7. චූළතණ්‌හාසඞ්‌ඛයසුත්‌තං
390. එවං මෙ සුතං – එකං සමයං භගවා සාවත්‌ථියං විහරති පුබ්‌බාරාමෙ මිගාරමාතුපාසාදෙ. අථ ඛො සක්‌කො දෙවානමින්‌දො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං අට්‌ඨාසි. එකමන්‌තං ඨිතො ඛො සක්‌කො දෙවානමින්‌දො භගවන්‌තං එතදවොච – ‘‘කිත්‌තාවතා නු ඛො, භන්‌තෙ, භික්‌ඛු සංඛිත්‌තෙන තණ්‌හාසඞ්‌ඛයවිමුත්‌තො හොති අච්‌චන්‌තනිට්‌ඨො අච්‌චන්‌තයොගක්‌ඛෙමී අච්‌චන්‌තබ්‍රහ්‌මචාරී අච්‌චන්‌තපරියොසානො සෙට්‌ඨො දෙවමනුස්‌සාන’’න්‌ති?
‘‘ඉධ, දෙවානමින්‌ද, භික්‌ඛුනො සුතං හොති – ‘සබ්‌බෙ ධම්‌මා නාලං අභිනිවෙසායා’ති. එවඤ්‌චෙතං, දෙවානමින්‌ද, භික්‌ඛුනො සුතං හොති – ‘සබ්‌බෙ ධම්‌මා නාලං අභිනිවෙසායා’ති. සො සබ්‌බං ධම්‌මං අභිජානාති; සබ්‌බං ධම්‌මං අභිඤ්‌ඤාය සබ්‌බං ධම්‌මං පරිජානාති; සබ්‌බං ධම්‌මං පරිඤ්‌ඤාය යං කිඤ්‌චි වෙදනං වෙදෙති – සුඛං වා දුක්‌ඛං වා අදුක්‌ඛමසුඛං වා, සො තාසු වෙදනාසු අනිච්‌චානුපස්‌සී විහරති, විරාගානුපස්‌සී විහරති, නිරොධානුපස්‌සී විහරති, පටිනිස්‌සග්‌ගානුපස්‌සී විහරති. සො තාසු වෙදනාසු අනිච්‌චානුපස්‌සී විහරන්‌තො, විරාගානුපස්‌සී විහරන්‌තො, නිරොධානුපස්‌සී විහරන්‌තො, පටිනිස්‌සග්‌ගානුපස්‌සී විහරන්‌තො න කිඤ්‌චි ලොකෙ උපාදියති. අනුපාදියං න පරිතස්‌සති, අපරිතස්‌සං පච්‌චත්‌තඤ්‌ඤෙව පරිනිබ්‌බායති – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’තිපජානාති. එත්‌තාවතා ඛො, දෙවානමින්‌ද, භික්‌ඛු සංඛිත්‌තෙන තණ්‌හාසඞ්‌ඛයවිමුත්‌තො හොති අච්‌චන්‌තනිට්‌ඨො අච්‌චන්‌තයොගක්‌ඛෙමී අච්‌චන්‌තබ්‍රහ්‌මචාරී අච්‌චන්‌තපරියොසානො සෙට්‌ඨො දෙවමනුස්‌සාන’’න්‌ති.
අථ ඛො සක්‌කො දෙවානමින්‌දො භගවතො භාසිතං අභිනන්‌දිත්‌වා අනුමොදිත්‌වා භගවන්‌තං අභිවාදෙත්‌වා පදක්‌ඛිණං කත්‌වා තත්‌ථෙවන්‌තරධායි.
