8. ආනාපානස්‌සතිසුත්‌තං
මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න
සිංහල පරිවර්ථනය සදහා font මෙතැනින් ලබාගන්න
144. එවං මෙ සුතං – එකං සමයං භගවා සාවත්‌ථියං විහරති පුබ්‌බාරාමෙ මිගාරමාතුපාසාදෙ සම්‌බහුලෙහි අභිඤ්‌ඤාතෙහි අභිඤ්‌ඤාතෙහි ථෙරෙහි සාවකෙහි සද්‌ධිං – ආයස්‌මතා ච සාරිපුත්‌තෙන ආයස්‌මතා ච මහාමොග්‌ගල්‌ලානෙන [මහාමොග්‌ගලානෙන (ක.)] ආයස්‌මතා ච මහාකස්‌සපෙන ආයස්‌මතා ච මහාකච්‌චායනෙන ආයස්‌මතා ච මහාකොට්‌ඨිකෙන ආයස්‌මතා ච මහාකප්‌පිනෙන ආයස්‌මතා ච මහාචුන්‌දෙන ආයස්‌මතා ච අනුරුද්‌ධෙන ආයස්‌මතා ච රෙවතෙන ආයස්‌මතා ච ආනන්‌දෙන, අඤ්‌ඤෙහි ච අභිඤ්‌ඤාතෙහි අභිඤ්‌ඤාතෙහි ථෙරෙහි සාවකෙහි සද්‌ධිං.
තෙන ඛො පන සමයෙන ථෙරා භික්‌ඛූ නවෙ භික්‌ඛූ ඔවදන්‌ති අනුසාසන්‌ති. අප්‌පෙකච්‌චෙ ථෙරා භික්‌ඛූ දසපි භික්‌ඛූ ඔවදන්‌ති අනුසාසන්‌ති, අප්‌පෙකච්‌චෙ ථෙරා භික්‌ඛූ වීසම්‌පි භික්‌ඛූ ඔවදන්‌ති අනුසාසන්‌ති, අප්‌පෙකච්‌චෙ ථෙරා භික්‌ඛූ තිංසම්‌පි භික්‌ඛූ ඔවදන්‌ති අනුසාසන්‌ති, අප්‌පෙකච්‌චෙ ථෙරා භික්‌ඛූ චත්‌තාරීසම්‌පි භික්‌ඛූ ඔවදන්‌ති අනුසාසන්‌ති. තෙ ච නවා භික්‌ඛූ ථෙරෙහි භික්‌ඛූහි ඔවදියමානා අනුසාසියමානා උළාරං පුබ්‌බෙනාපරං විසෙසං ජානන්‌ති [පජානන්‌ති (ස්‍යා. කං.), සඤ්‌ජානන්‌ති (ක.)].
145. තෙන ඛො පන සමයෙන භගවා තදහුපොසථෙ පන්‌නරසෙ පවාරණාය පුණ්‌ණාය පුණ්‌ණමාය රත්‌තියා භික්‌ඛුසඞ්‌ඝපරිවුතො අබ්‌භොකාසෙ නිසින්‌නො හොති. අථ ඛො භගවා තුණ්‌හීභූතං තුණ්‌හීභූතං භික්‌ඛුසඞ්‌ඝං අනුවිලොකෙත්‌වා භික්‌ඛූ ආමන්‌තෙසි – ‘‘ආරද්‌ධොස්‌මි, භික්‌ඛවෙ, ඉමාය පටිපදාය; ආරද්‌ධචිත්‌තොස්‌මි, භික්‌ඛවෙ, ඉමාය පටිපදාය. තස්‌මාතිහ, භික්‌ඛවෙ, භිය්‍යොසොමත්‌තාය වීරියං ආරභථ අප්‌පත්‌තස්‌ස පත්‌තියා, අනධිගතස්‌ස අධිගමාය , අසච්‌ඡිකතස්‌ස සච්‌ඡිකිරියාය. ඉධෙවාහං සාවත්‌ථියං කොමුදිං චාතුමාසිනිං ආගමෙස්‌සාමී’’ති. අස්‌සොසුං ඛො ජානපදා භික්‌ඛූ – ‘‘භගවා කිර තත්‌ථෙව සාවත්‌ථියං කොමුදිං චාතුමාසිනිං ආගමෙස්‌සතී’’ති. තෙ ජානපදා භික්‌ඛූ සාවත්‌ථිං [සාවත්‌ථියං (ස්‍යා. කං. පී. ක.)] ඔසරන්‌ති භගවන්‌තං දස්‌සනාය. තෙ ච ඛො ථෙරා භික්‌ඛූ භිය්‍යොසොමත්‌තාය නවෙ භික්‌ඛූ ඔවදන්‌ති අනුසාසන්‌ති. අප්‌පෙකච්‌චෙ ථෙරා භික්‌ඛූ දසපි භික්‌ඛූ ඔවදන්‌ති අනුසාසන්‌ති, අප්‌පෙකච්‌චෙ ථෙරා භික්‌ඛූ වීසම්‌පි භික්‌ඛූ ඔවදන්‌ති අනුසාසන්‌ති , අප්‌පෙකච්‌චෙ ථෙරා භික්‌ඛූ තිංසම්‌පි භික්‌ඛූ ඔවදන්‌ති අනුසාසන්‌ති, අප්‌පෙකච්‌චෙ ථෙරා භික්‌ඛූ චත්‌තාරීසම්‌පි භික්‌ඛූ ඔවදන්‌ති අනුසාසන්‌ති. තෙ ච නවා භික්‌ඛූ ථෙරෙහි භික්‌ඛූහි ඔවදියමානා අනුසාසියමානා උළාරං පුබ්‌බෙනාපරං විසෙසං ජානන්‌ති.
146. තෙන ඛො පන සමයෙන භගවා තදහුපොසථෙ පන්‌නරසෙ කොමුදියා චාතුමාසිනියා පුණ්‌ණාය පුණ්‌ණමාය රත්‌තියා භික්‌ඛුසඞ්‌ඝපරිවුතො අබ්‌භොකාසෙ නිසින්‌නො හොති. අථ ඛො භගවා තුණ්‌හීභූතං තුණ්‌හීභූතං භික්‌ඛුසඞ්‌ඝං අනුවිලොකෙත්‌වා භික්‌ඛූ ආමන්‌තෙසි – ‘‘අපලාපායං, භික්‌ඛවෙ, පරිසා; නිප්‌පලාපායං, භික්‌ඛවෙ, පරිසා; සුද්‌ධා සාරෙ [සුද්‌ධසාරෙ පතිට්‌ඨිතා (ස්‍යා. කං. පී.)] පතිට්‌ඨිතා. තථාරූපො අයං, භික්‌ඛවෙ, භික්‌ඛුසඞ්‌ඝො; තථාරූපා අයං, භික්‌ඛවෙ, පරිසා යථාරූපා පරිසා ආහුනෙය්‍යා පාහුනෙය්‍යා දක්‌ඛිණෙය්‍යා අඤ්‌ජලිකරණීයා අනුත්‌තරං පුඤ්‌ඤක්‌ඛෙත්‌තං ලොකස්‌ස. තථාරූපො අයං, භික්‌ඛවෙ, භික්‌ඛුසඞ්‌ඝො; තථාරූපා අයං, භික්‌ඛවෙ, පරිසා යථාරූපාය පරිසාය අප්‌පං දින්‌නං බහු හොති, බහු දින්‌නං බහුතරං. තථාරූපො අයං, භික්‌ඛවෙ, භික්‌ඛුසඞ්‌ඝො; තථාරූපා අයං, භික්‌ඛවෙ, පරිසා යථාරූපා පරිසා දුල්‌ලභා දස්‌සනාය ලොකස්‌ස. තථාරූපො අයං, භික්‌ඛවෙ, භික්‌ඛුසඞ්‌ඝො; තථාරූපා අයං, භික්‌ඛවෙ, පරිසා යථාරූපං පරිසං අලං යොජනගණනානි දස්‌සනාය ගන්‌තුං පුටොසෙනාපි’’ [පුටොසෙනාපි, තථාරූපො අයං භික්‌ඛවෙ භික්‌ඛුසංඝො, තථාරූපා අයං පරිසා (සී. පී. ක.)].
