5. චූළධම්‌මසමාදානසුත්‌තං
468. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච – ‘‘චත්‌තාරිමානි, භික්‌ඛවෙ, ධම්‌මසමාදානානි. කතමානි චත්‌තාරි? අත්‌ථි, භික්‌ඛවෙ, ධම්‌මසමාදානං පච්‌චුප්‌පන්‌නසුඛං ආයතිං දුක්‌ඛවිපාකං; අත්‌ථි, භික්‌ඛවෙ , ධම්‌මසමාදානං පච්‌චුප්‌පන්‌නදුක්‌ඛඤ්‌චෙව ආයතිඤ්‌ච දුක්‌ඛවිපාකං; අත්‌ථි, භික්‌ඛවෙ, ධම්‌මසමාදානං පච්‌චුප්‌පන්‌නදුක්‌ඛං ආයතිං සුඛවිපාකං; අත්‌ථි, භික්‌ඛවෙ, ධම්‌මසමාදානං පච්‌චුප්‌පන්‌නසුඛඤ්‌චෙව ආයතිඤ්‌ච සුඛවිපාකං’’.
469. ‘‘කතමඤ්‌ච, භික්‌ඛවෙ, ධම්‌මසමාදානං පච්‌චුප්‌පන්‌නසුඛං ආයතිං දුක්‌ඛවිපාකං? සන්‌ති, භික්‌ඛවෙ, එකෙ සමණබ්‍රාහ්‌මණා එවංවාදිනො එවංදිට්‌ඨිනො – ‘නත්‌ථි කාමෙසු දොසො’ති. තෙ කාමෙසු පාතබ්‍යතං ආපජ්‌ජන්‌ති. තෙ ඛො මොළිබද්‌ධාහි [මොළිබන්‌ධාහි (ස්‍යා. කං. ක.)] පරිබ්‌බාජිකාහි පරිචාරෙන්‌ති. තෙ එවමාහංසු – ‘කිංසු නාම තෙ භොන්‌තො සමණබ්‍රාහ්‌මණා කාමෙසු අනාගතභයං සම්‌පස්‌සමානා කාමානං පහානමාහංසු, කාමානං පරිඤ්‌ඤං පඤ්‌ඤපෙන්‌ති? සුඛො ඉමිස්‌සා පරිබ්‌බාජිකාය තරුණාය මුදුකාය ලොමසාය බාහාය සම්‌ඵස්‌සො’ති තෙ කාමෙසු පාතබ්‍යතං ආපජ්‌ජන්‌ති. තෙ කාමෙසු පාතබ්‍යතං ආපජ්‌ජිත්‌වා කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජන්‌ති. තෙ තත්‌ථ දුක්‌ඛා තිබ්‌බා ඛරා කටුකා වෙදනා වෙදයන්‌ති. තෙ එවමාහංසු – ‘ඉදං ඛො තෙ භොන්‌තො සමණබ්‍රාහ්‌මණා කාමෙසු අනාගතභයං සම්‌පස්‌සමානා කාමානං පහානමාහංසු, කාමානං පරිඤ්‌ඤං පඤ්‌ඤපෙන්‌ති, ඉමෙ හි මයං කාමහෙතු කාමනිදානං දුක්‌ඛා තිබ්‌බා ඛරා කටුකා වෙදනා වෙදයාමා’ති. සෙය්‍යථාපි, භික්‌ඛවෙ, ගිම්‌හානං පච්‌ඡිමෙ මාසෙ මාලුවාසිපාටිකා ඵලෙය්‍ය. අථ ඛො තං, භික්‌ඛවෙ, මාලුවාබීජං අඤ්‌ඤතරස්‌මිං සාලමූලෙ නිපතෙය්‍ය. අථ ඛො, භික්‌ඛවෙ, යා