391. තෙන ඛො පන සමයෙන ආයස්‌මා මහාමොග්‌ගල්‌ලානො භගවතො අවිදූරෙ නිසින්‌නො හොති. අථ ඛො ආයස්‌මතො මහාමොග්‌ගල්‌ලානස්‌ස එතදහොසි – ‘‘කිං නු ඛො සො යක්‌ඛො භගවතො භාසිතං අභිසමෙච්‌ච අනුමොදි උදාහු නො; යංනූනාහං තං යක්‌ඛං ජානෙය්‍යං – යදි වා සො යක්‌ඛො භගවතො භාසිතං අභිසමෙච්‌චඅනුමොදි යදි වා නො’’ති? අථ ඛො ආයස්‌මා මහාමොග්‌ගල්‌ලානො – සෙය්‍යථාපි නාම බලවා පුරිසො සමිඤ්‌ජිතං වා බාහං පසාරෙය්‍ය, පසාරිතං වා බාහං සමිඤ්‌ජෙය්‍ය, එවමෙව – පුබ්‌බාරාමෙ මිගාරමාතුපාසාදෙ අන්‌තරහිතො දෙවෙසු තාවතිංසෙසු පාතුරහොසි. තෙන ඛො පන සමයෙන සක්‌කො දෙවානමින්‌දො එකපුණ්‌ඩරීකෙ උය්‍යානෙ දිබ්‌බෙහි පඤ්‌චහි තූරියසතෙහි [තුරියසතෙහි (සී. ස්‍යා. කං. පී.)] සමප්‌පිතො සමඞ්‌ගීභූතො පරිචාරෙති. අද්‌දසා ඛො සක්‌කො දෙවානමින්‌දො ආයස්‌මන්‌තං මහාමොග්‌ගල්‌ලානං දූරතොව ආගච්‌ඡන්‌තං. දිස්‌වාන තානි දිබ්‌බානි පඤ්‌ච තූරියසතානි පටිප්‌පණාමෙත්‌වා යෙනායස්‌මා මහාමොග්‌ගල්‌ලානො තෙනුපසඞ්‌කමි; උපසඞ්‌කමිත්‌වා ආයස්‌මන්‌තං මහාමොග්‌ගල්‌ලානං එතදවොච – ‘‘එහි ඛො, මාරිස මොග්‌ගල්‌ලාන, ස්‌වාගතං, මාරිස මොග්‌ගල්‌ලාන! චිරස්‌සං ඛො, මාරිස මොග්‌ගල්‌ලාන, ඉමං පරියායං අකාසි යදිදං ඉධාගමනාය. නිසීද, මාරිස මොග්‌ගල්‌ලාන, ඉදමාසනං පඤ්‌ඤත්‌ත’’න්‌ති. නිසීදි ඛො ආයස්‌මා මහාමොග්‌ගල්‌ලානො පඤ්‌ඤත්‌තෙ ආසනෙ. සක්‌කොපි ඛො දෙවානමින්‌දො අඤ්‌ඤතරං නීචං ආසනං ගහෙත්‌වා එකමන්‌තං නිසීදි. එකමන්‌තං නිසින්‌නං ඛො සක්‌කං දෙවානමින්‌දං ආයස්‌මා මහාමොග්‌ගල්‌ලානො එතදවොච – ‘‘යථා කථං පන ඛො, කොසිය, භගවා සංඛිත්‌තෙන තණ්‌හාසඞ්‌ඛයවිමුත්‌තිං අභාසි? සාධු මයම්‌පි එතිස්‌සා කථාය භාගිනො අස්‌සාම සවනායා’’ති.
