10. චූළඅස්‌සපුරසුත්‌තං
435. එවං මෙ සුතං – එකං සමයං භගවා අඞ්‌ගෙසු විහරති අස්‌සපුරං නාම අඞ්‌ගානං නිගමො. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච – ‘‘සමණා සමණාති වො, භික්‌ඛවෙ, ජනො සඤ්‌ජානාති. තුම්‌හෙ ච පන ‘කෙ තුම්‌හෙ’ති පුට්‌ඨා සමානා ‘සමණාම්‌හා’ති පටිජානාථ. තෙසං වො, භික්‌ඛවෙ, එවංසමඤ්‌ඤානං සතං එවංපටිඤ්‌ඤානං සතං – ‘යා සමණසාමීචිප්‌පටිපදා තං පටිපජ්‌ජිස්‌සාම; එවං නො අයං අම්‌හාකං සමඤ්‌ඤා ච සච්‌චා භවිස්‌සති පටිඤ්‌ඤා ච භූතා; යෙසඤ්‌ච මයං චීවරපිණ්‌ඩපාතසෙනාසනගිලානප්‌පච්‌චයභෙසජ්‌ජපරික්‌ඛාරං පරිභුඤ්‌ජාම, තෙසං තෙ කාරා අම්‌හෙසු මහප්‌ඵලා භවිස්‌සන්‌ති මහානිසංසා, අම්‌හාකඤ්‌චෙවායං පබ්‌බජ්‌ජා අවඤ්‌ඣා භවිස්‌සති සඵලා සඋද්‍රයා’ති. එවඤ්‌හි වො, භික්‌ඛවෙ, සික්‌ඛිතබ්‌බං.
436. ‘‘කථඤ්‌ච, භික්‌ඛවෙ, භික්‌ඛු න සමණසාමීචිප්‌පටිපදං පටිපන්‌නො හොති? යස්‌ස කස්‌සචි, භික්‌ඛවෙ, භික්‌ඛුනො අභිජ්‌ඣාලුස්‌ස අභිජ්‌ඣා අප්‌පහීනා හොති, බ්‍යාපන්‌නචිත්‌තස්‌ස බ්‍යාපාදො අප්‌පහීනො හොති, කොධනස්‌ස කොධො අප්‌පහීනො හොති, උපනාහිස්‌ස උපනාහො අප්‌පහීනො හොති, මක්‌ඛිස්‌ස මක්‌ඛො අප්‌පහීනො හොති, පළාසිස්‌ස පළාසො අප්‌පහීනො හොති, ඉස්‌සුකිස්‌ස ඉස්‌සා අප්‌පහීනා හොති, මච්‌ඡරිස්‌ස මච්‌ඡරියං අප්‌පහීනං හොති , සඨස්‌ස සාඨෙය්‍යං අප්‌පහීනං හොති, මායාවිස්‌ස මායා අප්‌පහීනා හොති, පාපිච්‌ඡස්‌ස පාපිකා ඉච්‌ඡා අප්‌පහීනා හොති, මිච්‌ඡාදිට්‌ඨිකස්‌ස මිච්‌ඡාදිට්‌ඨි අප්‌පහීනා හොති – ඉමෙසං ඛො අහං, භික්‌ඛවෙ, සමණමලානං සමණදොසානං සමණකසටානං ආපායිකානං ඨානානං දුග්‌ගතිවෙදනියානං අප්‌පහානා ‘න සමණසාමීචිප්‌පටිපදං පටිපන්‌නො’ති වදාමි. සෙය්‍යථාපි, භික්‌ඛවෙ, මතජං නාම ආවුධජාතං උභතොධාරං පීතනිසිතං. තදස්‌ස සඞ්‌ඝාටියා සම්‌පාරුතං සම්‌පලිවෙඨිතං. තථූපමාහං, භික්‌ඛවෙ, ඉමස්‌ස භික්‌ඛුනො පබ්‌බජ්‌ජං වදාමි.