147. ‘‘සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ අරහන්‌තො ඛීණාසවා වුසිතවන්‌තො කතකරණීයා ඔහිතභාරා අනුප්‌පත්‌තසදත්‌ථා පරික්‌ඛීණභවසංයොජනා සම්‌මදඤ්‌ඤාවිමුත්‌තා – එවරූපාපි, භික්‌ඛවෙ, සන්‌ති භික්‌ඛූ ඉමස්‌මිං භික්‌ඛුසඞ්‌ඝෙ . සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ පඤ්‌චන්‌නං ඔරම්‌භාගියානං සංයොජනානං පරික්‌ඛයා ඔපපාතිකා තත්‌ථ පරිනිබ්‌බායිනො අනාවත්‌තිධම්‌මා තස්‌මා ලොකා – එවරූපාපි, භික්‌ඛවෙ, සන්‌ති භික්‌ඛූ ඉමස්‌මිං භික්‌ඛුසඞ්‌ඝෙ. සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ තිණ්‌ණං සංයොජනානං පරික්‌ඛයා රාගදොසමොහානං තනුත්‌තා සකදාගාමිනො සකිදෙව [සකිං දෙව (ක.)] ඉමං ලොකං ආගන්‌ත්‌වා දුක්‌ඛස්‌සන්‌තංකරිස්‌සන්‌ති – එවරූපාපි, භික්‌ඛවෙ, සන්‌ති භික්‌ඛූ ඉමස්‌මිං භික්‌ඛුසඞ්‌ඝෙ . සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ තිණ්‌ණං සංයොජනානං පරික්‌ඛයා සොතාපන්‌නා අවිනිපාතධම්‌මා නියතා සම්‌බොධිපරායනා – එවරූපාපි, භික්‌ඛවෙ, සන්‌ති භික්‌ඛූ ඉමස්‌මිං භික්‌ඛුසඞ්‌ඝෙ.
‘‘සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ චතුන්‌නං සතිපට්‌ඨානානං භාවනානුයොගමනුයුත්‌තා විහරන්‌ති – එවරූපාපි, භික්‌ඛවෙ, සන්‌ති භික්‌ඛූ ඉමස්‌මිං භික්‌ඛුසඞ්‌ඝෙ. සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ චතුන්‌නං සම්‌මප්‌පධානානං භාවනානුයොගමනුයුත්‌තා විහරන්‌ති…පෙ.… චතුන්‌නං ඉද්‌ධිපාදානං… පඤ්‌චන්‌නං ඉන්‌ද්‍රියානං… පඤ්‌චන්‌නං බලානං… සත්‌තන්‌නං බොජ්‌ඣඞ්‌ගානං… අරියස්‌ස අට්‌ඨඞ්‌ගිකස්‌ස මග්‌ගස්‌ස භාවනානුයොගමනුයුත්‌තා විහරන්‌ති – එවරූපාපි, භික්‌ඛවෙ, සන්‌ති භික්‌ඛූ ඉමස්‌මිං භික්‌ඛුසඞ්‌ඝෙ. සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ මෙත්‌තාභාවනානුයොගමනුයුත්‌තා විහරන්‌ති… කරුණාභාවනානුයොගමනුයුත්‌තාවිහරන්‌ති… මුදිතාභාවනානුයොගමනුයුත්‌තා විහරන්‌ති… උපෙක්‌ඛාභාවනානුයොගමනුයුත්‌තා විහරන්‌ති… අසුභභාවනානුයොගමනුයුත්‌තා විහරන්‌ති… අනිච්‌චසඤ්‌ඤාභාවනානුයොගමනුයුත්‌තා විහරන්‌ති – එවරූපාපි, භික්‌ඛවෙ, සන්‌ති භික්‌ඛූ ඉමස්‌මිං භික්‌ඛුසඞ්‌ඝෙ. සන්‌ති, භික්‌ඛවෙ, භික්‌ඛූ ඉමස්‌මිං භික්‌ඛුසඞ්‌ඝෙ ආනාපානස්‌සතිභාවනානුයොගමනුයුත්‌තා විහරන්‌ති. ආනාපානස්‌සති, භික්‌ඛවෙ, භාවිතා බහුලීකතා මහප්‌ඵලා හොති මහානිසංසා. ආනාපානස්‌සති, භික්‌ඛවෙ, භාවිතා බහුලීකතා චත්‌තාරො සතිපට්‌ඨානෙ පරිපූරෙති. චත්‌තාරො සතිපට්‌ඨානා භාවිතා බහුලීකතා සත්‌ත බොජ්‌ඣඞ්‌ගෙ පරිපූරෙන්‌ති. සත්‌ත බොජ්‌ඣඞ්‌ගා භාවිතා බහුලීකතා විජ්‌ජාවිමුත්‌තිං පරිපූරෙන්‌ති.
