5. අනුමානසුත්‌තං
මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න
සිංහල පරිවර්ථනය සදහා font මෙතැනින් ලබාගන්න
181. එවං මෙ සුතං – එකං සමයං ආයස්‌මා මහාමොග්‌ගල්‌ලානො භග්‌ගෙසු විහරති සුසුමාරගිරෙ[සුංසුමාරගිරෙ (සී. ස්‍යා. පී.)]භෙසකළාවනෙ මිගදායෙ. තත්‍ර ඛො ආයස්‌මා මහාමොග්‌ගල්‌ලානො භික්‌ඛූ ආමන්‌තෙසි – ‘‘ආවුසො, භික්‌ඛවො’’ති. ‘‘ආවුසො’’ති ඛො තෙ භික්‌ඛූ ආයස්‌මතො මහාමොග්‌ගල්‌ලානස්‌ස පච්‌චස්‌සොසුං. ආයස්‌මා මහාමොග්‌ගල්‌ලානො එතදවොච –
‘‘පවාරෙති චෙපි, ආවුසො, භික්‌ඛු – ‘වදන්‌තු මං ආයස්‌මන්‌තො, වචනීයොම්‌හි ආයස්‌මන්‌තෙහී’ති, සො ච හොති දුබ්‌බචො, දොවචස්‌සකරණෙහි ධම්‌මෙහි සමන්‌නාගතො, අක්‌ඛමො අප්‌පදක්‌ඛිණග්‌ගාහී අනුසාසනිං, අථ ඛො නං සබ්‍රහ්‌මචාරී න චෙව වත්‌තබ්‌බං මඤ්‌ඤන්‌ති, න ච අනුසාසිතබ්‌බං මඤ්‌ඤන්‌ති, න ච තස්‌මිං පුග්‌ගලෙ විස්‌සාසං ආපජ්‌ජිතබ්‌බං මඤ්‌ඤන්‌ති.
‘‘කතමෙ චාවුසො, දොවචස්‌සකරණා ධම්‌මා? ඉධාවුසො, භික්‌ඛු පාපිච්‌ඡො හොති, පාපිකානං ඉච්‌ඡානං වසං ගතො. යම්‌පාවුසො, භික්‌ඛු පාපිච්‌ඡො හොති, පාපිකානං ඉච්‌ඡානං වසං ගතො – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු අත්‌තුක්‌කංසකො හොති පරවම්‌භී. යම්‌පාවුසො, භික්‌ඛු අත්‌තුක්‌කංසකො හොති පරවම්‌භී – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු කොධනො හොති කොධාභිභූතො. යම්‌පාවුසො, භික්‌ඛු කොධනො හොති කොධාභිභූතො – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො , භික්‌ඛු කොධනො හොති කොධහෙතු උපනාහී. යම්‌පාවුසො, භික්‌ඛු කොධනො හොති කොධහෙතු උපනාහී – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු කොධනො හොති කොධහෙතු අභිසඞ්‌ගී. යම්‌පාවුසො, භික්‌ඛු කොධනො හොති කොධහෙතු අභිසඞ්‌ගී – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු කොධනො හොති කොධසාමන්‌තා [කොධසාමන්‌තං (ස්‍යා. පී. ක.)] වාචං නිච්‌ඡාරෙතා. යම්‌පාවුසො, භික්‌ඛු කොධනො හොති කොධසාමන්‌තා වාචං නිච්‌ඡාරෙතා – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු චොදිතො [චුදිතො (සී. ස්‍යා. පී.)] චොදකෙන චොදකං පටිප්‌ඵරති. යම්‌පාවුසො, භික්‌ඛු චොදිතො චොදකෙන චොදකං පටිප්‌ඵරති – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු චොදිතො චොදකෙන චොදකං අපසාදෙති. යම්‌පාවුසො, භික්‌ඛු චොදිතො චොදකෙන චොදකං අපසාදෙති – අයම්‌පි ධම්‌මො දොවචස්‌සකරණො.