437. ‘‘නාහං, භික්‌ඛවෙ, සඞ්‌ඝාටිකස්‌ස සඞ්‌ඝාටිධාරණමත්‌තෙන සාමඤ්‌ඤං වදාමි. නාහං, භික්‌ඛවෙ, අචෙලකස්‌ස අචෙලකමත්‌තෙන සාමඤ්‌ඤං වදාමි. නාහං, භික්‌ඛවෙ, රජොජල්‌ලිකස්‌ස රජොජල්‌ලිකමත්‌තෙන සාමඤ්‌ඤං වදාමි. නාහං, භික්‌ඛවෙ , උදකොරොහකස්‌ස උදකොරොහණමත්‌තෙන [උදකොරොහකමත්‌තෙන (සී. පී.)] සාමඤ්‌ඤං වදාමි. නාහං, භික්‌ඛවෙ, රුක්‌ඛමූලිකස්‌ස රුක්‌ඛමූලිකමත්‌තෙන සාමඤ්‌ඤං වදාමි. නාහං, භික්‌ඛවෙ, අබ්‌භොකාසිකස්‌ස අබ්‌භොකාසිකමත්‌තෙන සාමඤ්‌ඤං වදාමි. නාහං, භික්‌ඛවෙ, උබ්‌භට්‌ඨකස්‌ස උබ්‌භට්‌ඨකමත්‌තෙන සාමඤ්‌ඤං වදාමි. නාහං, භික්‌ඛවෙ, පරියායභත්‌තිකස්‌ස පරියායභත්‌තිකමත්‌තෙන සාමඤ්‌ඤං වදාමි. නාහං, භික්‌ඛවෙ, මන්‌තජ්‌ඣායකස්‌ස මන්‌තජ්‌ඣායකමත්‌තෙන සාමඤ්‌ඤං වදාමි. නාහං, භික්‌ඛවෙ, ජටිලකස්‌ස ජටාධාරණමත්‌තෙන සාමඤ්‌ඤං වදාමි.
‘‘සඞ්‌ඝාටිකස්‌ස චෙ, භික්‌ඛවෙ, සඞ්‌ඝාටිධාරණමත්‌තෙන අභිජ්‌ඣාලුස්‌ස අභිජ්‌ඣා පහීයෙථ, බ්‍යාපන්‌නචිත්‌තස්‌ස බ්‍යාපාදො පහීයෙථ, කොධනස්‌ස කොධො පහීයෙථ, උපනාහිස්‌ස උපනාහො පහීයෙථ, මක්‌ඛිස්‌ස මක්‌ඛො පහීයෙථ, පළාසිස්‌ස පළාසො පහීයෙථ, ඉස්‌සුකිස්‌ස ඉස්‌සා පහීයෙථ, මච්‌ඡරිස්‌ස මච්‌ඡරියං පහීයෙථ, සඨස්‌ස සාඨෙය්‍යං පහීයෙථ, මායාවිස්‌ස මායා පහීයෙථ, පාපිච්‌ඡස්‌ස පාපිකා ඉච්‌ඡා පහීයෙථ, මිච්‌ඡාදිට්‌ඨිකස්‌ස මිච්‌ඡාදිට්‌ඨි පහීයෙථ, තමෙනං මිත්‌තාමච්‌චා ඤාතිසාලොහිතා ජාතමෙව නං සඞ්‌ඝාටිකං කරෙය්‍යුං, සඞ්‌ඝාටිකත්‌තමෙව[සංඝාටීකත්‌තෙ චෙව (ක.)] සමාදපෙය්‍යුං – ‘එහි ත්‌වං, භද්‍රමුඛ, සඞ්‌ඝාටිකො හොහි, සඞ්‌ඝාටිකස්‌ස තෙ සතො සඞ්‌ඝාටිධාරණමත්‌තෙන අභිජ්‌ඣාලුස්‌ස අභිජ්‌ඣා පහීයිස්‌සති, බ්‍යාපන්‌නචිත්‌තස්‌ස බ්‍යාපාදො පහීයිස්‌සති, කොධනස්‌ස කොධො පහීයිස්‌සති, උපනාහිස්‌ස උපනාහො පහීයිස්‌සති, මක්‌ඛිස්‌ස මක්‌ඛො පහීයිස්‌සති, පළාසිස්‌ස පළාසො පහීයිස්‌සති, ඉස්‌සුකිස්‌ස ඉස්‌සා පහීයිස්‌සති, මච්‌ඡරිස්‌ස මච්‌ඡරියං පහීයිස්‌සති, සඨස්‌ස සාඨෙය්‍යං පහීයිස්‌සති, මායාවිස්‌ස මායා පහීයිස්‌සති, පාපිච්‌ඡස්‌ස පාපිකා ඉච්‌ඡා පහීයිස්‌සති, මිච්‌ඡාදිට්‌ඨිකස්‌ස මිච්‌ඡාදිට්‌ඨි පහීයිස්‌සතී’ති. යස්‌මා ච ඛො අහං, භික්‌ඛවෙ, සඞ්‌ඝාටිකම්‌පි ඉධෙකච්‌චං පස්‌සාමි අභිජ්‌ඣාලුං බ්‍යාපන්‌නචිත්‌තං කොධනං උපනාහිං මක්‌ඛිං පළාසිං ඉස්‌සුකිං මච්‌ඡරිං සඨං මායාවිං පාපිච්‌ඡං මිච්‌ඡාදිට්‌ඨිකං, තස්‌මා න සඞ්‌ඝාටිකස්‌ස සඞ්‌ඝාටිධාරණමත්‌තෙන සාමඤ්‌ඤං වදාමි.
‘‘අචෙලකස්‌ස චෙ, භික්‌ඛවෙ…පෙ.… රජොජල්‌ලිකස්‌ස චෙ, භික්‌ඛවෙ…පෙ.… උදකොරොහකස්‌ස චෙ, භික්‌ඛවෙ…පෙ.… රුක්‌ඛමූලිකස්‌ස චෙ, භික්‌ඛවෙ…පෙ.… අබ්‌භොකාසිකස්‌ස චෙ, භික්‌ඛවෙ…පෙ.… උබ්‌භට්‌ඨකස්‌ස චෙ, භික්‌ඛවෙ…පෙ.… පරියායභත්‌තිකස්‌ස චෙ, භික්‌ඛවෙ…පෙ.… මන්‌තජ්‌ඣායකස්‌ස චෙ, භික්‌ඛවෙ…පෙ.… ජටිලකස්‌ස චෙ, භික්‌ඛවෙ, ජටාධාරණමත්‌තෙන අභිජ්‌ඣාලුස්‌ස අභිජ්‌ඣා පහීයෙථ, බ්‍යාපන්‌නචිත්‌තස්‌ස බ්‍යාපාදො පහීයෙථ , කොධනස්‌ස කොධො පහීයෙථ, උපනාහිස්‌ස උපනාහො පහීයෙථ, මක්‌ඛිස්‌ස මක්‌ඛො පහීයෙථ, පළාසිස්‌ස පළාසො පහීයෙථ, ඉස්‌සුකිස්‌ස ඉස්‌සා පහීයෙථ, මච්‌ඡරිස්‌ස මච්‌ඡරියං පහීයෙථ, සඨස්‌ස සාඨෙය්‍යං පහීයෙථ, මායාවිස්‌ස මායා පහීයෙථ, පාපිච්‌ඡස්‌ස පාපිකා ඉච්‌ඡා පහීයෙථ, මිච්‌ඡාදිට්‌ඨිකස්‌ස මිච්‌ඡාදිට්‌ඨි පහීයෙථ, තමෙනං මිත්‌තාමච්‌චා ඤාතිසාලොහිතා ජාතමෙව නං ජටිලකං කරෙය්‍යුං, ජටිලකත්‌තමෙව [ජටිලකත්‌තෙ චෙව (ක.)] සමාදපෙය්‍යුං – ‘එහි ත්‌වං, භද්‍රමුඛ, ජටිලකො හොහි, ජටිලකස්‌ස තෙ සතො ජටාධාරණමත්‌තෙන අභිජ්‌ඣාලුස්‌ස අභිජ්‌ඣා පහීයිස්‌සති බ්‍යාපන්‌නචිත්‌තස්‌ස බ්‍යාපාදො පහීයිස්‌සති, කොධනස්‌ස කොධො පහීයිස්‌සති…පෙ.… පාපිච්‌ඡස්‌ස පාපිකා ඉච්‌ඡා පහීයිස්‌සති මිච්‌ඡාදිට්‌ඨිකස්‌ස මිච්‌ඡාදිට්‌ඨි පහීයිස්‌සතී’ති. යස්‌මා ච ඛො අහං, භික්‌ඛවෙ, ජටිලකම්‌පි ඉධෙකච්‌චං පස්‌සාමි අභිජ්‌ඣාලුං බ්‍යාපන්‌නචිත්‌තං කොධනං උපනාහිං මක්‌ඛිං පලාසිං ඉස්‌සුකිං මච්‌ඡරිං සඨං මායාවිං පාපිච්‌ඡං මිච්‌ඡාදිට්‌ඨිං, තස්‌මා න ජටිලකස්‌ස ජටාධාරණමත්‌තෙන සාමඤ්‌ඤං වදාමි.