148. ‘‘කථං භාවිතා ච, භික්‌ඛවෙ, ආනාපානස්‌සති කථං බහුලීකතා මහප්‌ඵලා හොති මහානිසංසා? ඉධ, භික්‌ඛවෙ, භික්‌ඛු අරඤ්‌ඤගතො වා රුක්‌ඛමූලගතො වා සුඤ්‌ඤාගාරගතො වා නිසීදති පල්‌ලඞ්‌කං ආභුජිත්‌වා උජුං කායං පණිධාය පරිමුඛං සතිං උපට්‌ඨපෙත්‌වා. සො සතොව අස්‌සසති සතොව [සතො (සී. ස්‍යා. කං. පී.)]පස්‌සසති.
‘‘දීඝං වා අස්‌සසන්‌තො ‘දීඝං අස්‌සසාමී’ති පජානාති, දීඝං වා පස්‌සසන්‌තො ‘දීඝං පස්‌සසාමී’ති පජානාති; රස්‌සං වා අස්‌සසන්‌තො ‘රස්‌සං අස්‌සසාමී’ති පජානාති, රස්‌සං වා පස්‌සසන්‌තො ‘රස්‌සං පස්‌සසාමී’ති පජානාති; ‘සබ්‌බකායපටිසංවෙදී අස්‌සසිස්‌සාමී’ති සික්‌ඛති, ‘සබ්‌බකායපටිසංවෙදී පස්‌සසිස්‌සාමී’ති සික්‌ඛති; ‘පස්‌සම්‌භයං කායසඞ්‌ඛාරං අස්‌සසිස්‌සාමී’ති සික්‌ඛති, ‘පස්‌සම්‌භයං කායසඞ්‌ඛාරං පස්‌සසිස්‌සාමී’ති සික්‌ඛති.
‘‘‘පීතිපටිසංවෙදී අස්‌සසිස්‌සාමී’ති සික්‌ඛති, ‘පීතිපටිසංවෙදී පස්‌සසිස්‌සාමී’ති සික්‌ඛති; ‘සුඛපටිසංවෙදී අස්‌සසිස්‌සාමී’ති සික්‌ඛති, ‘සුඛපටිසංවෙදී පස්‌සසිස්‌සාමී’ති සික්‌ඛති; ‘චිත්‌තසඞ්‌ඛාරපටිසංවෙදී අස්‌සසිස්‌සාමී’ති සික්‌ඛති, ‘චිත්‌තසඞ්‌ඛාරපටිසංවෙදී පස්‌සසිස්‌සාමී’ති සික්‌ඛති; ‘පස්‌සම්‌භයං චිත්‌තසඞ්‌ඛාරං අස්‌සසිස්‌සාමී’ති සික්‌ඛති, ‘පස්‌සම්‌භයං චිත්‌තසඞ්‌ඛාරං පස්‌සසිස්‌සාමී’ති සික්‌ඛති.
‘‘‘චිත්‌තපටිසංවෙදී අස්‌සසිස්‌සාමී’ති සික්‌ඛති, ‘චිත්‌තපටිසංවෙදී පස්‌සසිස්‌සාමී’ති සික්‌ඛති; ‘අභිප්‌පමොදයං චිත්‌තං අස්‌සසිස්‌සාමී’ති සික්‌ඛති, ‘අභිප්‌පමොදයං චිත්‌තං පස්‌සසිස්‌සාමී’ති සික්‌ඛති ; ‘සමාදහං චිත්‌තං අස්‌සසිස්‌සාමී’ති සික්‌ඛති, ‘සමාදහං චිත්‌තං පස්‌සසිස්‌සාමී’ති සික්‌ඛති; ‘විමොචයං චිත්‌තං අස්‌සසිස්‌සාමී’ති සික්‌ඛති, ‘විමොචයං චිත්‌තං පස්‌සසිස්‌සාමී’ති සික්‌ඛති.