‘‘පුන චපරං , ආවුසො, භික්‌ඛු චොදිතො චොදකෙන චොදකස්‌ස පච්‌චාරොපෙති. යම්‌පාවුසො, භික්‌ඛු චොදිතො චොදකෙන චොදකස්‌ස පච්‌චාරොපෙති – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු චොදිතො චොදකෙන අඤ්‌ඤෙනඤ්‌ඤං පටිචරති, බහිද්‌ධා කථං අපනාමෙති, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති. යම්‌පාවුසො, භික්‌ඛු චොදිතො චොදකෙන අඤ්‌ඤෙනඤ්‌ඤං පටිචරති, බහිද්‌ධා කථං අපනාමෙති, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු චොදිතො චොදකෙන අපදානෙ න සම්‌පායති. යම්‌පාවුසො, භික්‌ඛු චොදිතො චොදකෙන අපදානෙ න සම්‌පායති – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු මක්‌ඛී හොති පළාසී. යම්‌පාවුසො, භික්‌ඛු මක්‌ඛී හොති පළාසී – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු ඉස්‌සුකී හොති මච්‌ඡරී. යම්‌පාවුසො, භික්‌ඛු ඉස්‌සුකී හොති මච්‌ඡරී – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු සඨො හොති මායාවී. යම්‌පාවුසො, භික්‌ඛු සඨො හොති මායාවී – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු ථද්‌ධො හොති අතිමානී. යම්‌පාවුසො, භික්‌ඛු ථද්‌ධො හොති අතිමානී – අයම්‌පි ධම්‌මො දොවචස්‌සකරණො.
‘‘පුන චපරං, ආවුසො, භික්‌ඛු සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී. යම්‌පාවුසො, භික්‌ඛු සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී – අයම්‌පි ධම්‌මො දොවචස්‌සකරණො. ඉමෙ වුච්‌චන්‌තාවුසො, දොවචස්‌සකරණා ධම්‌මා.
182. ‘‘නො චෙපි, ආවුසො, භික්‌ඛු පවාරෙති – ‘වදන්‌තු මං ආයස්‌මන්‌තො, වචනීයොම්‌හි ආයස්‌මන්‌තෙහී’ති, සො ච හොති සුවචො, සොවචස්‌සකරණෙහි ධම්‌මෙහි සමන්‌නාගතො, ඛමො පදක්‌ඛිණග්‌ගාහී අනුසාසනිං, අථ ඛො නං සබ්‍රහ්‌මචාරී වත්‌තබ්‌බඤ්‌චෙව මඤ්‌ඤන්‌ති, අනුසාසිතබ්‌බඤ්‌ච මඤ්‌ඤන්‌ති, තස්‌මිඤ්‌ච පුග්‌ගලෙ විස්‌සාසං ආපජ්‌ජිතබ්‌බං මඤ්‌ඤන්‌ති.
‘‘කතමෙ චාවුසො, සොවචස්‌සකරණා ධම්‌මා? ඉධාවුසො, භික්‌ඛු න පාපිච්‌ඡො හොති, න පාපිකානං ඉච්‌ඡානං වසං ගතො. යම්‌පාවුසො, භික්‌ඛු න පාපිච්‌ඡො හොති න පාපිකානං ඉච්‌ඡානං වසං ගතො – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු අනත්‌තුක්‌කංසකො හොති අපරවම්‌භී. යම්‌පාවුසො, භික්‌ඛු අනත්‌තුක්‌කංසකො හොති අපරවම්‌භී – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු න කොධනො හොති න කොධාභිභූතො. යම්‌පාවුසො, භික්‌ඛු න කොධනො හොති න කොධාභිභූතො – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු න කොධනො හොති න කොධහෙතු උපනාහී. යම්‌පාවුසො, භික්‌ඛු න කොධනො හොති න කොධහෙතු උපනාහී – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු න කොධනො හොති න කොධහෙතු අභිසඞ්‌ගී. යම්‌පාවුසො, භික්‌ඛු න කොධනො හොති න කොධහෙතු අභිසඞ්‌ගී – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු න කොධනො හොති න කොධසාමන්‌තා වාචං නිච්‌ඡාරෙතා. යම්‌පාවුසො , භික්‌ඛු න කොධනො හොති න කොධසාමන්‌තා වාචං නිච්‌ඡාරෙතා – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු චොදිතො චොදකෙන චොදකං නප්‌පටිප්‌ඵරති. යම්‌පාවුසො, භික්‌ඛු චොදිතො චොදකෙන චොදකං නප්‌පටිප්‌ඵරති – අයම්‌පි ධම්‌මො සොවචස්‌සකරණො .
‘‘පුන චපරං, ආවුසො, භික්‌ඛු චොදිතො චොදකෙන චොදකං න අපසාදෙති. යම්‌පාවුසො, භික්‌ඛු චොදිතො චොදකෙන චොදකං න අපසාදෙති – අයම්‌පි ධම්‌මොසොවචස්‌සකරණො.