392. ‘‘මයං ඛො, මාරිස මොග්‌ගල්‌ලාන, බහුකිච්‌චා බහුකරණීයා – අප්‌පෙව සකෙන කරණීයෙන, අපි ච දෙවානංයෙව තාවතිංසානං කරණීයෙන. අපි ච, මාරිස මොග්‌ගල්‌ලාන, සුස්‌සුතංයෙව හොති සුග්‌ගහිතං සුමනසිකතං සූපධාරිතං, යං නො ඛිප්‌පමෙව අන්‌තරධායති. භූතපුබ්‌බං, මාරිස මොග්‌ගල්‌ලාන, දෙවාසුරසඞ්‌ගාමො සමුපබ්‍යූළ්‌හො [සමූපබ්‍යුළ්‌හො (ස්‍යා. කං.), සමූපබ්‌බූළ්‌හො (සී.)] අහොසි. තස්‌මිං ඛො පන, මාරිස මොග්‌ගල්‌ලාන, සඞ්‌ගාමෙ දෙවා ජිනිංසු, අසුරා පරාජිනිංසු. සො ඛො අහං, මාරිස මොග්‌ගල්‌ලාන, තං සඞ්‌ගාමං අභිවිජිනිත්‌වා විජිතසඞ්‌ගාමො තතො පටිනිවත්‌තිත්‌වා වෙජයන්‌තං නාම පාසාදං මාපෙසිං. වෙජයන්‌තස්‌ස ඛො, මාරිස මොග්‌ගල්‌ලාන, පාසාදස්‌ස එකසතං නිය්‍යූහං. එකෙකස්‌මිං නිය්‍යූහෙ සත්‌ත සත්‌ත කූටාගාරසතානි. එකමෙකස්‌මිං කූටාගාරෙ සත්‌ත සත්‌ත අච්‌ඡරායො . එකමෙකිස්‌සා අච්‌ඡරාය සත්‌ත සත්‌ත පරිචාරිකායො. ඉච්‌ඡෙය්‍යාසි නො ත්‌වං , මාරිස මොග්‌ගල්‌ලාන, වෙජයන්‌තස්‌ස පාසාදස්‌ස රාමණෙය්‍යකං දට්‌ඨු’’න්‌ති? අධිවාසෙසි ඛො ආයස්‌මා මහාමොග්‌ගල්‌ලානො තුණ්‌හීභාවෙන.
393. අථ ඛො සක්‌කො ච දෙවානමින්‌දො වෙස්‌සවණො ච මහාරාජා ආයස්‌මන්‌තං මහාමොග්‌ගල්‌ලානං පුරක්‌ඛත්‌වා යෙන වෙජයන්‌තො පාසාදො තෙනුපසඞ්‌කමිංසු. අද්‌දසංසු ඛො සක්‌කස්‌ස දෙවානමින්‌දස්‌ස පරිචාරිකායො ආයස්‌මන්‌තං මහාමොග්‌ගල්‌ලානං දූරතොව ආගච්‌ඡන්‌තං; දිස්‌වා ඔත්‌තප්‌පමානා හිරීයමානා සකං සකං ඔවරකං පවිසිංසු. සෙය්‍යථාපි නාම සුණිසා සසුරං දිස්‌වා ඔත්‌තප්‌පති හිරීයති, එවමෙව සක්‌කස්‌ස දෙවානමින්‌දස්‌ස පරිචාරිකායො ආයස්‌මන්‌තං මහාමොග්‌ගල්‌ලානං දිස්‌වා ඔත්‌තප්‌පමානා හිරීයමානා සකං සකං ඔවරකං පවිසිංසු. අථ ඛො සක්‌කො ච දෙවානමින්‌දො වෙස්‌සවණො ච මහාරාජා ආයස්‌මන්‌තං මහාමොග්‌ගල්‌ලානං වෙජයන්‌තෙ පාසාදෙ අනුචඞ්‌කමාපෙන්‌ති අනුවිචරාපෙන්‌ති – ‘‘ඉදම්‌පි, මාරිස මොග්‌ගල්‌ලාන, පස්‌ස