තස්‌මිං සාලෙ අධිවත්‌ථා දෙවතා සා භීතා සංවිග්‌ගා සන්‌තාසං ආපජ්‌ජෙය්‍ය. අථ ඛො, භික්‌ඛවෙ, තස්‌මිං සාලෙ අධිවත්‌ථාය දෙවතාය මිත්‌තාමච්‌චා ඤාතිසාලොහිතා ආරාමදෙවතා වනදෙවතා රුක්‌ඛදෙවතා ඔසධිතිණවනප්‌පතීසු අධිවත්‌ථා දෙවතා සඞ්‌ගම්‌ම සමාගම්‌ම එවං සමස්‌සාසෙය්‍යුං – ‘මා භවං භායි, මා භවං භායි; අප්‌පෙව නාමෙතං මාලුවාබීජං මොරො වා ගිලෙය්‍ය [මොරො වා ගිලෙය්‍ය, ගොධා වා ඛාදෙය්‍ය (ක.)], මගො වා ඛාදෙය්‍ය, දවඩාහො [වනදාහො (ක.)] වා ඩහෙය්‍ය, වනකම්‌මිකා වා උද්‌ධරෙය්‍යුං, උපචිකා වා උට්‌ඨහෙය්‍යුං [උද්‍රභෙය්‍යුං (සී. පී. ක.)], අබීජං වා පනස්‌සා’ති. අථ ඛො තං, භික්‌ඛවෙ, මාලුවාබීජං නෙව මොරො ගිලෙය්‍ය, න මගො ඛාදෙය්‍ය, න දවඩාහො ඩහෙය්‍ය, න වනකම්‌මිකා උද්‌ධරෙය්‍යුං, න උපචිකා උට්‌ඨහෙය්‍යුං, බීජඤ්‌ච පනස්‌ස තං පාවුස්‌සකෙන මෙඝෙන අභිප්‌පවුට්‌ඨං සම්‌මදෙව විරුහෙය්‍ය. සාස්‌ස මාලුවාලතා තරුණා මුදුකා ලොමසා විලම්‌බිනී, සා තං සාලං උපනිසෙවෙය්‍ය. අථ ඛො, භික්‌ඛවෙ, තස්‌මිං සාලෙ අධිවත්‌ථාය දෙවතාය එවමස්‌ස – ‘කිංසු නාම තෙ භොන්‌තො මිත්‌තාමච්‌චා ඤාතිසාලොහිතා ආරාමදෙවතා වනදෙවතා රුක්‌ඛදෙවතා ඔසධිතිණවනප්‌පතීසු අධිවත්‌ථා දෙවතා මාලුවාබීජෙ අනාගතභයං සම්‌පස්‌සමානා සඞ්‌ගම්‌ම සමාගම්‌ම එවං සමස්‌සාසෙසුං [සමස්‌සාසෙය්‍යුං (ක.)] – ‘‘මා භවං භායි මා භවං භායි, අප්‌පෙව නාමෙතං මාලුවාබීජං මොරො වා ගිලෙය්‍ය, මගො වා ඛාදෙය්‍ය, දවඩාහො වා ඩහෙය්‍ය, වනකම්‌මිකා වා උද්‌ධරෙය්‍යුං, උපචිකා වා උට්‌ඨහෙය්‍යුං, අබීජං වා පනස්‌සා’’ති; සුඛො ඉමිස්‌සා මාලුවාලතාය තරුණාය මුදුකාය ලොමසාය විලම්‌බිනියා සම්‌ඵස්‌සො’ති. සා තං සාලං අනුපරිහරෙය්‍ය. සා තං සාලං අනුපරිහරිත්‌වා උපරි විටභිං [විටපං (ස්‍යා. ට්‌ඨ.)] කරෙය්‍ය. උපරි විටභිං කරිත්‌වා ඔඝනං