‘‘‘අනිච්‌චානුපස්‌සී අස්‌සසිස්‌සාමී’ති සික්‌ඛති, ‘අනිච්‌චානුපස්‌සී පස්‌සසිස්‌සාමී’ති සික්‌ඛති; ‘විරාගානුපස්‌සී අස්‌සසිස්‌සාමී’ති සික්‌ඛති, ‘විරාගානුපස්‌සී පස්‌සසිස්‌සාමී’ති සික්‌ඛති; ‘නිරොධානුපස්‌සී අස්‌සසිස්‌සාමී’ති සික්‌ඛති, ‘නිරොධානුපස්‌සී පස්‌සසිස්‌සාමී’ති සික්‌ඛති; ‘පටිනිස්‌සග්‌ගානුපස්‌සී අස්‌සසිස්‌සාමී’ති සික්‌ඛති, ‘පටිනිස්‌සග්‌ගානුපස්‌සී පස්‌සසිස්‌සාමී’ති සික්‌ඛති. එවං භාවිතා ඛො, භික්‌ඛවෙ, ආනාපානස්‌සති එවං බහුලීකතා මහප්‌ඵලා හොති මහානිසංසා.
149. ‘‘කථං භාවිතා ච, භික්‌ඛවෙ, ආනාපානස්‌සති කථං බහුලීකතා චත්‌තාරො සතිපට්‌ඨානෙ පරිපූරෙති? යස්‌මිං සමයෙ, භික්‌ඛවෙ, භික්‌ඛු දීඝං වා අස්‌සසන්‌තො ‘දීඝං අස්‌සසාමී’ති පජානාති, දීඝං වා පස්‌සසන්‌තො ‘දීඝං පස්‌සසාමී’ති පජානාති; රස්‌සං වා අස්‌සසන්‌තො ‘රස්‌සං අස්‌සසාමී’ති පජානාති, රස්‌සං වා පස්‌සසන්‌තො ‘රස්‌සං පස්‌සසාමී’ති පජානාති; ‘සබ්‌බකායපටිසංවෙදී අස්‌සසිස්‌සාමී’ති සික්‌ඛති, ‘සබ්‌බකායපටිසංවෙදී පස්‌සසිස්‌සාමී’ති සික්‌ඛති; ‘පස්‌සම්‌භයං කායසඞ්‌ඛාරං අස්‌සසිස්‌සාමී’ති සික්‌ඛති, ‘පස්‌සම්‌භයං කායසඞ්‌ඛාරං පස්‌සසිස්‌සාමී’ති සික්‌ඛති; කායෙ කායානුපස්‌සී, භික්‌ඛවෙ, තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං. කායෙසු කායඤ්‌ඤතරාහං, භික්‌ඛවෙ, එවං වදාමි යදිදං – අස්‌සාසපස්‌සාසා. තස්‌මාතිහ, භික්‌ඛවෙ, කායෙකායානුපස්‌සී තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං.
‘‘යස්‌මිං සමයෙ, භික්‌ඛවෙ, භික්‌ඛු ‘පීතිපටිසංවෙදී අස්‌සසිස්‌සාමී’ති සික්‌ඛති, ‘පීතිපටිසංවෙදී පස්‌සසිස්‌සාමී’ති සික්‌ඛති; ‘සුඛපටිසංවෙදී අස්‌සසිස්‌සාමී’ති සික්‌ඛති, ‘සුඛපටිසංවෙදී පස්‌සසිස්‌සාමී’ති සික්‌ඛති; ‘චිත්‌තසඞ්‌ඛාරපටිසංවෙදී අස්‌සසිස්‌සාමී’ති සික්‌ඛති, ‘චිත්‌තසඞ්‌ඛාරපටිසංවෙදී පස්‌සසිස්‌සාමී’ති සික්‌ඛති; ‘පස්‌සම්‌භයං චිත්‌තසඞ්‌ඛාරං අස්‌සසිස්‌සාමී’ති සික්‌ඛති, ‘පස්‌සම්‌භයං චිත්‌තසඞ්‌ඛාරං පස්‌සසිස්‌සාමී’ති සික්‌ඛති; වෙදනාසු වෙදනානුපස්‌සී, භික්‌ඛවෙ, තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං. වෙදනාසු වෙදනාඤ්‌ඤතරාහං, භික්‌ඛවෙ, එවං වදාමි යදිදං – අස්‌සාසපස්‌සාසානං සාධුකං මනසිකාරං. තස්‌මාතිහ, භික්‌ඛවෙ, වෙදනාසු වෙදනානුපස්‌සී තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං.