වෙජයන්‌තස්‌ස පාසාදස්‌ස රාමණෙය්‍යකං; ඉදම්‌පි, මාරිස මොග්‌ගල්‌ලාන, පස්‌ස වෙජයන්‌තස්‌ස පාසාදස්‌ස රාමණෙය්‍යක’’න්‌ති. ‘‘සොභති ඉදං ආයස්‌මතො කොසියස්‌ස, යථා තං පුබ්‌බෙ කතපුඤ්‌ඤස්‌ස. මනුස්‌සාපි කිඤ්‌චිදෙව රාමණෙය්‍යකං දිස්‌වා [දිට්‌ඨා (සී. පී. ක.)] එවමාහංසු – ‘සොභති වත භො යථා දෙවානං තාවතිංසාන’න්‌ති. තයිදං ආයස්‌මතො කොසියස්‌ස සොභති, යථා තං පුබ්‌බෙ කතපුඤ්‌ඤස්‌සා’’ති. අථ ඛො ආයස්‌මතො මහාමොග්‌ගල්‌ලානස්‌ස එතදහොසි – ‘‘අතිබාළ්‌හං ඛො අයං යක්‌ඛො පමත්‌තො විහරති. යංනූනාහං ඉමං යක්‌ඛං සංවෙජෙය්‍ය’’න්‌ති. අථ ඛො ආයස්‌මා මහාමොග්‌ගල්‌ලානො තථාරූපං ඉද්‌ධාභිසඞ්‌ඛාරං අභිසඞ්‌ඛාසි[අභිසඞ්‌ඛාරෙසි (ක.), අභිසඞ්‌ඛාරෙති (ස්‍යා. කං.)] යථා වෙජයන්‌තං පාසාදං පාදඞ්‌ගුට්‌ඨකෙන සඞ්‌කම්‌පෙසි සම්‌පකම්‌පෙසි සම්‌පවෙධෙසි . අථ ඛො සක්‌කො ච දෙවානමින්‌දො, වෙස්‌සවණො ච මහාරාජා, දෙවා ච තාවතිංසා අච්‌ඡරියබ්‌භුතචිත්‌තජාතා අහෙසුං – ‘‘අච්‌ඡරියං වත, භො, අබ්‌භුතං වත, භො, සමණස්‌ස මහිද්‌ධිකතා මහානුභාවතා, යත්‍ර හි නාම දිබ්‌බභවනං පාදඞ්‌ගුට්‌ඨකෙන සඞ්‌කම්‌පෙස්‌සති සම්‌පකම්‌පෙස්‌සති සම්‌පවෙධෙස්‌සතී’’ති! අථ ඛො ආයස්‌මා මහාමොග්‌ගල්‌ලානො සක්‌කං දෙවානමින්‌දං සංවිග්‌ගං ලොමහට්‌ඨජාතං විදිත්‌වා සක්‌කං දෙවානමින්‌දං එතදවොච – ‘‘යථා කථං පන ඛො, කොසිය, භගවා සංඛිත්‌තෙන තණ්‌හාසඞ්‌ඛයවිමුත්‌තිං අභාසි? සාධු මයම්‌පි එතිස්‌සා කථාය භාගිනො අස්‌සාම සවනායා’’ති.
394. ‘‘ඉධාහං , මාරිස මොග්‌ගල්‌ලාන, යෙන භගවා තෙනුපසඞ්‌කමිං; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං අට්‌ඨාසිං. එකමන්‌තං ඨිතො ඛො අහං, මාරිස මොග්‌ගල්‌ලාන, භගවන්‌තං එතදවොචං – ‘කිත්‌තාවතා නු ඛො, භන්‌තෙ, භික්‌ඛු සංඛිත්‌තෙන තණ්‌හාසඞ්‌ඛයවිමුත්‌තො හොති අච්‌චන්‌තනිට්‌ඨො අච්‌චන්‌තයොගක්‌ඛෙමී අච්‌චන්‌තබ්‍රහ්‌මචාරී අච්‌චන්‌තපරියොසානො සෙට්‌ඨො දෙවමනුස්‌සාන’’’න්‌ති?