‘‘පුන චපරං, ආවුසො, භික්‌ඛු චොදිතො චොදකෙන චොදකස්‌ස න පච්‌චාරොපෙති. යම්‌පාවුසො, භික්‌ඛු චොදිතො චොදකෙන චොදකස්‌ස න පච්‌චාරොපෙති – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු චොදිතො චොදකෙන න අඤ්‌ඤෙනඤ්‌ඤං පටිචරති, න බහිද්‌ධා කථං අපනාමෙති, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති. යම්‌පාවුසො, භික්‌ඛු චොදිතො චොදකෙන න අඤ්‌ඤෙනඤ්‌ඤං පටිචරති, න බහිද්‌ධා කථං අපනාමෙති, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු චොදිතො චොදකෙන අපදානෙ සම්‌පායති. යම්‌පාවුසො, භික්‌ඛු චොදිතො චොදකෙන අපදානෙ සම්‌පායති – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු අමක්‌ඛී හොති අපළාසී. යම්‌පාවුසො, භික්‌ඛු අමක්‌ඛී හොති අපළාසී – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු අනිස්‌සුකී හොති අමච්‌ඡරී. යම්‌පාවුසො, භික්‌ඛු අනිස්‌සුකී හොති අමච්‌ඡරී – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු අසඨො හොති අමායාවී. යම්‌පාවුසො, භික්‌ඛු අසඨො හොති අමායාවී – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු අත්‌ථද්‌ධො හොති අනතිමානී. යම්‌පාවුසො, භික්‌ඛු අත්‌ථද්‌ධො හොති අනතිමානී – අයම්‌පි ධම්‌මො සොවචස්‌සකරණො.
‘‘පුන චපරං, ආවුසො, භික්‌ඛු අසන්‌දිට්‌ඨිපරාමාසී හොති අනාධානග්‌ගාහී සුප්‌පටිනිස්‌සග්‌ගී. යම්‌පාවුසො, භික්‌ඛු අසන්‌දිට්‌ඨිපරාමාසී හොති, අනාධානග්‌ගාහී සුප්‌පටිනිස්‌සග්‌ගී – අයම්‌පි ධම්‌මො සොවචස්‌සකරණො. ඉමෙ වුච්‌චන්‌තාවුසො, සොවචස්‌සකරණා ධම්‌මා.
183. ‘‘තත්‍රාවුසො , භික්‌ඛුනා අත්‌තනාව අත්‌තානං එවං අනුමිනිතබ්‌බං [අනුමානිතබ්‌බං (සී.)] – ‘යො ඛ්‌වායං පුග්‌ගලො පාපිච්‌ඡො, පාපිකානං ඉච්‌ඡානං වසං ගතො, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං පාපිච්‌ඡො පාපිකානං ඉච්‌ඡානං වසං ගතො, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න පාපිච්‌ඡො භවිස්‌සාමි, න පාපිකානං ඉච්‌ඡානං වසං ගතො’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො අත්‌තුක්‌කංසකො පරවම්‌භී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං අත්‌තුක්‌කංසකො පරවම්‌භී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අනත්‌තුක්‌කංසකො භවිස්‌සාමි අපරවම්‌භී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො කොධනො කොධාභිභූතො, අයං මෙ පුග්‌ගලො අප්‌පියො අමනාපො. අහඤ්‌චෙව ඛො පනස්‌සං කොධනො කොධාභිභූතො, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධාභිභූතො’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො කොධනො කොධහෙතු උපනාහී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං කොධනො කොධහෙතු උපනාහී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධහෙතු උපනාහී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො කොධනො කොධහෙතු අභිසඞ්‌ගී, අයං මෙ පුග්‌ගලො අප්‌පියො අමනාපො; අහඤ්‌චෙවඛො පනස්‌සං කොධනො කොධහෙතු අභිසඞ්‌ගී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධහෙතු අභිසඞ්‌ගී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො කොධනො කොධසාමන්‌තා වාචං නිච්‌ඡාරෙතා, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං කොධනො කොධසාමන්‌තා වාචං නිච්‌ඡාරෙතා, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධසාමන්‌තා වාචං නිච්‌ඡාරෙස්‌සාමී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො චොදිතො චොදකෙන චොදකං පටිප්‌ඵරති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන චොදකං පටිප්‌ඵරෙය්‍යං , අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන චොදකං නප්‌පටිප්‌ඵරිස්‌සාමී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො චොදිතො චොදකෙන චොදකං අපසාදෙති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන චොදකං අපසාදෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන චොදකං න අපසාදෙස්‌සාමී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො චොදිතො චොදකෙන චොදකස්‌ස පච්‌චාරොපෙති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන චොදකස්‌ස පච්‌චාරොපෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන චොදකස්‌ස න පච්‌චාරොපෙස්‌සාමී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො චොදිතො චොදකෙන අඤ්‌ඤෙනඤ්‌ඤං පටිචරති, බහිද්‌ධා කථං අපනාමෙති, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන අඤ්‌ඤෙනඤ්‌ඤං පටිචරෙය්‍යං, බහිද්‌ධා කථං අපනාමෙය්‍යං , කොපඤ්‌ච දොසඤ්‌ච අප්‌පච්‌චයඤ්‌ච පාතුකරෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන න අඤ්‌ඤෙනඤ්‌ඤං පටිචරිස්‌සාමි, න බහිද්‌ධා කථං අපනාමෙස්‌සාමි, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරිස්‌සාමී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො චොදිතො චොදකෙන අපදානෙ න සම්‌පායති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන අපදානෙ න සම්‌පායෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන අපදානෙ සම්‌පායිස්‌සාමී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො මක්‌ඛී පළාසී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං මක්‌ඛී පළාසී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අමක්‌ඛී භවිස්‌සාමි අපළාසී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො ඉස්‌සුකී මච්‌ඡරී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සංඉස්‌සුකී මච්‌ඡරී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අනිස්‌සුකී භවිස්‌සාමි අමච්‌ඡරී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො සඨො මායාවී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං සඨො මායාවී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අසඨො භවිස්‌සාමි අමායාවී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො ථද්‌ධො අතිමානී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං ථද්‌ධො අතිමානී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අත්‌ථද්‌ධො භවිස්‌සාමි අනතිමානී’ති චිත්‌තං උප්‌පාදෙතබ්‌බං.
‘‘‘යො ඛ්‌වායං පුග්‌ගලො සන්‌දිට්‌ඨිපරාමාසී ආධානග්‌ගාහී දුප්‌පටිනිස්‌සග්‌ගී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං සන්‌දිට්‌ඨිපරාමාසී ආධානග්‌ගාහී දුප්‌පටිනිස්‌සග්‌ගී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අසන්‌දිට්‌ඨිපරාමාසී භවිස්‌සාමි අනාධානග්‌ගාහී සුප්‌පටිනිස්‌සග්‌ගී’ති චිත්‌තං උප්‌පාදෙතබ්‌බං.
184. ‘‘තත්‍රාවුසො , භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි පාපිච්‌ඡො, පාපිකානං ඉච්‌ඡානං වසං ගතො’ති? සචෙ, ආවුසො , භික්‌ඛු පච්‌චවෙක්‌ඛමානො එවං ජානාති – ‘පාපිච්‌ඡො ඛොම්‌හි, පාපිකානං ඉච්‌ඡානං වසං ගතො’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි පාපිච්‌ඡො, න පාපිකානං ඉච්‌ඡානං වසං ගතො’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි අත්‌තුක්‌කංසකො පරවම්‌භී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘අත්‌තුක්‌කංසකො ඛොම්‌හි පරවම්‌භී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අනත්‌තුක්‌කංසකො ඛොම්‌හි අපරවම්‌භී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධාභිභූතො’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘කොධනො ඛොම්‌හි කොධාභිභූතො’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි කොධනො කොධාභිභූතො’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධහෙතු උපනාහී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති ‘කොධනො ඛොම්‌හි කොධහෙතු උපනාහී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති ‘න ඛොම්‌හි කොධනො කොධහෙතු උපනාහී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධහෙතු අභිසඞ්‌ගී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘කොධනො ඛොම්‌හි කොධහෙතු අභිසඞ්‌ගී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි කොධනො කොධහෙතු අභිසඞ්‌ගී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධසාමන්‌තා වාචං නිච්‌ඡාරෙතා’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘කොධනො ඛොම්‌හි කොධසාමන්‌තා වාචං නිච්‌ඡාරෙතා’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි කොධනො කොධසාමන්‌තා වාචං නිච්‌ඡාරෙතා’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන චොදකං පටිප්‌ඵරාමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති ‘චොදිතො ඛොම්‌හි චොදකෙන චොදකං