ජනෙය්‍ය. ඔඝනං ජනෙත්‌වා යෙ තස්‌ස සාලස්‌ස මහන්‌තා මහන්‌තා ඛන්‌ධා තෙ පදාලෙය්‍ය. අථ ඛො, භික්‌ඛවෙ, තස්‌මිං සාලෙ අධිවත්‌ථාය දෙවතාය එවමස්‌ස – ‘ඉදං ඛො තෙ භොන්‌තො මිත්‌තාමච්‌චා ඤාතිසාලොහිතා ආරාමදෙවතා වනදෙවතා රුක්‌ඛදෙවතා ඔසධිතිණවනප්‌පතීසු අධිවත්‌ථා දෙවතා මාලුවාබීජෙ අනාගතභයං සම්‌පස්‌සමානා සඞ්‌ගම්‌ම සමාගම්‌ම එවං සමස්‌සාසෙසුං [සමස්‌සාසෙය්‍යුං (ක.)] – ‘‘මා භවං භායි මා භවං භායි, අප්‌පෙව නාමෙතං මාලුවාබීජං මොරො වා ගිලෙය්‍ය, මගො වා ඛාදෙය්‍ය, දවඩාහො වා ඩහෙය්‍ය, වනකම්‌මිකා වා උද්‌ධරෙය්‍යුං, උපචිකා වා උට්‌ඨහෙය්‍යුං අබීජං වා පනස්‌සා’’ති. යඤ්‌චාහං [යං වාහං (ක.), ස්‌වාහං (ස්‍යා. කං.)] මාලුවාබීජහෙතු දුක්‌ඛා තිබ්‌බා ඛරා කටුකා වෙදනා වෙදයාමී’ති. එවමෙව ඛො, භික්‌ඛවෙ, සන්‌ති එකෙ සමණබ්‍රාහ්‌මණා එවංවාදිනො එවංදිට්‌ඨිනො ‘නත්‌ථි කාමෙසු දොසො’ති . තෙ කාමෙසු පාතබ්‍යතං ආපජ්‌ජන්‌ති. තෙ මොළිබද්‌ධාහි පරිබ්‌බාජිකාහි පරිචාරෙන්‌ති. තෙ එවමාහංසු – ‘කිංසු නාම තෙ භොන්‌තො සමණබ්‍රාහ්‌මණා කාමෙසු අනාගතභයං සම්‌පස්‌සමානා කාමානං පහානමාහංසු, කාමානං පරිඤ්‌ඤං පඤ්‌ඤපෙන්‌ති? සුඛො ඉමිස්‌සා පරිබ්‌බාජිකාය තරුණාය මුදුකාය ලොමසාය බාහාය සම්‌ඵස්‌සො’ති. තෙ කාමෙසු පාතබ්‍යතං ආපජ්‌ජන්‌ති. තෙ කාමෙසු පාතබ්‍යතං ආපජ්‌ජිත්‌වා කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජන්‌ති. තෙ තත්‌ථ දුක්‌ඛා තිබ්‌බා ඛරා කටුකා වෙදනා වෙදයන්‌ති. තෙ එවමාහංසු – ‘ඉදං ඛො තෙ භොන්‌තො සමණබ්‍රාහ්‌මණා කාමෙසු අනාගතභයං සම්‌පස්‌සමානා කාමානං පහානමාහංසු, කාමානං පරිඤ්‌ඤං පඤ්‌ඤපෙන්‌ති. ඉමෙ හි මයං කාමහෙතු කාමනිදානං දුක්‌ඛා තිබ්‌බා ඛරා කටුකා වෙදනා වෙදයාමා’ති. ඉදං වුච්‌චති, භික්‌ඛවෙ, ධම්‌මසමාදානං පච්‌චුප්‌පන්‌නසුඛං ආයතිං දුක්‌ඛවිපාකං.