‘‘යස්‌මිං සමයෙ, භික්‌ඛවෙ, භික්‌ඛු ‘චිත්‌තපටිසංවෙදී අස්‌සසිස්‌සාමී’ති සික්‌ඛති, ‘චිත්‌තපටිසංවෙදී පස්‌සසිස්‌සාමී’ති සික්‌ඛති; ‘අභිප්‌පමොදයං චිත්‌තං අස්‌සසිස්‌සාමී’ති සික්‌ඛති, ‘අභිප්‌පමොදයං චිත්‌තං පස්‌සසිස්‌සාමී’ති සික්‌ඛති; ‘සමාදහං චිත්‌තං අස්‌සසිස්‌සාමී’ති සික්‌ඛති, ‘සමාදහං චිත්‌තං පස්‌සසිස්‌සාමී’ති සික්‌ඛති; ‘විමොචයං චිත්‌තං අස්‌සසිස්‌සාමී’ති සික්‌ඛති, ‘විමොචයං චිත්‌තං පස්‌සසිස්‌සාමී’ති සික්‌ඛති; චිත්‌තෙ චිත්‌තානුපස්‌සී, භික්‌ඛවෙ, තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං. නාහං, භික්‌ඛවෙ, මුට්‌ඨස්‌සතිස්‌ස අසම්‌පජානස්‌ස ආනාපානස්‌සතිං වදාමි. තස්‌මාතිහ, භික්‌ඛවෙ, චිත්‌තෙ චිත්‌තානුපස්‌සී තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං.
‘‘යස්‌මිං සමයෙ, භික්‌ඛවෙ, භික්‌ඛු ‘අනිච්‌චානුපස්‌සී අස්‌සසිස්‌සාමී’ති සික්‌ඛති, ‘අනිච්‌චානුපස්‌සී පස්‌සසිස්‌සාමී’ති සික්‌ඛති; ‘විරාගානුපස්‌සී අස්‌සසිස්‌සාමී’ති සික්‌ඛති, ‘විරාගානුපස්‌සී පස්‌සසිස්‌සාමී’ති සික්‌ඛති; ‘නිරොධානුපස්‌සී අස්‌සසිස්‌සාමී’ති සික්‌ඛති, ‘නිරොධානුපස්‌සී පස්‌සසිස්‌සාමී’ති සික්‌ඛති; ‘පටිනිස්‌සග්‌ගානුපස්‌සී අස්‌සසිස්‌සාමී’ති සික්‌ඛති, ‘පටිනිස්‌සග්‌ගානුපස්‌සී පස්‌සසිස්‌සාමී’ති සික්‌ඛති; ධම්‌මෙසු ධම්‌මානුපස්‌සී, භික්‌ඛවෙ, තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං. සො යං තං අභිජ්‌ඣාදොමනස්‌සානංපහානං තං පඤ්‌ඤාය දිස්‌වා සාධුකං අජ්‌ඣුපෙක්‌ඛිතා හොති. තස්‌මාතිහ, භික්‌ඛවෙ, ධම්‌මෙසු ධම්‌මානුපස්‌සී තස්‌මිං සමයෙ භික්‌ඛු විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං.
‘‘එවං භාවිතා ඛො, භික්‌ඛවෙ, ආනාපානස්‌සති එවං බහුලීකතා චත්‌තාරො සතිපට්‌ඨානෙ පරිපූරෙති.