438. ‘‘කථඤ්‌ච, භික්‌ඛවෙ, භික්‌ඛු සමණසාමීචිප්‌පටිපදං පටිපන්‌නො හොති? යස්‌ස කස්‌සචි, භික්‌ඛවෙ, භික්‌ඛුනො අභිජ්‌ඣාලුස්‌ස අභිජ්‌ඣා පහීනා හොති, බ්‍යාපන්‌නචිත්‌තස්‌ස බ්‍යාපාදො පහීනො හොති, කොධනස්‌ස කොධො පහීනො හොති, උපනාහිස්‌ස උපනාහො පහීනො හොති, මක්‌ඛිස්‌ස මක්‌ඛො පහීනො හොති, පළාසිස්‌ස පළාසො පහීනො හොති, ඉස්‌සුකිස්‌ස ඉස්‌සා පහීනා හොති, මච්‌ඡරිස්‌ස මච්‌ඡරියං පහීනං හොති, සඨස්‌ස සාඨෙය්‍යං පහීනං හොති, මායාවිස්‌ස මායා පහීනා හොති, පාපිච්‌ඡස්‌ස පාපිකා ඉච්‌ඡා පහීනා හොති, මිච්‌ඡාදිට්‌ඨිකස්‌ස මිච්‌ඡාදිට්‌ඨි පහීනා හොති – ඉමෙසං ඛො අහං, භික්‌ඛවෙ, සමණමලානං සමණදොසානං සමණකසටානං ආපායිකානං ඨානානං දුග්‌ගතිවෙදනියානං පහානා ‘සමණසාමීචිප්‌පටිපදං පටිපන්‌නො’ති වදාමි. සො සබ්‌බෙහි ඉමෙහි පාපකෙහි අකුසලෙහි ධම්‌මෙහි විසුද්‌ධමත්‌තානං සමනුපස්‌සති ( ) [(විමුත්‌තමත්‌තානං සමනුපස්‌සති) (සී. ස්‍යා. කං. පී.)]. තස්‌ස සබ්‌බෙහි ඉමෙහි පාපකෙහි අකුසලෙහි ධම්‌මෙහි විසුද්‌ධමත්‌තානං සමනුපස්‌සතො ( ) [(විමුත්‌තමත්‌තානං සමනුපස්‌සතො) (සී. ස්‍යා. කං. පී.)] පාමොජ්‌ජං ජායති, පමුදිතස්‌ස පීති ජායති, පීතිමනස්‌ස කායො පස්‌සම්‌භති, පස්‌සද්‌ධකායො සුඛං වෙදෙති, සුඛිනො චිත්‌තං සමාධියති.