470. ‘‘කතමඤ්‌ච, භික්‌ඛවෙ, ධම්‌මසමාදානං පච්‌චුප්‌පන්‌නදුක්‌ඛඤ්‌චෙව ආයතිඤ්‌ච දුක්‌ඛවිපාකං? ඉධ, භික්‌ඛවෙ, එකච්‌චො අචෙලකො හොති මුත්‌තාචාරො හත්‌ථාපලෙඛනො, නඑහිභද්‌දන්‌තිකො, නතිට්‌ඨභද්‌දන්‌තිකො, නාභිහටං, න උද්‌දිස්‌සකතං, න නිමන්‌තනං සාදියති, සො න කුම්‌භිමුඛා පටිග්‌ගණ්‌හාති, න කළොපිමුඛා පටිග්‌ගණ්‌හාති, න එළකමන්‌තරං, න දණ්‌ඩමන්‌තරං, න මුසලමන්‌තරං, න ද්‌වින්‌නං භුඤ්‌ජමානානං, න ගබ්‌භිනියා, න පායමානාය, න පුරිසන්‌තරගතාය, න සඞ්‌කිත්‌තීසු, න යත්‌ථ සා උපට්‌ඨිතො හොති, න යත්‌ථ මක්‌ඛිකා සණ්‌ඩසණ්‌ඩචාරිනී, න මච්‌ඡං, න මංසං, න සුරං, න මෙරයං, න ථුසොදකං පිවති. සො එකාගාරිකො වා හොති එකාලොපිකො, ද්‌වාගාරිකො වා හොති ද්‌වාලොපිකො…පෙ.… සත්‌තාගාරිකො වා හොති සත්‌තාලොපිකො. එකිස්‌සාපි දත්‌තියා යාපෙති, ද්‌වීහිපි දත්‌තීහි යාපෙති… සත්‌තහිපි දත්‌තීහි යාපෙති. එකාහිකම්‌පි ආහාරං ආහාරෙති, ද්‌වීහිකම්‌පි ආහාරං ආහාරෙති… සත්‌තාහිකම්‌පි ආහාරං ආහාරෙති. ඉති එවරූපං අද්‌ධමාසිකම්‌පි පරියායභත්‌තභොජනානුයොගමනුයුත්‌තො විහරති. සො සාකභක්‌ඛො වා හොති , සාමාකභක්‌ඛො වා හොති, නීවාරභක්‌ඛො වා හොති, දද්‌දුලභක්‌ඛො වා හොති, හටභක්‌ඛො වා හොති, කණභක්‌ඛො වා හොති, ආචාමභක්‌ඛො වා හොති, පිඤ්‌ඤාකභක්‌ඛො වා හොති, තිණභක්‌ඛො වා හොති, ගොමයභක්‌ඛො වා හොති, වනමූලඵලාහාරො යාපෙති පවත්‌තඵලභොජී. සො සාණානිපි ධාරෙති, මසාණානිපි ධාරෙති, ඡවදුස්‌සානිපි ධාරෙති, පංසුකූලානිපි ධාරෙති, තිරීටානිපි ධාරෙති, අජිනම්‌පි ධාරෙති, අජිනක්‌ඛිපම්‌පි ධාරෙති, කුසචීරම්‌පි ධාරෙති, වාකචීරම්‌පි ධාරෙති, ඵලකචීරම්‌පි ධාරෙති, කෙසකම්‌බලම්‌පි ධාරෙති, වාළකම්‌බලම්‌පි ධාරෙති, උලූකපක්‌ඛම්‌පි ධාරෙති, කෙසමස්‌සුලොචකොපි හොති, කෙසමස්‌සුලොචනානුයොගමනුයුත්‌තො, උබ්‌භට්‌ඨකොපි හොති, ආසනපටික්‌ඛිත්‌තො, උක්‌කුටිකොපි හොති උක්‌කුටිකප්‌පධානමනුයුත්‌තො, කණ්‌ටකාපස්‌සයිකොපි හොති, කණ්‌ටකාපස්‌සයෙ සෙය්‍යං කප්‌පෙති [පස්‌ස ම. නි. 1.155 මහාසීහනාදසුත්‌තෙ], සායතතියකම්‌පි උදකොරොහනානුයොගමනුයුත්‌තො විහරති. ඉති එවරූපං අනෙකවිහිතං කායස්‌ස ආතාපනපරිතාපනානුයොගමනුයුත්‌තො විහරති . සො කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති. ඉදං වුච්‌චති, භික්‌ඛවෙ, ධම්‌මසමාදානං පච්‌චුප්‌පන්‌නදුක්‌ඛඤ්‌චෙව ආයතිඤ්‌ච දුක්‌ඛවිපාකං.