150. ‘‘කථං භාවිතා ච, භික්‌ඛවෙ, චත්‌තාරො සතිපට්‌ඨානා කථං බහුලීකතා සත්‌ත බොජ්‌ඣඞ්‌ගෙ පරිපූරෙන්‌ති? යස්‌මිං සමයෙ, භික්‌ඛවෙ, භික්‌ඛු කායෙ කායානුපස්‌සී විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං, උපට්‌ඨිතාස්‌ස තස්‌මිං සමයෙ සති හොති අසම්‌මුට්‌ඨා [අප්‌පම්‌මුට්‌ඨා (ස්‍යා. කං.)]. යස්‌මිං සමයෙ, භික්‌ඛවෙ, භික්‌ඛුනො උපට්‌ඨිතා සති හොති අසම්‌මුට්‌ඨා, සතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති. සතිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, සතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘සො තථාසතො විහරන්‌තො තං ධම්‌මං පඤ්‌ඤාය පවිචිනති පවිචයති [පවිචරති (සී. ස්‍යා. කං. පී.)] පරිවීමංසං ආපජ්‌ජති. යස්‌මිං සමයෙ, භික්‌ඛවෙ, භික්‌ඛු තථාසතො විහරන්‌තො තං ධම්‌මං පඤ්‌ඤාය පවිචිනති පවිචයති පරිවීමංසං ආපජ්‌ජති, ධම්‌මවිචයසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, ධම්‌මවිචයසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, ධම්‌මවිචයසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘තස්‌ස තං ධම්‌මං පඤ්‌ඤාය පවිචිනතො පවිචයතො පරිවීමංසං ආපජ්‌ජතො ආරද්‌ධං හොති වීරියං අසල්‌ලීනං. යස්‌මිං සමයෙ, භික්‌ඛවෙ, භික්‌ඛුනො තං ධම්‌මං පඤ්‌ඤාය පවිචිනතො පවිචයතො පරිවීමංසං ආපජ්‌ජතො ආරද්‌ධං හොති වීරියං අසල්‌ලීනං, වීරියසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, වීරියසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, වීරියසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘ආරද්‌ධවීරියස්‌ස උප්‌පජ්‌ජති පීති නිරාමිසා. යස්‌මිං සමයෙ, භික්‌ඛවෙ, භික්‌ඛුනො ආරද්‌ධවීරියස්‌ස උප්‌පජ්‌ජති පීතිනිරාමිසා, පීතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, පීතිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, පීතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘පීතිමනස්‌ස කායොපි පස්‌සම්‌භති, චිත්‌තම්‌පි පස්‌සම්‌භති. යස්‌මිං සමයෙ, භික්‌ඛවෙ, භික්‌ඛුනො පීතිමනස්‌ස කායොපි පස්‌සම්‌භති, චිත්‌තම්‌පි පස්‌සම්‌භති, පස්‌සද්‌ධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, පස්‌සද්‌ධිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, පස්‌සද්‌ධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘පස්‌සද්‌ධකායස්‌ස සුඛිනො චිත්‌තං සමාධියති. යස්‌මිං සමයෙ, භික්‌ඛවෙ, භික්‌ඛුනො පස්‌සද්‌ධකායස්‌ස සුඛිනො චිත්‌තං සමාධියති, සමාධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, සමාධිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, සමාධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘සො තථාසමාහිතං චිත්‌තං සාධුකං අජ්‌ඣුපෙක්‌ඛිතා හොති. යස්‌මිං සමයෙ, භික්‌ඛවෙ, භික්‌ඛු තථාසමාහිතං චිත්‌තං සාධුකං අජ්‌ඣුපෙක්‌ඛිතා හොති, උපෙක්‌ඛාසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, උපෙක්‌ඛාසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, උපෙක්‌ඛාසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