‘‘එවං වුත්‌තෙ, මාරිස මොග්‌ගල්‌ලාන, භගවා මං එතදවොච – ‘ඉධ, දෙවානමින්‌ද, භික්‌ඛුනො සුතං හොති – සබ්‌බෙ ධම්‌මා නාලං අභිනිවෙසායා’ති. එවං චෙතං දෙවානමින්‌ද භික්‌ඛුනො සුතං හොති ‘සබ්‌බෙ ධම්‌මා නාලං අභිනිවෙසායා’ති. සො සබ්‌බං ධම්‌මං අභිජානාති, සබ්‌බං ධම්‌මං අභිඤ්‌ඤාය සබ්‌බං ධම්‌මං පරිජානාති, සබ්‌බං ධම්‌මං පරිඤ්‌ඤාය යං කිඤ්‌චි වෙදනං වෙදෙති සුඛං වා දුක්‌ඛං වා අදුක්‌ඛමසුඛං වා. සො තාසු වෙදනාසු අනිච්‌චානුපස්‌සී විහරති, විරාගානුපස්‌සී විහරති, නිරොධානුපස්‌සී විහරති, පටිනිස්‌සග්‌ගානුපස්‌සී විහරති. සො තාසු වෙදනාසු අනිච්‌චානුපස්‌සී විහරන්‌තො, විරාගානුපස්‌සී විහරන්‌තො, නිරොධානුපස්‌සී විහරන්‌තො, පටිනිස්‌සග්‌ගානුපස්‌සී විහරන්‌තො න කිඤ්‌චි ලොකෙ උපාදියති, අනුපාදියං න පරිතස්‌සති, අපරිතස්‌සං පච්‌චත්‌තඤ්‌ඤෙව පරිනිබ්‌බායති – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාති. එත්‌තාවතා ඛො, දෙවානමින්‌ද, භික්‌ඛු සංඛිත්‌තෙන තණ්‌හාසඞ්‌ඛයවිමුත්‌තො හොති අච්‌චන්‌තනිට්‌ඨො අච්‌චන්‌තයොගක්‌ඛෙමී අච්‌චන්‌තබ්‍රහ්‌මචාරී අච්‌චන්‌තපරියොසානො සෙට්‌ඨො දෙවමනුස්‌සානන්‌ති. එවං ඛො මෙ, මාරිස මොග්‌ගල්‌ලාන, භගවා සංඛිත්‌තෙන තණ්‌හාසඞ්‌ඛයවිමුත්‌තිං අභාසී’’ති.
අථ ඛො ආයස්‌මා මහාමොග්‌ගල්‌ලානො සක්‌කස්‌ස දෙවානමින්‌දස්‌ස භාසිතං අභිනන්‌දිත්‌වා අනුමොදිත්‌වා – සෙය්‍යථාපි නාම බලවා පුරිසො සමිඤ්‌ජිතං වා බාහං පසාරෙය්‍ය, පසාරිතං වා බාහං සමිඤ්‌ජෙය්‍ය එවමෙව – දෙවෙසු තාවතිංසෙසු අන්‌තරහිතො පුබ්‌බාරාමෙ මිගාරමාතුපාසාදෙ පාතුරහොසි. අථ ඛො සක්‌කස්‌ස දෙවානමින්‌දස්‌ස පරිචාරිකායො අචිරපක්‌කන්‌තෙ ආයස්‌මන්‌තෙ මහාමොග්‌ගල්‌ලානෙ සක්‌කං දෙවානමින්‌දංඑතදවොචුං – ‘‘එසො නු තෙ, මාරිස, සො භගවා සත්‌ථා’’ති? ‘‘න ඛො මෙ, මාරිස, සො භගවා සත්‌ථා. සබ්‍රහ්‌මචාරී මෙ එසො ආයස්‌මා මහාමොග්‌ගල්‌ලානො’’ති. ‘‘ලාභා තෙ, මාරිස, (සුලද්‌ධං තෙ, මාරිස) [( ) නත්‌ථි (සී. පී.)] යස්‌ස තෙ සබ්‍රහ්‌මචාරී එවංමහිද්‌ධිකො එවංමහානුභාවො! අහො නූන තෙ සො භගවා සත්‌ථා’’ති.