471. ‘‘කතමඤ්‌ච, භික්‌ඛවෙ, ධම්‌මසමාදානං පච්‌චුප්‌පන්‌නදුක්‌ඛං ආයතිං සුඛවිපාකං? ඉධ , භික්‌ඛවෙ, එකච්‌චො පකතියා තිබ්‌බරාගජාතිකො හොති, සො අභික්‌ඛණං රාගජං දුක්‌ඛං දොමනස්‌සං පටිසංවෙදෙති; පකතියා තිබ්‌බදොසජාතිකො හොති, සො අභික්‌ඛණං දොසජං දුක්‌ඛං දොමනස්‌සං පටිසංවෙදෙති; පකතියා තිබ්‌බමොහජාතිකො හොති, සො අභික්‌ඛණං මොහජං දුක්‌ඛං දොමනස්‌සං පටිසංවෙදෙති. සො සහාපි දුක්‌ඛෙන, සහාපි දොමනස්‌සෙන, අස්‌සුමුඛොපි රුදමානො පරිපුණ්‌ණං පරිසුද්‌ධං බ්‍රහ්‌මචරියං චරති. සො කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති. ඉදං වුච්‌චති, භික්‌ඛවෙ, ධම්‌මසමාදානං පච්‌චුප්‌පන්‌නදුක්‌ඛං ආයතිං සුඛවිපාකං.
472. ‘‘කතමඤ්‌ච, භික්‌ඛවෙ, ධම්‌මසමාදානං පච්‌චුප්‌පන්‌නසුඛඤ්‌චෙව ආයතිඤ්‌ච සුඛවිපාකං? ඉධ, භික්‌ඛවෙ, එකච්‌චො පකතියා න තිබ්‌බරාගජාතිකො හොති, සො න අභික්‌ඛණං රාගජං දුක්‌ඛං දොමනස්‌සං පටිසංවෙදෙති; පකතියා න තිබ්‌බදොසජාතිකො හොති, සො න අභික්‌ඛණං දොසජං දුක්‌ඛං දොමනස්‌සං පටිසංවෙදෙති; පකතියා න තිබ්‌බමොහජාතිකො හොති , සො න අභික්‌ඛණං මොහජං දුක්‌ඛං දොමනස්‌සං පටිසංවෙදෙති. සො විවිච්‌චෙව කාමෙහි විවිච්‌ච අකුසලෙහි ධම්‌මෙහි සවිතක්‌කං සවිචාරං විවෙකජං පීතිසුඛං පඨමං ඣානං උපසම්‌පජ්‌ජ විහරති. විතක්‌කවිචාරානං වූපසමා අජ්‌ඣත්‌තං සම්‌පසාදනං චෙතසො එකොදිභාවං අවිතක්‌කං අවිචාරං සමාධිජං පීතිසුඛං දුතියං ඣානං…පෙ.… තතියං ඣානං… චතුත්‌ථං ඣානං උපසම්‌පජ්‌ජ විහරති. සො කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති. ඉදං වුච්‌චති, භික්‌ඛවෙ, ධම්‌මසමාදානං පච්‌චුප්‌පන්‌නසුඛඤ්‌චෙව ආයතිඤ්‌ච සුඛවිපාකං. ඉමානි ඛො, භික්‌ඛවෙ, චත්‌තාරි ධම්‌මසමාදානානී’’ති.
ඉදමවොච භගවා. අත්‌තමනා තෙ භික්‌ඛූ භගවතො භාසිතං අභිනන්‌දුන්‌ති.
චූළධම්‌මසමාදානසුත්‌තං නිට්‌ඨිතං පඤ්‌චමං.
No comments:
Post a Comment