පටිප්‌ඵරාමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකං නප්‌පටිප්‌ඵරාමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන චොදකං අපසාදෙමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති ‘චොදිතො ඛොම්‌හි චොදකෙන චොදකං අපසාදෙමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකංන අපසාදෙමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන චොදකස්‌ස පච්‌චාරොපෙමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකස්‌ස පච්‌චාරොපෙමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකස්‌ස න පච්‌චාරොපෙමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන අඤ්‌ඤෙනඤ්‌ඤං පටිචරාමි, බහිද්‌ධා කථං අපනාමෙමි, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන අඤ්‌ඤෙනඤ්‌ඤං පටිචරාමි, බහිද්‌ධා කථං අපනාමෙමි, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන න අඤ්‌ඤෙනඤ්‌ඤං පටිචරාමි, න බහිද්‌ධා කථං අපනාමෙමි, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරොමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන අපදානෙ න සම්‌පායාමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන අපදානෙ න සම්‌පායාමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන අපදානෙ සම්‌පායාමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං , ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි මක්‌ඛී පළාසී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘මක්‌ඛී ඛොම්‌හි පළාසී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අමක්‌ඛී ඛොම්‌හි අපළාසී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි ඉස්‌සුකී මච්‌ඡරී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘ඉස්‌සුකී ඛොම්‌හි මච්‌ඡරී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අනිස්‌සුකී ඛොම්‌හි අමච්‌ඡරී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි සඨො මායාවී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘සඨො ඛොම්‌හි මායාවී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අසඨො ඛොම්‌හි අමායාවී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි ථද්‌ධො අතිමානී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘ථද්‌ධො ඛොම්‌හි අතිමානී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අත්‌ථද්‌ධො ඛොම්‌හි අනතිමානී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි සන්‌දිට්‌ඨිපරාමාසී ආධානග්‌ගාහී දුප්‌පටිනිස්‌සග්‌ගී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘සන්‌දිට්‌ඨිපරාමාසී ඛොම්‌හි ආධානග්‌ගාහී දුප්‌පටිනිස්‌සග්‌ගී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අසන්‌දිට්‌ඨිපරාමාසී ඛොම්‌හි අනාධානග්‌ගාහී සුප්‌පටිනිස්‌සග්‌ගී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘සචෙ , ආවුසො, භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ අප්‌පහීනෙ අත්‌තනි සමනුපස්‌සති, තෙනාවුසො, භික්‌ඛුනා සබ්‌බෙසංයෙව ඉමෙසං පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ පහීනෙ අත්‌තනි සමනුපස්‌සති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං, අහොරත්‌තානුසික්‌ඛිනා කුසලෙසු ධම්‌මෙසු.
‘‘සෙය්‍යථාපි, ආවුසො, ඉත්‌ථී වා පුරිසො වා, දහරො යුවා මණ්‌ඩනජාතිකො, ආදාසෙ වා පරිසුද්‌ධෙ පරියොදාතෙ, අච්‌ඡෙ වා උදකපත්‌තෙ, සකං මුඛනිමිත්‌තං පච්‌චවෙක්‌ඛමානො, සචෙ තත්‌ථ පස්‌සති රජං වා අඞ්‌ගණං වා, තස්‌සෙව රජස්‌ස වා අඞ්‌ගණස්‌ස වා පහානාය වායමති; නො චෙ තත්‌ථ පස්‌සති රජං වා අඞ්‌ගණං වා, තෙනෙව අත්‌තමනො හොති – ‘ලාභා වත මෙ, පරිසුද්‌ධං වත මෙ’ති. එවමෙව ඛො, ආවුසො, සචෙ භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ අප්‌පහීනෙ අත්‌තනි සමනුපස්‌සති, තෙනාවුසො, භික්‌ඛුනා සබ්‌බෙසංයෙව ඉමෙසං පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ පහීනෙ අත්‌තනි සමනුපස්‌සති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං, අහොරත්‌තානුසික්‌ඛිනා කුසලෙසු ධම්‌මෙසූ’’ති.
ඉදමවොචායස්‌මා මහාමොග්‌ගල්‌ලානො. අත්‌තමනා තෙ භික්‌ඛූ ආයස්‌මතො මහාමොග්‌ගල්‌ලානස්‌ස භාසිතං අභිනන්‌දුන්‌ති.
අනුමානසුත්‌තං නිට්‌ඨිතං පඤ්‌චමං.
No comments:
Post a Comment