‘‘සො මෙත්‌තාසහගතෙන චෙතසා එකං දිසං ඵරිත්‌වා විහරති, තථා දුතියං, තථා තතියං, තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං මෙත්‌තාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාබජ්‌ඣෙන ඵරිත්‌වා විහරති. කරුණාසහගතෙන චෙතසා…පෙ.… මුදිතාසහගතෙන චෙතසා…පෙ.… උපෙක්‌ඛාසහගතෙන චෙතසා එකං දිසං ඵරිත්‌වා විහරති, තථා දුතියං, තථා තතියං, තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං උපෙක්‌ඛාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාබජ්‌ඣෙන ඵරිත්‌වා විහරති. සෙය්‍යථාපි, භික්‌ඛවෙ, පොක්‌ඛරණී අච්‌ඡොදකා සාතොදකා සීතොදකා සෙතකා සුපතිත්‌ථා රමණීයා. පුරත්‌ථිමාය චෙපි දිසාය පුරිසො ආගච්‌ඡෙය්‍ය ඝම්‌මාභිතත්‌තො ඝම්‌මපරෙතො කිලන්‌තො තසිතො පිපාසිතො. සො තං පොක්‌ඛරණිං ආගම්‌ම විනෙය්‍ය උදකපිපාසං විනෙය්‍ය ඝම්‌මපරිළාහං…පෙ.… පච්‌ඡිමාය චෙපි දිසාය පුරිසො ආගච්‌ඡෙය්‍ය…පෙ.… උත්‌තරාය චෙපි දිසාය පුරිසො ආගච්‌ඡෙය්‍ය…පෙ.… දක්‌ඛිණාය චෙපි දිසාය පුරිසො ආගච්‌ඡෙය්‍ය. යතො කුතො චෙපි නං පුරිසො ආගච්‌ඡෙය්‍ය ඝම්‌මාභිතත්‌තො ඝම්‌මපරෙතො, කිලන්‌තො තසිතො පිපාසිතො. සො තං පොක්‌ඛරණිං ආගම්‌ම විනෙය්‍ය උදකපිපාසං, විනෙය්‍ය ඝම්‌මපරිළාහං. එවමෙව ඛො, භික්‌ඛවෙ, ඛත්‌තියකුලා චෙපි අගාරස්‌මා අනගාරියං පබ්‌බජිතො හොති, සො ච තථාගතප්‌පවෙදිතං ධම්‌මවිනයං ආගම්‌ම, එවං මෙත්‌තං කරුණං මුදිතං උපෙක්‌ඛං භාවෙත්‌වා ලභති අජ්‌ඣත්‌තං [තමහං (ක.)] වූපසමං [තමහං (ක.)]. අජ්‌ඣත්‌තං වූපසමා ‘සමණසාමීචිප්‌පටිපදං පටිපන්‌නො’ති වදාමි. බ්‍රාහ්‌මණකුලා චෙපි…පෙ.… වෙස්‌සකුලා චෙපි…පෙ.… සුද්‌දකුලා චෙපි…පෙ.… යස්‌මා කස්‌මා චෙපි කුලා අගාරස්‌මා අනගාරියං පබ්‌බජිතො හොති , සො ච තථාගතප්‌පවෙදිතං ධම්‌මවිනයං ආගම්‌ම, එවං මෙත්‌තං කරුණං මුදිතං උපෙක්‌ඛං භාවෙත්‌වා ලභති අජ්‌ඣත්‌තං වූපසමං. අජ්‌ඣත්‌තං වූපසමා ‘සමණසාමීචිප්‌පටිපදං පටිපන්‌නො’ති වදාමි.
‘‘ඛත්‌තියකුලා චෙපි අගාරස්‌මා අනගාරියං පබ්‌බජිතො හොති. සො ච ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. ආසවානං ඛයා සමණො හොති. බ්‍රාහ්‌මණකුලා චෙපි…පෙ.… වෙස්‌සකුලා චෙපි… සුද්‌දකුලා චෙපි… යස්‌මා කස්‌මා චෙපි කුලා අගාරස්‌මා අනගාරියං පබ්‌බජිතො හොති, සො ච ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. ආසවානං ඛයා සමණො හොතී’’ති.
ඉදමවොච භගවා. අත්‌තමනා තෙ භික්‌ඛූ භගවතො භාසිතං අභිනන්‌දුන්‌ති.
චූළඅස්‌සපුරසුත්‌තං නිට්‌ඨිතං දසමං.
No comments:
Post a Comment