151. ‘‘යස්‌මිං සමයෙ, භික්‌ඛවෙ, භික්‌ඛු වෙදනාසු…පෙ.… චිත්‌තෙ… ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා විනෙය්‍ය ලොකෙ අභිජ්‌ඣාදොමනස්‌සං, උපට්‌ඨිතාස්‌ස තස්‌මිං සමයෙ සති හොති අසම්‌මුට්‌ඨා. යස්‌මිං සමයෙ, භික්‌ඛවෙ, භික්‌ඛුනො උපට්‌ඨිතා සති හොති අසම්‌මුට්‌ඨා, සතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, සතිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, සතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘සො තථාසතො විහරන්‌තො තං ධම්‌මං පඤ්‌ඤාය පවිචිනති පවිචයති පරිවීමංසං ආපජ්‌ජති. යස්‌මිං සමයෙ, භික්‌ඛවෙ, භික්‌ඛු තථාසතො විහරන්‌තො තං ධම්‌මං පඤ්‌ඤාය පවිචිනති පවිචයති පරිවීමංසං ආපජ්‌ජති, ධම්‌මවිචයසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, ධම්‌මවිචයසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, ධම්‌මවිචයසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘තස්‌ස තං ධම්‌මං පඤ්‌ඤාය පවිචිනතො පවිචයතො පරිවීමංසං ආපජ්‌ජතො ආරද්‌ධං හොති වීරියං අසල්‌ලීනං. යස්‌මිං සමයෙ, භික්‌ඛවෙ, භික්‌ඛුනො තං ධම්‌මං පඤ්‌ඤාය පවිචිනතො පවිචයතො පරිවීමංසං ආපජ්‌ජතො ආරද්‌ධං හොති වීරියං අසල්‌ලීනං, වීරියසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, වීරියසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, වීරියසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘ආරද්‌ධවීරියස්‌ස උප්‌පජ්‌ජති පීති නිරාමිසා. යස්‌මිං සමයෙ, භික්‌ඛවෙ, භික්‌ඛුනො ආරද්‌ධවීරියස්‌ස උප්‌පජ්‌ජති පීති නිරාමිසා, පීතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, පීතිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, පීතිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘පීතිමනස්‌ස කායොපි පස්‌සම්‌භති, චිත්‌තම්‌පි පස්‌සම්‌භති. යස්‌මිං සමයෙ, භික්‌ඛවෙ, භික්‌ඛුනො පීතිමනස්‌ස කායොපි පස්‌සම්‌භති, චිත්‌තම්‌පි පස්‌සම්‌භති, පස්‌සද්‌ධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, පස්‌සද්‌ධිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, පස්‌සද්‌ධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘පස්‌සද්‌ධකායස්‌ස සුඛිනො චිත්‌තං සමාධියති. යස්‌මිං සමයෙ, භික්‌ඛවෙ, භික්‌ඛුනො පස්‌සද්‌ධකායස්‌ස සුඛිනො චිත්‌තං සමාධියති, සමාධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, සමාධිසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, සමාධිසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති.
‘‘සො තථාසමාහිතං චිත්‌තං සාධුකං අජ්‌ඣුපෙක්‌ඛිතා හොති. යස්‌මිං සමයෙ, භික්‌ඛවෙ, භික්‌ඛු තථාසමාහිතං චිත්‌තං සාධුකං අජ්‌ඣුපෙක්‌ඛිතා හොති, උපෙක්‌ඛාසම්‌බොජ්‌ඣඞ්‌ගො තස්‌මිං සමයෙ භික්‌ඛුනො ආරද්‌ධො හොති, උපෙක්‌ඛාසම්‌බොජ්‌ඣඞ්‌ගං තස්‌මිං සමයෙ භික්‌ඛු භාවෙති, උපෙක්‌ඛාසම්‌බොජ්‌ඣඞ්‌ගො තස්‌මිං සමයෙ භික්‌ඛුනො භාවනාපාරිපූරිං ගච්‌ඡති. එවං භාවිතා ඛො, භික්‌ඛවෙ, චත්‌තාරො සතිපට්‌ඨානා එවං බහුලීකතා සත්‌ත සම්‌බොජ්‌ඣඞ්‌ගෙ පරිපූරෙන්‌ති.
152. ‘‘කථං භාවිතා ච, භික්‌ඛවෙ, සත්‌ත බොජ්‌ඣඞ්‌ගා කථං බහුලීකතා විජ්‌ජාවිමුත්‌තිං පරිපූරෙන්‌ති ? ඉධ, භික්‌ඛවෙ, භික්‌ඛු සතිසම්‌බොජ්‌ඣඞ්‌ගං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං. ධම්‌මවිචයසම්‌බොජ්‌ඣඞ්‌ගං භාවෙති…පෙ.… වීරියසම්‌බොජ්‌ඣඞ්‌ගං භාවෙති… පීතිසම්‌බොජ්‌ඣඞ්‌ගං භාවෙති… පස්‌සද්‌ධිසම්‌බොජ්‌ඣඞ්‌ගං භාවෙති… සමාධිසම්‌බොජ්‌ඣඞ්‌ගං භාවෙති… උපෙක්‌ඛාසම්‌බොජ්‌ඣඞ්‌ගං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං. එවං භාවිතා ඛො, භික්‌ඛවෙ, සත්‌ත බොජ්‌ඣඞ්‌ගා එවං බහුලීකතා විජ්‌ජාවිමුත්‌තිං පරිපූරෙන්‌තී’’ති.
ඉදමවොච භගවා. අත්‌තමනා තෙ භික්‌ඛූ භගවතො භාසිතං අභිනන්‌දුන්‌ති.
ආනාපානස්‌සතිසුත්‌තං නිට්‌ඨිතං අට්‌ඨමං.
No comments:
Post a Comment