395. අථ ඛො ආයස්‌මා මහාමොග්‌ගල්‌ලානො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා මහාමොග්‌ගල්‌ලානො භගවන්‌තං එතදවොච – ‘‘අභිජානාති නො, භන්‌තෙ, භගවා අහු [අහුනඤ්‌ඤෙව (සී. ස්‍යා. කං.)] ඤාතඤ්‌ඤතරස්‌ස මහෙසක්‌ඛස්‌ස යක්‌ඛස්‌ස සංඛිත්‌තෙන තණ්‌හාසඞ්‌ඛයවිමුත්‌තිං භාසිතා’’ති [අභාසිත්‌ථාති (ක.)]? ‘‘අභිජානාමහං, මොග්‌ගල්‌ලාන, ඉධ සක්‌කො දෙවානමින්‌දො යෙනාහං තෙනුපසඞ්‌කමි; උපසඞ්‌කමිත්‌වා මං අභිවාදෙත්‌වා එකමන්‌තං අට්‌ඨාසි. එකමන්‌තං ඨිතො ඛො, මොග්‌ගල්‌ලාන, සක්‌කො දෙවානමින්‌දො මං එතදවොච – ‘කිත්‌තාවතා නු ඛො, භන්‌තෙ , භික්‌ඛු සංඛිත්‌තෙන තණ්‌හාසඞ්‌ඛයවිමුත්‌තො හොති අච්‌චන්‌තනිට්‌ඨො අච්‌චන්‌තයොගක්‌ඛෙමී අච්‌චන්‌තබ්‍රහ්‌මචාරී අච්‌චන්‌තපරියොසානො සෙට්‌ඨො දෙවමනුස්‌සාන’’න්‌ති.
එවං වුත්‌තෙ අහං, මොග්‌ගල්‌ලාන, සක්‌කං දෙවානමින්‌දං එතදවොචං ‘‘ඉධ දෙවානමින්‌ද භික්‌ඛුනො සුතං හොති ‘සබ්‌බෙ ධම්‌මා නාලං අභිනිවෙසායා’ති. එවං චෙතං දෙවානමින්‌ද භික්‌ඛුනො සුතං හොති ‘සබ්‌බෙ ධම්‌මා නාලං අභිනිවෙසායා’ති. සො සබ්‌බං ධම්‌මං අභිජානාති, සබ්‌බං ධම්‌මං අභිඤ්‌ඤාය සබ්‌බං ධම්‌මං පරිජානාති , සබ්‌බං ධම්‌මං පරිඤ්‌ඤාය යං කිඤ්‌චි වෙදනං වෙදෙති සුඛං වා දුක්‌ඛං වා අදුක්‌ඛමසුඛං වා. සො තාසු වෙදනාසු අනිච්‌චානුපස්‌සී විහරති, විරාගානුපස්‌සී විහරති, නිරොධානුපස්‌සී විහරති, පටිනිස්‌සග්‌ගානුපස්‌සී විහරති. සො තාසු වෙදනාසු අනිච්‌චානුපස්‌සී විහරන්‌තො, විරාගානුපස්‌සී විහරන්‌තො, නිරොධානුපස්‌සී විහරන්‌තො, පටිනිස්‌සග්‌ගානුපස්‌සී විහරන්‌තො න කිඤ්‌චි ලොකෙ උපාදියති, අනුපාදියං න පරිතස්‌සති, අපරිතස්‌සං පච්‌චත්‌තඤ්‌ඤෙව පරිනිබ්‌බායති – ‘ඛීණා ජාති, වුසිතං බ්‍රහ්‌මචරියං , කතං කරණීයං, නාපරං ඉත්‌ථත්‌තායා’ති පජානාති. එත්‌තාවතා ඛො, දෙවානමින්‌ද, භික්‌ඛු සංඛිත්‌තෙන තණ්‌හාසඞ්‌ඛයවිමුත්‌තො හොති අච්‌චන්‌තනිට්‌ඨො අච්‌චන්‌තයොගක්‌ඛෙමී අච්‌චන්‌තබ්‍රහ්‌මචාරී අච්‌චන්‌තපරියොසානො සෙට්‌ඨො දෙවමනුස්‌සානන්‌ති. එවං ඛො අහං, මොග්‌ගල්‌ලාන, අභිජානාමි සක්‌කස්‌ස දෙවානමින්‌දස්‌ස සංඛිත්‌තෙන තණ්‌හාසඞ්‌ඛයවිමුත්‌තිං භාසිතා’’ති.
ඉදමවොච භගවා. අත්‌තමනො ආයස්‌මා මහාමොග්‌ගල්‌ලානො භගවතො භාසිතං අභිනන්‌දීති.
චූළතණ්‌හාසඞ්‌ඛයසුත්‌තං නිට්‌ඨිතං සත්‌තමං.
No comments:
Post a Comment