගවතො භාසිතං අභිනන්‌දීති.
සාමගාමසුත්‌තං නිට්‌ඨිතං චතුත්‌ථං.
No comments:
Post a Comment